ರಾಜ್ಯದಲ್ಲಿ ಇರೋದು 40% ಅಲ್ಲ, 65% ಕಮಿಷನ್​: ಕಾಂಗ್ರೆಸ್​-ಬಿಜೆಪಿ ವಿರುದ್ಧ ಎಚ್​ಡಿಕೆ ವಾಗ್ದಾಳಿ

ಬೀದರ್​: ರಾಜ್ಯದ ಬಿಜೆಪಿ ಸರ್ಕಾರದಲ್ಲಿ 40 ಪರ್ಸೆಂಟೇಜ್​ ಅಲ್ಲ, ಶೇ.65 ಸೋರಿಕೆಯಾಗುತ್ತಿದೆ. ಮಂತ್ರಿ, ಗುತ್ತಿಗೆದಾರ, ಇಂಜಿನಿಯರ್​ ಅವರಿಂದ ಹಿಡಿದು ಶೇ.65 ಪರ್ಸೆಂಟ್​ ಕಮಿಷನ್​ ನೀಡಬೇಕು. ಇಂಥ ಸ್ಥಿತಿಗೆ ಯಾರು ಕಾರಣ? ಭ್ರಷ್ಟಾಚಾರ ಸಂಬಂಧ ಬೀದಿಗಿಳಿದು ಕಾಂಗ್ರೆಸ್​ ಪ್ರತಿಭಟನೆ ನಡೆಸುತ್ತಿದೆ. ಇದಕ್ಕೆ ಬುನಾದಿ ಹಾಕಿದ್ದೇ ಆ ಪಕ್ಷ ಎಂದು ಮಾಜಿ ಸಿಎಂ ಎಚ್​.ಡಿ. ಕುಮಾರಸ್ವಾಮಿ ಎಂದು ಕಿಡಿಕಾರಿದರು.

ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಎಚ್​ಡಿಕೆ, ಹಾಲು ಉತ್ಪಾದಕರ ಸಂಘದಲ್ಲಿ ನೇಮಕಕ್ಕೆ 25-50 ಲಕ್ಷ ರೂ. ಲಂಚ ನಿಗದಿ ಮಾಡಿದ್ದು ಎಲ್ಲರಿಗೂ ಗೊತ್ತಿದೆ. ಇದೀಗ ಪಿಎಸ್​ಐ ನೇಮಕಾತಿ ವಿಷಯ ಹೊರಬಿದ್ದಿದೆ. ಮನೆ-ಮಠ ಮಾರಿ ಲಕ್ಷಾಂತರ ರೂ. ಕೊಟ್ಟು ಸರ್ಕಾರಿ ಕೆಲಸಕ್ಕೆ ಸೇರಿಕೊಳ್ಳುತ್ತಾರೆ. ಇದರಲ್ಲಿ ದೊಡ್ಡವರು ಯಾರೂ ಸಿಕ್ಕಿ ಹಾಕಿಕೊಳ್ಳಲ್ಲ. ಪಾರದರ್ಶಕ ತನಿಖೆ ನಡೆಸಿ ನಿಜವಾದ ಆರೋಪಿಗಳನ್ನು ಬಂಧಿಸಬೇಕು ಎಂದು ಒತ್ತಾಯಿಸಿದರು.

ರಾಜ್ಯದ ಬಿಜೆಪಿ ಸರ್ಕಾರದಲ್ಲಿ ಹಿಡಿತ ಇಲ್ಲ. ಒಂದೆಡೆ ಪಿಎಸ್​ಐ ನೇಮಕ ಪರೀಕ್ಷೆಯಲ್ಲಿ ಅಕ್ರಮ, ಇನ್ನೊಂದೆಡೆ ಗುತ್ತಿಗೆದಾರರಿಂದ 40 ಪರ್ಸೆಂಟೇಜ್​ ಕಮಿಷನ್​. ಹೀಗೆ ಸರ್ಕಾರ ಭ್ರಷ್ಟಾಚಾರದಲ್ಲಿ ಮುಳುಗಿದೆ ಎಂದು ಕುಮಾರಸ್ವಾಮಿ ವಾಗ್ದಾಳಿ ನಡೆಸಿದರು. ಶಾಸಕ ಬಂಡೆಪ್ಪ ಖಾಶೆಂಪುರ, ಜೆಡಿಎಸ್​ ಜಿಲ್ಲಾಧ್ಯ ರಮೇಶ ಪಾಟೀಲ್​ ಸೋಲಪುರ ಇತರರಿದ್ದರು.

ಸರ್ಕಾರದಲ್ಲಿ ಹೇಳೋರು ಕೇಳೋರು ಯಾರೂ ಇಲ್ಲ. ಹೇಗೆ ಗೆಲ್ಲಬೇಕು? ಹೇಗೆ ಬೆಂಕಿ ಹಚ್ಚಬೇಕು ಎಂಬುದು ಮಾತ್ರ ಹೈಕಮಾಂಡ್​ಗೆ ಗೊತ್ತಿರುವಂತಿದೆ. ಭ್ರಷ್ಟಾಚಾರದ ಬಗ್ಗೆ ಮಾತನಾಡುವ ಕಾಂಗ್ರೆಸಿಗರೇ ಲೋಕಾಯುಕ್ತವನ್ನು ಕಂಪ್ಲೀಟ್​ ಬಂದ್​ ಮಾಡಿದವರು. ಬಿಜೆಪಿ, ಕಾಂಗ್ರೆಸ್​ ಒಂದೇ ನಾಣ್ಯದ ಎರಡು ಮುಖಗಳಿದ್ದಂತೆ ಎಂದು ಆಕ್ರೋಶ ಹೊರಹಾಕಿದರು.

https://www.vijayavani.net/a-cruiser-truck-accident-7-person-death-in-latur/

https://www.vijayavani.net/a-coffee-board-former-president-bojegowda-passed-away/