75 ಜನರಲ್ಲಿ ಕೋವಿಡ್ ಸೋಂಕು ದೃಢ

ವಿಜಯವಾಣಿ ಸುದ್ದಿಜಾಲ ಕಾರವಾರ: ಜಿಲ್ಲೆಯಲ್ಲಿ ಬುಧವಾರ 75 ಜನರಲ್ಲಿ ಕರೊನಾ ಸೋಂಕು ಕಾಣಿಸಿಕೊಂಡಿದ್ದು, ಇಬ್ಬರು ಮೃತಪಟ್ಟಿದ್ದಾರೆ. 107 ಜನ ಗುಣ ಹೊಂದಿ ಬಿಡುಗಡೆಯಾಗಿದ್ದಾರೆ.

ಹಳಿಯಾಳ ಹಾಗೂ ದಾಂಡೇಲಿಯಲ್ಲಿ ಒಟ್ಟು 36, ಕಾರವಾರ ಹಾಗೂ ಅಂಕೋಲಾದಲ್ಲಿ ತಲಾ 6, ಶಿರಸಿ- 9, ಮುಂಡಗೋಡ- 7, ಹೊನ್ನಾವರ- 3, ಭಟ್ಕಳ- 4, ಜೊಯಿಡಾ- 2, ಕುಮಟಾ ಹಾಗೂ ಯಲ್ಲಾಪುರದಲ್ಲಿ ತಲಾ 1 ಪ್ರಕರಣಗಳು ಪತ್ತೆಯಾಗಿವೆ.

ಕಾರವಾರದಿಂದ ಒಬ್ಬ, ಅಂಕೋಲಾದಿಂದ ಮೂವರು, ಕುಮಟಾದಿಂದ 10, ಭಟ್ಕಳದಿಂದ 15, ಹಳಿಯಾಳ ದಾಂಡೇಲಿಯಿಂದ 78 ಜನರು ಗುಣ ಹೊಂದಿ ಬಿಡುಗಡೆಯಾಗಿದ್ದಾರೆ.

ಒಟ್ಟಾರೆ ಸೋಂಕಿತರಲ್ಲಿ 11 ವೃದ್ಧರು 10 ಮಕ್ಕಳು ಇದ್ದಾರೆ. 13 ಜನರಿಗೆ ಜ್ವರದ ಲಕ್ಷಣ (ಐಎಲ್​ಐ ಹಾಗೂ ಸಾರಿ)ಗಳಿವೆ. ಹೊರ ಊರುಗಳಿಂದ ಬಂದ 13 ಜನರಲ್ಲಿ ಸೋಂಕು ಕಾಣಿಸಿಕೊಂಡಿದ್ದು, 11 ಜನರ ಸೋಂಕಿನ ಮೂಲ ಪತ್ತೆಯಾಗಿಲ್ಲ.

ಹಳಿಯಾಳದಲ್ಲಿ ಉಲ್ಬಣ: ಹಳಿಯಾಳದಲ್ಲಿ ಮತ್ತೆ ಕರೊನಾ ಅಬ್ಬರ ಕಂಡುಬಂದಿದೆ. ತೇರಗಾಂವ ಗ್ರಾಮದಲ್ಲಿ ಸೋಂಕಿತರ ಸಂಪರ್ಕದಿಂದ 8, ಪಟ್ಟಣದಲ್ಲಿ 11, ಬಿ.ಕೆ.ಹಳ್ಳಿ, ಬಸನವನ ಹಳ್ಳಿ, ಕೆ.ಕೆ.ಹಳ್ಳಿ, ತಟ್ಟಿಗೇರಿ ಜೋಗನಕೊಪ್ಪದಲ್ಲಿ ತಲಾ ತ ಪ್ರಕರಣಗಳು ಪತ್ತೆಯಾಗಿವೆ.

ದಾಂಡೇಲಿಯಲ್ಲಿ 12 ಪ್ರಕರಣಗಳು ಪತ್ತೆಯಾಗಿವೆ. ಸುಭಾಷ್ ನಗರ, ಸಂಡೆ ಮಾರ್ಕೆಟ್, ಗಾಂಧಿ ನಗರ ವೆಸ್ಟ್ ಕೋಸ್ಟ್ ಕಾರ್ಖಾನೆಯ ವಿವಿಧ ಮನೆಗಳ ಸಮೀಪ ಸೋಂಕಿತರು ಕಂಡುಬಂದಿದ್ದಾರೆ.

ಹೊನ್ನಾವರ ಠಾಣೆ ಸೀಲ್​ಡೌನ್: ಹೊನ್ನಾವರ ಪೊಲೀಸ್ ಠಾಣೆಯ ಒಟ್ಟು ಮೂವರಿಗೆ ಕರೊನಾ ಖಚಿತವಾದ ಹಿನ್ನೆಲೆಯಲ್ಲಿ ಪೊಲೀಸ್ ಠಾಣೆಯನ್ನು ಸೀಲ್​ಡೌನ್ ಮಾಡಲಾಗಿದೆ. ಕಾರವಾರದಲ್ಲಿ ಕೆಎಚ್​ಬಿ ಕಾಲನಿಯಲ್ಲಿ ಇಬ್ಬರು, ಬಾಂಡಿಶಿಟ್ಟಾ, ಪದ್ಮನಾಭನಗರ, ಸುಂಕೇರಿ, ನದಿವಾಡಗಳಲ್ಲಿ ತಲಾ ಒಂದೊಂದು ಪ್ರಕರಣಗಳು ಪತ್ತೆಯಾಗಿವೆ. ಶಿರಸಿಯ ಭೀಮನಗುಡ್ಡದಲ್ಲಿ ಮತ್ತು ಕಸ್ತೂರಬಾ ನಗರದಲ್ಲಿ ತಲಾ 2, ವಿಜಯನಗರ, ಲಯನ್ ನಗರ, ಸಿಂಪಿಗಲ್ಲಿ, ತಲಾ ಒಂದು ಪ್ರಕರಣಗಳು ಕಂಡುಬಂದಿವೆ.

ಮರಣ ಹೊಂದಿದವರಿಗೆ ಇತ್ತು ಅನ್ಯ ಕಾಯಿಲೆ: ಕರೊನಾ ದೃಢಪಟ್ಟ ಅಂಕೋಲಾದ 76 ವರ್ಷದ ವೃದ್ಧನನ್ನು ಬುಧವಾರ ಕ್ರಿಮ್್ಸ ಆಸ್ಪತ್ರೆಗೆ ತರಲಾಗಿತ್ತು. ಆದರೆ, ಚಿಕಿತ್ಸೆಗೆ ಸ್ಪಂದಿಸದೇ ಅವರು ಸಾವನ್ನಪ್ಪಿದ್ದಾರೆ. ಅನ್ಯ ಕಾಯಿಲೆಯಿಂದ ಬಳಲುತ್ತಿದ್ದ ಹೊನ್ನಾವರದ ಇನ್ನೊಬ್ಬ ವೃದ್ಧ ಕೂಡ ಕೋವಿಡ್ ತಗುಲಿ ಮೃತಪಟ್ಟಿದ್ದಾರೆ.