ಶೋಲೆ ಚಿತ್ರಕ್ಕೆ ಈ ಸ್ಥಳ ಆಯ್ಕೆ ಮಾಡಿಕೊಂಡಿದ್ದು ಚಿತ್ರದ ಕಥಾಹಂದರ. ಅಂದಿನ ಕಾಲಘಟ್ಟದಲ್ಲಿ ಚಂಬಲ್ ಕಣಿವೆಯಲ್ಲಿ ಡಕಾಯಿತರ ಹಾವಳಿ ತೀವ್ರವಾಗಿತ್ತು. ಕುಖ್ಯಾತ ಡಕಾಯಿತನನ್ನು ಮಣಿಸುವ ಕಥೆಯ ಶೋಲೆ ಚಿತ್ರವನ್ನು ನಿರ್ಮಾಣ ಮಾಡಬೇಕಿದ್ದ ಕಾರಣ ಸಿಪ್ಪಿ ಫಿಲಮ್ಸ್ ಸ್ಥಳದ ಹುಡುಕಾಟದಲ್ಲಿದ್ದಾಗ ಅವರ ಕಣ್ಣಿಗೆ ಬಿದ್ದ ಜಾಗ ರಾಮನಗರದ ರಾಮದೇವರ ಬೆಟ್ಟ. ಈ ಸ್ಥಳದಲ್ಲಿ ಬೆಟ್ಟ-ಗುಡ್ಡಗಳು, ಕುರುಚಲು ಕಾಡು ಹಾಗೂ ಹೆದ್ದಾರಿ ಬದಿಯಲ್ಲಿ ಸಾಕಷ್ಟು ದೂರದ ರೈಲ್ವೆ ಟ್ರ್ಯಾಕ್ ಇದ್ದುದು ಚಿತ್ರೀಕರಣಕ್ಕೆ ಹೇಳಿಮಾಡಿಸಿದಂತಿತ್ತು. ಸುಮಾರು 2 ವರ್ಷಗಳ ಕಾಲ ಶೋಲೆ ಚಿತ್ರೀಕರಣವಾಗಿದ್ದು, ಚಿತ್ರದ ಶೇ.99 ದೃಶ್ಯಗಳನ್ನು ರಾಮದೇವರ ಬೆಟ್ಟದ ತಪ್ಪಲಿನಲ್ಲೇ ಚಿತ್ರೀಕರಿಸಲಾಗಿದೆ. ಚಿತ್ರೀಕರಣ ಸಮಯದಲ್ಲಿ ಇಡೀ ಚಿತ್ರತಂಡ ರಾಮನಗರ ಖಾಸಗಿ ಕಲ್ಯಾಣ ಮಂಟಪದಲ್ಲಿ ವಾಸ್ತವ್ಯ ಹೂಡಿತ್ತು. ಚಿತ್ರದ ಅಮಿತಾಭ್ ಬಚ್ಚನ್, ಧರ್ಮೇಂದ್ರ, ಹೇಮಾಮಾಲಿನಿ, ಜಯಾ ಬಾದುರಿ ಸೇರಿ ಘಟಾನುಘಟಿ ನಟ, ನಟಿಯರು, ನಿರ್ದೇಶಕ ರಮೇಶ್ ಸಿಪ್ಪಿ ಬೆಂಗಳೂರಿನಲ್ಲಿ ವಾಸ್ತವ್ಯ ಹೂಡಿ ಚಿತ್ರೀಕರಣದ ಸಮಯದಲ್ಲಿ ಇಲ್ಲಿಗೆ ಬಂದು ಹೋಗುತ್ತಿದ್ದರು ಎಂದು ಹಿರಿಯರು ಹೇಳುತ್ತಾರೆ.
