ಹೈ ವೋಲ್ಟೇಜ್​ ಕ್ಷೇತ್ರದಲ್ಲಿ "3ನೇ' ಬೈ ಎಲೆಕ್ಷನ್​

ರಾಜಕೀಯ ಪಕ್ಷಗಳ ನಡುವೆ ಪ್ರಬಲ ಪೈಪೋಟಿ

ಅಭ್ಯರ್ಥಿ ಘೋಷಣೆಯಲ್ಲಿ ಕೈ ಭವಿಷ್ಯ

ಗಂಗಾಧರ್​ ಬೈರಾಪಟ್ಟಣ

ಚನ್ನಪಟ್ಟಣ ಸದಾಕಾಲ ಹೈ ವೋಲ್ಟೇಜ್​ ಚುನಾವಣೆಗೆ ಸಾಯಾದ ಕ್ಷೇತ್ರ. ಅದೇ ರೀತಿ ಒಂದೂವರೆ ದಶಕದಲ್ಲಿ ಮೂರನೇ ಉಪಚುನಾವಣೆಯನ್ನು ಕಾಣುತ್ತಿದೆ.

2009ರಿಂದ ಆರಂಭಗೊಂಡು ಇಲ್ಲಿಯವರೆಗೆ ಇದು ಮೂರನೇ ಉಪಚುನಾವಣೆಯಾಗಿದ್ದು, ಈಗಲೂ ರಾಜಕೀಯ ಪಕ್ಷಗಳ ನಡುವೆ ಪ್ರಬಲ ಸೆಣಸಾಟ ಏರ್ಪಟ್ಟಿದೆ.

ಆಪರೇಷನ್​ ಕಮಲದಿಂದ ಆರಂಭ: ಚನ್ನಪಟ್ಟಣದಲ್ಲಿ ಉಪಚುನಾವಣೆ ಆರಂಭಗೊಂಡಿದ್ದು, ಆಪರೇಷನ್​ ಕಮಲದಿಂದಲೇ. 2008ರಲ್ಲಿ ರಾಜ್ಯದಲ್ಲಿ ಬಿಜೆಪಿ ಸರ್ಕಾರ ಅಸ್ತಿತ್ವಕ್ಕೆ ಬಂದ ನಂತರ ಚನ್ನಪಟ್ಟಣದ ಕಾಂಗ್ರೆಸ್​ ಶಾಸಕರಾಗಿದ್ದ ಸಿ.ಪಿ.ಯೋಗೇಶ್ವರ್​ ರಾಜೀನಾಮೆ ನೀಡಿ, ಕಮಲ ಪಾಳಯಕ್ಕೆ ಹಾರುತ್ತಾರೆ. ಇದರಿಂದಾಗಿ ಕ್ಷೇತ್ರದ ಇತಿಹಾಸದಲ್ಲಿ ಮೊದಲ ಉಪಚುನಾವಣೆಗೆ ಮುನ್ನುಡಿ ಬರೆಯುತ್ತಾರೆ.

ಇದಾದ ನಂತರ ನಡೆದ ಉಪಚುನಾವಣೆಯಲ್ಲಿ ಯೋಗೇಶ್ವರ್​ ವಿರುದ್ಧವೇ ಗೆಲುವು ಸಾಧಿಸಿ ಶಾಸಕರಾಗುವ ಜೆಡಿಎಸ್​ನ ಎಂ.ಸಿ.ಅಶ್ವತ್ಥ್​ ಸಹ ಆಪರೇಷನ್​ ಕಮಲಕ್ಕೆ ತುತ್ತಾಗಿ ರಾಜೀನಾಮೆ ನೀಡುವುದರಿಂದ 2011ರ ಏಪ್ರಿಲ್​ನಲ್ಲಿ ಮತ್ತೊಂದು ಉಪಚುನಾವಣೆ ಎದುರಾಗುತ್ತದೆ.

