ಮನೆ ಬಾಗಿಲಿಗೆ ಬಂದ ಗಿಫ್ಟ್​ ಕೂಪನ್​: ಖುಷಿಯಿಂದ ಕರೆ ಮಾಡಿದ ರಾಮನಗರ ಮೂಲದ ದಂಪತಿಗೆ ಕಾದಿತ್ತು ಶಾಕ್​

ರಾಮನಗರ: ಮನೆ ಬಾಗಿಲಿಗೆ ಗಿಫ್ಟ್​ ಕೂಪನ್​ ಬಂದಿದೆ. ಇನ್ನು ಗಿಫ್ಟ್​ ಕೊಡದೇ ಇರ್ತಾರಾ ಅಂತಾ ಅಪ್ಪಿತಪ್ಪಿ ಯಾಮಾರಿದ್ರೆ ನಿಮ್ಮ ಹಣಕ್ಕೆ ನಾಜೂಕಾಗಿಯೇ ಕತ್ತರಿ ಬೀಳುತ್ತೆ ಜೋಕೆ!

ಹೌದು, ಆನ್​ಲೈನ್​ ವಂಚನೆಯ ಹೊಸ ರೂಪ ಗಿಫ್ಟ್​ ಕೂಪನ್​! ಈ ಹೆಸರಲ್ಲಿ ವಂಚಿಸುವ ಜಾಲ ಸಕ್ರಿಯವಾಗಿದೆ. ಮನೆ ಬಾಗಿಲಿಗೆ ಬಂದ ಗಿಫ್ಟ್​ ಕವರ್​ ನೋಡಿ ಮೋಸ ಹೋಗಿ ಹಲವರು ಈಗಾಗಲೇ ಹಣ ಕಳೆದುಕೊಂಡಿದ್ದಾರೆ. ಇಂತಹದ್ದೇ ಪ್ರಕರಣ ರಾಮನಗರ ಜಿಲ್ಲೆಯಲ್ಲೂ ಬೆಳಕಿಗೆ ಬಂದಿದೆ.

ರಾಮನಗರ ಜಿಲ್ಲೆಯ ಹಾರೋಹಳ್ಳಿಯ ಆನೇಕಲ್​ ಮುಖ್ಯರಸ್ತೆ ನಿವಾಸಿ, ವೃತ್ತಿಯಲ್ಲಿ ಚಾಲಕರಾಗಿರುವ ಶಿವಕುಮಾರ್​ ಆನ್​ಲೈನ್​ ವಂಚಕರ ಮೋಸಕ್ಕೆ ಸಿಲುಕಿ ಹಣ ಕಳೆದುಕೊಂಡಿದ್ದಾರೆ. ಕೆಲ ದಿನಗಳ ಹಿಂದೆ ಇವರ ಮನೆಗೆ ಸ್ಪೀಡ್​ಪೋಸ್ಟ್​ ಬಂದಿದ್ದು, ಇದರಲ್ಲಿ ಆನ್​ಲೈನ್​ ಶಾಪಿಂಗ್​ ಎಂದು ನಮೂದಿಸಿದ ಕೂಪನ್​ ಇರಿಸಲಾಗಿತ್ತು. ಕುತೂಹಲಗೊಂಡ ಶಿವಕುಮಾರ್​ ಪತ್ನಿ, ಕೂಪನ್​ನಲ್ಲಿದ್ದ ನಂಬರ್​ಗೆ ಕರೆ ಮಾಡಿದಾಗ ನಿಮಗೆ ಬಹುಮಾನವಾಗಿ ಕಾರು ಬಂದಿದೆ. ಕಾರು ಬೇಕಾ? ಅಥವಾ 14.80 ಲಕ್ಷ ರೂ. ಬೇಕಾ? ಎಂದು ಪ್ರಶ್ನಿಸಿದ್ದಾರೆ. ಖುಷಿಪಟ್ಟ ಶಿವಕುಮಾರ್​ ಕಾರು ಕೊಡಿ ಎಂದಿದ್ದಾರೆ.

ಕರೆ ಕಡಿತಗೊಳಿಸಿದ ವಂಚಕರು, ಮರುದಿನ ಕರೆ ಮಾಡಿ ಡಿಎಲ್​, ಆಧಾರ್​ ಕಾರ್ಡ್​ಗಳನ್ನು ಮತ್ತೊಂದು ನಂಬರ್​ಗೆ ವಾಟ್ಸ್​ಆ್ಯಪ್​ ಮೂಲಕ ತರಿಸಿಕೊಂಡಿದ್ದಾರೆ. ನಂತರ ಕಾರ್​ನ ಆರ್​ಟಿಒ ಶುಲ್ಕವೆಂದು 25600 ರೂ., ಟ್ರಾನ್ಸ್​ಪೋರ್ಟ್​ ಖರ್ಚು ಎಂದು 20 ಸಾವಿರ ರೂ., ಇತರ ಖರ್ಚು ಎಂದು 10 ಸಾವಿರ ರೂ., ನಂತರ ಡೀಸೆಲ್​ಗೆ 10 ಸಾವಿರ ರೂ.ಗಳನ್ನು ಕೇಳಿ ಎಲ್ಲವನ್ನೂ ಫೋನ್​ಪೇ ಮೂಲಕವಾಗಿ ಖಾತೆಗೆ ಹಾಕಿಸಿಕೊಂಡಿದ್ದಾರೆ. ಕೆಲ ದಿನ ಕಳೆದರೂ ಮನೆ ಬಾಗಿಲಿಗೆ ಕಾರು ಬರದಿದ್ದಾಗ ಅನುಮಾನಗೊಂಡು ಸೈಬರ್​ ಪೊಲೀಸರಿಗೆ ದೂರು ನೀಡಿದ್ದಾರೆ.

https://www.vijayavani.net/a-mysuru-lodge-bjp-jagannath-shetty-mandya-honeytrap/

https://www.vijayavani.net/a-wife-life-is-tragic-end-by-husband-3/