ಟೊಮ್ಯಾಟೊ ವ್ಯಾಪಾರಿಗೆ ರೂ.48.55 ಲಕ್ಷ ವಂಚನೆ

ಚಿಂತಾಮಣಿ: ವ್ಯಾಪಾರಿಯಿಂದ 48.55 ಲಕ್ಷ ರೂ. ಮೌಲ್ಯದ ಟೊಮ್ಯಾಟೊ ಖರೀದಿಸಿ ಹಣ ನೀಡದೆ ವಂಚಿಸಿರುವ ಪ್ರಕರಣ ತಡವಾಗಿ ಬೆಳಕಿಗೆ ಬಂದಿದೆ.

ನಗರದ ಎಪಿಎಂಸಿ ಮಾರುಕಟ್ಟೆ ಟೊಮ್ಯಾಟೊ ವ್ಯಾಪಾರಿ ನಗರದ ಕೆಜಿಎನ್​ ಬಡಾವಣೆ ನಿವಾಸಿ ಮಹಮದ್​ ಶಬ್ಬಿರ್​ವುದ್ದೀನ್​ ವಂಚನೆಗೊಳಗಾದವರು. ಇವರ ದೂರಿನ ಆಧಾರದಲ್ಲಿ ಆರ್​.ಎಂ. ಮೆಹೇತ್ರೆ ಬಾವುಸಾ, ನಿತಿನ್​ ಮೆಹೇತ್ರೆ ಬಾವುಸಾ ಮತ್ತು ಭಗವತ್​ ದತ್ತು ಸರ್ಮಲೆ ಎಂಬುವರ ವಿರುದ್ಧ ರೂ.25ರಂದು ಪ್ರಕರಣ ದಾಖಲಾಗಿದೆ.

ಮಹಾರಾಷ್ಟ್ರದ ಸಂಗಮ್​ ನೇರ್​ ನಿವಾಸಿ ಭಗವತ್​ ದತ್ತು ಸರ್ಮಲೆ 12 ವರ್ಷಗಳಿಂದ ನಮ್ಮ ಜತೆ ಕೆಲಸ ಮಾಡುತ್ತಿದ್ದು, 2024ರ ಜುಲೈ 3ರಂದು ಸಂಗಮ್​ ನೇರ್​ ನಿವಾಸಿ ಆರ್​.ಎಂ. ಮೆಹೇತ್ರ ಬಾವುಸಾ ಅವರನ್ನು ಸ್ನೇಹಿತ ಎಂದು ಫೋನ್​ ಮೂಲಕ ಪರಿಚಯಿಸಿ, ಅವರು ದೊಡ್ಡ ಟೊಮ್ಯಾಟೊ ವ್ಯಾಪಾರಿ ಎಂದು ನಂಬಿಸಿದ್ದ. ನಂತರ ಮೆಹೇತ್ರ ಬಾವುಸಾ ಸೋಂದರ ನಿತಿನ್​ ಮೆಹೇತ್ರ ಅವರ ಪರಿಚಯವಾಗಿತ್ತು.

ನಂತರ ಆರ್​.ಎಂ. ಮೆಹೇತ್ರ ಬಾವುಸಾ ಹೆಸರಿನಲ್ಲಿ ನಿತಿನ್​ಮೆಹೇತ್ರ 2024ರ ಸೆ.19ರವರೆಗೆ ಒಟ್ಟು 48,55,000 ಲಕ್ಷ ರೂ. ಮೌಲ್ಯದ ಟೊಮ್ಯಾಟೊ ಖರೀದಿ ಮಾಡಿದ್ದು, ಹಣ ನೀಡಿಲ್ಲ ಎಂದು ಶಬ್ಬಿರ್​ವುದ್ದೀನ್​ ದೂರಿನಲ್ಲಿ ತಿಳಿಸಿದ್ದಾರೆ.