ಕೋವಿಡ್​ನಿಂದಾಗಿ 2 ವರ್ಷದಿಂದ ಸ್ಥಗಿತವಾಗಿದ್ದ ರೈಲು ಸಂಚಾರ ಜು.20ಕ್ಕೆ ಮರು ಆರಂಭ

ಬಳ್ಳಾರಿ: ಕೋವಿಡ್​ನಿಂದಾಗಿ 2 ವರ್ಷಗಳಿಂದ ಸ್ಥಗಿತವಾಗಿದ್ದ ಗುಂತಕಲ್​- ಬಳ್ಳಾರಿ- ಚಿಕ್ಕಜಾಜೂರು ನಿತ್ಯದ ಪ್ಯಾಸೆಂಜರ್​ ರೈಲನ್ನು ಜು.20 ರಿಂದ ಆರಂಭಿಸುವುದಾಗಿ ಸಿಕಂದರಾಬಾದ್​ನ ದಕ್ಷಿಣ ಮಧ್ಯ ರೈಲ್ವೆಯ ಸಿಪಿಟಿಯಂ ಕೆ.ಮಣಿಕುಮಾರ್​ ತಿಳಿಸಿದ್ದಾರೆ ಎಂದು ರಾಜ್ಯ ರೈಲ್ವೆ ಕ್ರಿಯಾ ಕೆ.ಎಂ.ಮಹೇಶ್ವರಸ್ವಾಮಿ ಮಾಹಿತಿ ನೀಡಿದ್ದಾರೆ.

ಗುಂತಕಲ್​- ಚಿಕ್ಕಜಾಜೂರು- ಗುಂತಕಲ್​, ಹುಬ್ಬಳ್ಳಿ- ತಿರುಪತಿ, ಹುಬ್ಬಳ್ಳಿ- ಕೊಲ್ಲಾಪುರ- ಮನುಗೂರು ಈ ಮೂರು ರೈಲುಗಳು ಸಿಕಂದರಾಬಾದ್​ನ ದಕ್ಷಿಣ ಮಧ್ಯ ರೈಲುಗಳಾಗಿದ್ದು, ಕೂಡಲೇ ರೈಲುಗಳ ಆರಂಭಿಸಲು ಒತ್ತಡ ತರುವಂತೆ ಇತ್ತೀಚೆಗೆ ಹುಬ್ಬಳ್ಳಿ ನೈರುತ್ಯ ರೈಲ್ವೆ ವಲಯದ ಅಧಿಕಾರಿಗಳನ್ನು ಭೇಟಿಯಾಗಿ ಒತ್ತಾಯಿಸಲಾಗಿತ್ತು. ಕೋರಿಕೆಯಂತೆ ಗುಂತಕಲ್​ನಿಂದ ಚಿಕ್ಕಜಾಜೂರು ಕಡೆಗೆ ರೈಲಿನ ಸಂಚಾರ ಆರಂಭವಾಗಲಿದೆ ಎಂದು ತಿಳಿಸಿದ್ದಾರೆ.

ಬೆಳಗ್ಗೆ 7.40ಕ್ಕೆ ಗುಂತಕಲ್​ನಿಂದ ಹೊರಡುವ ಈ ರೈಲು ಮಧ್ಯಾಹ್ನ 1.10ಕ್ಕೆ ಚಿಕ್ಕಜಾಜೂರು ತಲುಪಲಿದೆ. ಅಲ್ಲಿಂದ ರಾತ್ರಿ 9.05ಕ್ಕೆ ಗುಂತಕಲ್​ ತಲುಪಲಿದೆ. ಇದು ಪ್ಯಾಸೆಂಜರ್​ ರೈಲಾಗಿದ್ದು, ಗುಂತಕಲ್​, ಬಂಟಿನಹಾಳ್​, ಗುಮ್ಮನೂರು, ಬೇವಿನಹಾಳ್​, ಸಾಕಿಬಂಡೆ, ವೀರಾಪುರ, ಹಗರಿ, ಹದ್ದಿನಗುಂಡು, ಬಳ್ಳಾರಿ, ಓಬಳಾಪುರಂ, ಸೋಮಲಾಪುರಂ, ರಾಯದುರ್ಗ, ಮೊಳಕಾಲ್ಮೂರು, ಬಿ.ಜಿ.ಕೆರೆ, ತಳಕು, ಚಳ್ಳಕೆರೆ, ಬಲ್ಲೇನಹಳ್ಳಿ, ಚಿತ್ರದುರ್ಗ, ಹುಲಿಯೂರು, ಬೆಟ್ಟದ ನಾಗೇನಹಳ್ಳಿ, ಅಮೃತಪುರ, ಚಿಕ್ಕನಂದವಾಡಿ ಮುಖೇನ ಸಂಚರಿಸಿ ಚಿಕ್ಕಜಾಜೂರು ತಲುಪಲಿದೆ ಎಂದು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

https://www.vijayavani.net/a-davanagere-police-helped-a-disabled-young-woman/

https://www.vijayavani.net/a-lavakusha-name-bus-theft-case-shimoga/

https://www.vijayavani.net/a-banglore-chandru-death-case-language-kannada-urdu-cid-police/