ಕುಮಾರಸ್ವಾಮಿ, ಲೋಕಸಭಾ ಚುನಾವಣೆಯಲ್ಲಿ ಮಂಡ್ಯದಲ್ಲಿ ಸ್ಪರ್ಧಿಸಿ ಗೆದ್ದ ಬಳಿಕ ತಮ್ಮ ಶಾಸಕ ಸ್ಥಾನಕ್ಕೆ ಜೂನ್​ 14ರಂದು ರಾಜೀನಾಮೆ ಕೊಟ್ಟಿದ್ದರು. ಅವರಿಂದ ತೆರವಾಗಿರುವ ಕ್ಷೇತ್ರವಿಗ ಮೂರನೇ ಉಪ ಚುನಾವಣೆಗೆ ಸಾಕ್ಷಿಯಾಗಿದೆ.

ಸಿಪಿವೈ ಸ್ಫರ್ಧೆ: ಈ ಎರಡೂ ಚುನಾವಣೆ ಸ್ಪರ್ಧೆಯ ವಿಶೇಷ ಏನಂದರೆ, ಸಿ.ಪಿ.ಯೋಗೇಶ್ವರ್​ ಬಿಜೆಪಿಯಿಂದ ಸ್ಪರ್ಧಿಸಿ, ಒಂದರಲ್ಲಿ ಸೋಲು ಮತ್ತು ಮತ್ತೊಂದರಲ್ಲಿ ಗೆಲುವು ಸಾಧಿಸುತ್ತಾರೆ.

2009ರಲ್ಲಿ ನಡೆದ ಉಪಚುನಾವಣೆಯಲ್ಲಿ ಬಿಜೆಪಿ ಟಿಕೆಟ್​ ಪಡೆದ ಸಿ.ಪಿ.ವೈಗೆ ಜೆಡಿಎಸ್​ನ ಎಂ.ಸಿ.ಅಶ್ವತ್ಥ್​ ಎದುರಾಳಿ. ಕಾಂಗ್ರೆಸ್​ನಿಂದ ಮಾಜಿ ಶಾಸಕ ಟಿ.ವಿ.ಕೃಷ್ಣಪ್ಪ ಅವರ ಮಗ ಟಿ.ಕೆ.ಯೋಗೇಶ್​ ಅವರಿಗೆ ಟಿಕೆಟ್​ ನೀಡಲಾಗಿತ್ತು. ಜಿದ್ದಾಜಿದ್ದಿನಿಂದ ಕೂಡಿದ್ದ ಚುನಾವಣೆಯಲ್ಲಿ ಗೆಲುವು ಅಶ್ವತ್ಥ್​ಗೆ ಒಲಿಯುತ್ತದೆ. ಯೋಗೇಶ್ವರ್​ 2,282 ಮತಗಳ ಅಂತರದಿಂದ ಸೋಲುಕಾಣುತ್ತಾರೆ.

ನಂತರ ಕೇವಲ ಒಂದೇ ವರ್ಷದಲ್ಲಿ ಅಶ್ವತ್ಥ್​ ಸಹ ರಾಜೀನಾಮೆ ನೀಡುವುದರಿಂದ ತೆರವಾದ ಸ್ಥಾನಕ್ಕೆ ನಡೆದ ಉಪಚುನಾವಣೆಯಲ್ಲಿ ಮತ್ತೆ ಸ್ಪರ್ಧಿಸುವ ಸಿ.ಪಿ.ಯೋಗೇಶ್ವರ್​ಗೆ ಜೆಡಿಎಸ್​ನ ಸಿಂ.ಲಿಂ.ನಾಗರಾಜು ಎದುರಾಳಿ. ಆಗ ಕಾಂಗ್ರೆಸ್​ನಿಂದ ಹಾಲಿ ಬಿಎಂಐಸಿಪಿಐ ಅಧ್ಯಕ್ಷ ರುನಂದನ್​ ರಾಮಣ್ಣ ಹುರಿಯಾಳು. ಈ ಚುನಾವಣೆಯಲ್ಲಿ ಸಿಪಿವೈ 17,803 ಮತಗಳ ಅಂತರದಿಂದ ಗೆಲುವು ಸಾಧಿಸುತ್ತಾರೆ.

