8 ಸಾವಿರ ಕ್ವಿಂಟಾಲ್ ನಕಲಿ ಗೋವಿನಜೋಳ ಬೀಜ ವಶ

ಬ್ಯಾಡಗಿ: ಪಟ್ಟಣ ಹಾಗೂ ಮೋಟೆಬೆನ್ನೂರ ಗ್ರಾಮದ ಕೋಲ್ಡ್ ಸ್ಟೋರೇಜ್​ಗಳ ಮೇಲೆ ಶುಕ್ರವಾರ ದಾಳಿ ನಡೆಸಿದ ಜಿಲ್ಲಾ ಜಾಗ್ರತ ದಳ, ನಕಲಿ ಗೋವಿನಜೋಳದ ಬೀಜಗಳ ಚೀಲಗಳನ್ನು ವಶಪಡಿಸಿಕೊಂಡಿದೆ.

ಪಟ್ಟಣದ ಸೂರ್ಯ ಕೋಲ್ಡ್ ಸ್ಟೋರೇಜ್​ನಲ್ಲಿ 3 ಸಾವಿರ ಕ್ವಿಂಟಾಲ್, ಮೊಟೆಬೆನ್ನೂರು ಗ್ರಾಮದ ಬಳಿಯ ವಕ್ರತುಂಡ ಅಗ್ರಿಟೆಕ್ ಪ್ರೈ.ಲಿಮಿಟೆಡ್​ನಲ್ಲಿ ಸಂಗ್ರಹಿಸಿಟ್ಟಿದ್ದ 5 ಸಾವಿರ ಕ್ವಿಂಟಾಲ್ ನಕಲಿ ಗೋವಿನ ಜೋಳದ ಬೀಜಗಳ ಚೀಲಗಳನ್ನು ವಶಪಡಿಸಿಕೊಂಡಿದೆ. ಇವುಗಳ ಅಂದಾಜು ಮೌಲ್ಯ 8 ಕೋಟಿ ರೂ. ಎಂದು ತಿಳಿದುಬಂದಿದೆ.

ಜಿಲ್ಲಾ ಜಂಟಿ ಸಹಾಯಕ ನಿರ್ದೇಶಕ ಡಾ.ಬಿ.ಮಂಜುನಾಥ, ಉಪನಿರ್ದೇಶಕಿ ಸ್ಪೂರ್ತಿ ಜಿ.ಎಸ್., ಸಿಪಿಐ ಭಾಗ್ಯವತಿ ಬಂತಿ, ಸಹಾಯಕ ಕೃಷಿ ನಿರ್ದೇಶಕ ಎಚ್.ಬಿ. ಗೌಡಪ್ಪಳವರ, ಜಿಲ್ಲಾ ಜಾಗ್ರತ ದಳದ ನಿರ್ದೇಶಕ ಸುನೀಲಕುಮಾರ ನಾಯಕ ದಾಳಿ ಕಾರ್ಯಾಚರಣೆಯಲ್ಲಿದ್ದರು.

ಕೋಲ್ಡ್ ಸ್ಟೋರೇಜ್​ಗಳಲ್ಲಿ ನಕಲಿ ಬೀಜ ಸಂಗ್ರಹಿಸಿದವರು ಯಾರು, ಎಲ್ಲಿಂದ ತಂದಿಡಲಾಗಿದೆ. ಯಾವ ಅಂಗಡಿಗಳಿಗೆ ನಕಲಿ ಬೀಜ ಪೂರೈಸಲಾಗುತ್ತಿತ್ತು ಎಂಬ ನಿಟ್ಟಿನಲ್ಲಿ ಸಮಗ್ರ ತನಿಖೆ ನಡೆಯುತ್ತಿದೆ.