ಇಪ್ಪಾಡಿ ಗ್ರಾಮದ ಬ್ಲಾಕ್-1ರಿಂದ ಗ್ರಾಪಂಗೆ ಚುನಾಯಿತರಾಗಿದ್ದ ಕಾಂಗ್ರೆಸ್ ಬೆಂಬಲಿತ ಸದಸ್ಯ ಐ.ಜಿ.ರಮೇಶ್ ಕೆಲ ತಿಂಗಳ ಹಿಂದೆ ಬ್ಲ್ಯಾಕ್ ಫಂಗಸ್ನಿಂದ ಮೃತಪಟ್ಟಿದ್ದರು. ಇವರ ನಿಧನದಿಂದ ತೆರವಾಗಿದ್ದ ಸದಸ್ಯ ಸ್ಥಾನಕ್ಕೆ ನಡೆದ ಚುನಾವಣೆಗೆ ಬಿಜೆಪಿ ಬೆಂಬಲಿತ ಮಹೇಶ್, ಕಾಂಗ್ರೆಸ್ ಬೆಂಬಲಿತ ಸುರೇಶ್ ಬಾಬು, ಜೆಡಿಎಸ್ ಬೆಂಬಲಿತ ಸದಸ್ಯ ಶಿವಣ್ಣ ಸ್ಪರ್ಧಿಸಿದ್ದರು. ಮೂವರ ನಡುವೆ ತೀವ್ರ ಹಣಾಹಣಿ ನಡೆದಿತ್ತು. ಮತದಾರರಿಗೆ ಜಿದ್ದಾಜಿದ್ದಿಗೆ ಬಿದ್ದಂತೆ ಹಣ, ಬಿರಿಯಾನಿ, ಮದ್ಯ, ಸೀರೆ, ಕುಕ್ಕರ್ಗಳನ್ನು ಹಂಚಿದ್ದರು. ಶತಾಯಗತಾಯ ಆ ಸ್ಥಾನವನ್ನು ತಾವೇ ಉಳಿಸಿಕೊಳ್ಳಬೇಕೆಂದು ಕಾಂಗ್ರೆಸ್ ಮುಖಂಡರು ಇನ್ನಿಲ್ಲದ ಕಸರತ್ತು ನಡೆಸಿದ್ದರಾದರೂ, ಕಳೆದ ಬಾರಿ 516 ಮತ ಪಡೆದು ಐ.ಜಿ. ರಮೇಶ್ ಎದುರು ಪರಾಜಿತರಾಗಿದ್ದ ಮಹೇಶ್ಗೆ ಅನುಕಂಪದ ಅಲೆ ಒಲಿದಿದೆ. ಇಪ್ಪಾಡಿ ಬ್ಲಾಕ್-1ರಲ್ಲಿ ಒಟ್ಟು 1120 ಮತದಾರರಿದ್ದಾರೆ. ಈ ಪೈಕಿ ಡಿ.27ರಂದು ನಡೆದ ಉಪಚುನಾವಣೆಯಲ್ಲಿ 997 ಮತಗಳು ಚಲಾವಣೆ ಆಗಿತ್ತು. ಈ ಪೈಕಿ ಮಹೇಶ್-355 ಮತ, ಸುರೇಶ್ ಬಾಬು-342 ಮತ, ಶಿವಣ್ಣ-291 ಮತ ಪಡೆದಿದ್ದಾರೆ.