ಈಗ ಮೂರನೇ ಚುನಾವಣೆ ಎದುರಾಗಿದ್ದು, ಈ ಚುನಾವಣೆಯಲ್ಲಿಯೂ ಯೋಗೇಶ್ವರ್​ ಸ್ಪರ್ಧೆ ಮಾಡುವ ಸ್ಪಷ್ಟ ನಿರ್ಧಾರಕ್ಕೆ ಬಂದಿರುವುದರಿಂದ, ಮೂರು ಉಪಚುನಾವಣೆಯಲ್ಲಿ ಯೋಗೇಶ್ವರ್​ ಸ್ಪರ್ಧೆ ಮಾಡಿದಂತೆ ಆಗುತ್ತದೆ.

ಬಾಕ್ಸ್​

ಪುಟಿದೇಳುವುದೇ ಕೈ ಪಾಳಯ

ಕಳೆದ ಎರಡೂ ಉಪಚುನಾವಣೆಯಲ್ಲಿ ಕಾಂಗ್ರೆಸ್​ ಸೋಲು ಕಾಣುವ ಮೂಲಕ ತನ್ನ ನೆಲೆಯನ್ನು ಹಂತ ಹಂತವಾಗಿ ಕಳೆದುಕೊಳ್ಳುತ್ತಾ ಬಂದಿದೆ. ಆದರೆ, ಈ ಬಾರಿ ಡಿಸಿಎಂ ಡಿ.ಕೆ.ಶಿವಕುಮಾರ್​ ಕ್ಷೇತ್ರದಲ್ಲಿ ಕಾಲಿಗೆ ಚಕ್ರ ಕಟ್ಟಿಕೊಂಡವರಂತೆ ತಿರುಗಾಡುತ್ತಿರುವುದು ಪಕ್ಷಕ್ಕೆ ಬಲ ನೀಡುವ ಸೂಚನೆ ನೀಡಿದೆ. ಆದರೆ, ಅಭ್ಯರ್ಥಿ ಯಾರು ಎನ್ನುವ ಪ್ರಶ್ನೆಗೆ ಸ್ಪಷ್ಟ ಉತ್ತರ ನೀಡದೆ ಇರುವುದು ಉಪಚುನಾವಣೆ ಕಾಂಗ್ರೆಸ್​ ಪಾಲಿಗೆ ಕೈ ಹಿಡಿಯುವುದೋ ಇಲ್ಲ, ಕೈ ಕೊಡುವುದೋ ಎನ್ನುವುದು ಅಭ್ಯರ್ಥಿ ಮೇಲೆ ನಿರ್ಧಾರವಾಗಲಿದೆ.

ಪಟ್ಟಿ...

ಉಪ ಚುನಾವಣೆಗಳ ಹಿನ್ನೋಟ

2009ರ ಉಪಚುನಾವಣೆ

ಅಭ್ಯರ್ಥಿ ಪಕ್ಷ ಪಡೆದ ಮತ

ಎಂ.ಸಿ.ಅಶ್ವತ್ಥ್​ ಜೆಡಿಎಸ್​ 64,517

ಸಿ.ಪಿ.ಯೋಗೇಶ್ವರ್​ ಬಿಜೆಪಿ 62,235

ಟಿ.ಕೆ.ಯೋಗೇಶ್​ ಕಾಂಗ್ರೆಸ್​ 17299

2011ರ ಉಪಚುನಾವಣೆ

ಅಭ್ಯರ್ಥಿ ಪಕ್ಷ ಪಡೆದ ಮತ

ಸಿ.ಪಿ.ಯೋಗೇಶ್ವರ್​ ಬಿಜೆಪಿ 75275

ಸಿಂ.ಲಿಂ.ನಾಗರಾಜು ಜೆಡಿಎಸ್​ 57472

ರಘುನಂದನ್​ ಕಾಂಗ್ರೆಸ್​ 12687