8 ತಿಂಗಳಲ್ಲಿ 358 ಶಿಶುಗಳ ದುರ್ಮರಣ: ಬಳ್ಳಾರಿ-ವಿಜಯನಗರದಲ್ಲಿ ಆತಂಕ ಅಪೌಷ್ಟಿಕತೆ ಪ್ರಮುಖ ಕಾರಣ

ಬಳ್ಳಾರಿ: ಕರೊನಾ ಮೂರನೇ ಅಲೆ ಭೀತಿ ನಡುವೆಯೇ ಗಣಿನಾಡು ಬಳ್ಳಾರಿಯಲ್ಲಿ ಅಪೌಷ್ಟಿಕತೆ, ಕಡಿಮೆ ತೂಕ, ಅವಧಿಪೂರ್ವ ಜನನ, ವಿವಿಧ ಸೋಂಕಿನ ಕಾರಣಗಳಿಂದಾಗಿ ನವಜಾತ ಶಿಶುಗಳು ಕಣ್ಮುಚ್ಚುತ್ತಿರುವುದು ಕಳವಳ ಮೂಡಿಸಿದೆ. ಪ್ರಸಕ್ತ ಸಾಲಿನ ಏಪ್ರಿಲ್​ನಿಂದ ನವೆಂಬರ್​ವರೆಗೆ ಬಳ್ಳಾರಿ-ವಿಜಯನಗರ ಅವಳಿ ಜಿಲ್ಲೆ ವ್ಯಾಪ್ತಿಯಲ್ಲಿ 358 ಕಂದಮ್ಮಗಳು ಅಸುನೀಗಿವೆ. ಈ ಪೈಕಿ ಬಳ್ಳಾರಿಯಲ್ಲಿ 293, ವಿಜಯನಗರ ಜಿಲ್ಲೆಯಲ್ಲಿ 65 ಶಿಶುಗಳ ಸಾವಾಗಿದೆ. ಅದರಲ್ಲಿಯೂ ಆಂಧ್ರದ ಅನಂತಪುರ, ಕರ್ನಲ್ ಮತ್ತು ಉತ್ತರ ಕರ್ನಾಟಕದ ಹಲವು ಜಿಲ್ಲೆಗಳ ಜನತೆಗೆ ಆಸರೆಯಾಗಿರುವ ಬಳ್ಳಾರಿಯ ವಿಮ್್ಸ ಆಸ್ಪತ್ರೆಯಲ್ಲಿಯೇ 293 ಹಸುಳೆಗಳು ಮೃತಪಟ್ಟಿರುವುದು ಆತಂಕ ಮೂಡಿಸಿದೆ. ದಿನಕ್ಕೆ ಸರಾಸರಿ ಮೂರು ಹಸುಗೂಸುಗಳು ಜೋಡಿ ಜಿಲ್ಲೆಯಲ್ಲಿ ಇಹಲೋಕ ತ್ಯಜಿಸುತ್ತಿವೆ. ಹೀಗಿದ್ದರೂ ಆರೋಗ್ಯ ಇಲಾಖೆ ಕಾಳಜಿ ತೋರುತ್ತಿಲ್ಲ ಎಂಬ ಆರೋಪ ಕೇಳಿಬರುತ್ತಿದೆ. ಗ್ರಾಮೀಣ ಭಾಗದ ಗರ್ಭಿಣಿಯರು ಆಸ್ಪತ್ರೆಗೆ ಬರುವ ಮುನ್ನವೇ ಹಲವು ಕಂದಮ್ಮಗಳು ಕಣ್ಮುಚ್ಚುತ್ತಿವೆ. ಗಣಿನಾಡಿನಲ್ಲಿ ಕಳೆದ ಎಂಟು ತಿಂಗಳ ಅವಧಿಯಲ್ಲಿ ಶಿಶುಗಳು ದುರ್ಮರಣ ಹೊಂದಿರುವುದನ್ನು ಆರ್​ಸಿಎಚ್ ಅಧಿಕಾರಿ ಅನಿಲ್ ಕುಮಾರ್ ಖಚಿತ ಪಡಿಸಿದ್ದಾರೆ.

ಹಸುಗೂಸುಗಳ ಸಾವಿನ ಪ್ರಮಾಣ ಕಡಿಮೆ ಮಾಡಲು ಹಲವು ಯೋಜನೆಗಳೇನೋ ಇವೆ. ಅಪೌಷ್ಟಿಕತೆ, ಕಡಿಮೆ ತೂಕ, ಪ್ರಿಮೆಚ್ಯೂರ್, ಸೋಂಕು, ಹೆರಿಗೆ ಸಂದರ್ಭದಲ್ಲಿ ತಾಯಂದಿರ ಆರೋಗ್ಯದಲ್ಲಿ ಏರುಪೇರು ಇತ್ಯಾದಿ ಕಾರಣಗಳಿಂದ ಹಸುಗೂಸುಗಳು ಮೃತಪಡುತ್ತಿವೆ. ಸೂಕ್ತ ಚಿಕಿತ್ಸೆ, ಆರೈಕೆಯಿಂದ ಶಿಶುಗಳ ಸಾವಿನ ಸಂಖ್ಯೆ ಕಡಿಮೆ ಮಾಡಲು ಇಲಾಖೆ ಇಚ್ಛಾಶಕ್ತಿ ತೋರಬೇಕಿದೆ.

