ಬೆಳಗಾವಿ ತಾಲೂಕಿನ ಹೊನಗಾ ಗ್ರಾಮದ ರೈತ ನಾಮದೇವ ದುಡುಮ್ ಅನ್ಯಾಯಕ್ಕೊಳಗಾಗಿದ್ದು, ಜೈಲು ಶಿಕ್ಷೆ ಅನುಭವಿಸಿದ ರೈತ. ಗುಗರನಟ್ಟಿ ಮತ್ತು ಕಡೋಲಿ ಗ್ರಾಮದ ಯುವಕ-ಯುವತಿ ಪ್ರೀತಿಸಿ ವರ್ಷದ ಹಿಂದೆ ಮುಂಬೈಗೆ ಹಾರಿದ್ದರು. ಯುವತಿಯೊಂದಿಗೆ ಓಡಿಹೋದ ಯುವಕನ ಅಣ್ಣ ಮತ್ತು ರೈತ ನಾಮದೇವ ದುಡಮ್ ಸ್ನೇಹಿತರು. ಆ ಕಾರಣಕ್ಕೆ ಯುವಕ ಮತ್ತು ಯುವತಿಯರ ಮನೆಗೆ ಹೋಗಿ ರಾಜಿ-ಸಂಧಾನದಲ್ಲಿ ಭಾಗಿಯಾಗಿದ್ದರು. 2021ರ ಮಾ.1ರಂದು ಓಡಿ ಹೋಗಿದ್ದ ಜೋಡಿ ಮತ್ತೆ ಗ್ರಾಮಕ್ಕೆ ಮರಳಿತ್ತು. ಕೆಲ ತಿಂಗಳ ಬಳಿಕ ಮದುವೆ ಮಾಡಿದರಾಯಿತು ಎಂದು ಎರಡೂ ಕಡೆಯವರು ನಿರ್ಧರಿಸಿದ್ದರು. ಆದರೆ, ನಂತರದಲ್ಲಿ ಯುವತಿ ಮನೆಯವರು ತಿರುಗಿ ಬಿದ್ದಿದ್ದು, ನಾಮದೇವ ಮೇಲೆ ದೂರು ದಾಖಲಿಸಿದ್ದಾರೆ. ಹೊಲದ ಗುಡಿಸಲಲ್ಲಿಯೇ ನಾಮದೇವ ಇಬ್ಬರನ್ನೂ ಕೂಡಿಟ್ಟಿದ್ದಾರೆ ಎಂದು ಬಿಳಿ ಹಾಳೆಯಲ್ಲಿ ಗುಡಿಸಲಿನ ಡೈಗ್ರಾಮ್ ಹಾಕಿ ಪೊಲೀಸರು ಎಫ್ಐಆರ್ ದಾಖಲಿಸಿದ್ದರು.