ಇತರ ಜಿಲ್ಲೆಗಳ ಸ್ಥಿತಿ

• ಕಳೆದ ಏಪ್ರಿಲ್​ನಿಂದ ಇಲ್ಲಿಯ ತನಕ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ 187 ಹಾಗೂ ಉಡುಪಿಯಲ್ಲಿ 83 ಶಿಶುಗಳು ಸಾವನ್ನಪ್ಪಿದ್ದಾರೆ. ಅವಧಿಪೂರ್ವ ಜನನ ಮತ್ತು ಜನ್ಮಜಾತ ನ್ಯೂನತೆಗಳಿಂದ ಸಾವು ಸಂಭವಿಸುತ್ತವೆ. ಅಪೌಷ್ಟಿಕತೆಯಿಂದ ಸಂಭವಿಸುವ ಸಾವುಗಳು ಕರಾವಳಿಯಲ್ಲಿ ಕಡಿಮೆ.
• ಕೊಪ್ಪಳ ಜಿಲ್ಲೆಯಲ್ಲಿ ಕಳೆದ ಒಂದು ವರ್ಷದಲ್ಲಿ 317 ಶಿಶುಗಳ ಮರಣವಾಗಿದೆ. ಕಡಿಮೆ ತೂಕ, ಅವಧಿಪೂರ್ವ ಹೆರಿಗೆ, ಅಪೌಷ್ಟಿಕತೆ, ಗರ್ಭ ಧರಿಸಿದಾಗ ಕಾಳಜಿ ವಹಿಸದಿರುವುದು, ರಕ್ತಹೀನತೆ ಸೇರಿ ಇತರ ಕಾರಣಗಳಿಂದ ಶಿಶುಮರಣ ಸಂಭವಿಸುತ್ತಿದೆ.
• ರಾಯಚೂರು ಜಿಲ್ಲೆಯಲ್ಲಿ ಕಳೆದ ಒಂದು ವರ್ಷದಲ್ಲಿ 256 ಶಿಶುಗಳ ಮರಣವಾಗಿದೆ. ಅವಧಿಪೂರ್ವ ಹೆರಿಗೆ, ರಕ್ತಹೀನತೆ ಸೇರಿ ಇತರ ಕಾರಣಗಳಿಂದ ಶಿಶುಮರಣ ಸಂಭವಿಸಿದೆ.
• ಚಿತ್ರದುರ್ಗದಲ್ಲಿ ಜನವರಿಯಿಂದ ಕಳೆದ ನವೆಂಬರ್ ಅಂತ್ಯದವರೆಗೆ 162 ನವಜಾತ ಶಿಶುಗಳ ಮರಣವಾಗಿದೆ.
• ಬಾಗಲಕೋಟೆ ಜಿಲ್ಲೆಯಲ್ಲಿ ಕಳೆದ 8 ತಿಂಗಳಿನಿಂದ ಪ್ರತಿ ತಿಂಗಳು ಸರಾಸರಿ 7 ನವಜಾತ ಶಿಶುಗಳು ಮೃತಪಡುತ್ತಿವೆ. * ವಿಜಯಪುರ ಜಿಲ್ಲೆಯಲ್ಲಿ ಕಳೆದ ಒಂದು ವರ್ಷದಲ್ಲಿ 226 ಶಿಶುಗಳ ಮರಣವಾಗಿದೆ. ಅವಧಿಪೂರ್ವ ಹೆರಿಗೆ, ರಕ್ತಹೀನತೆ ಸೇರಿ ಇತರ ಕಾರಣಗಳಿಂದ ಶಿಶುಮರಣ ಸಂಭವಿಸಿದೆ.
• ದಾವಣಗೆರೆ ಜಿಲ್ಲಾಸ್ಪತ್ರೆಯಲ್ಲಿ ತಿಂಗಳಿಗೆ 8ರಿಂದ10 ಸಾವು ಸಂಭವಿಸುತ್ತವೆ. ಕಡಿಮೆ ತೂಕ ಇರುವುದು, ಅವಧಿ ತುಂಬುವ ಮುಂಚೆ ಹೆರಿಗೆಯಾಗುವುದು, ಮಗು ಜನಿಸಿದಾಗ ಉಸಿರು ತೆಗೆದುಕೊಳ್ಳದೇ ಇರುವುದು, ನಂಜಾಗುವಿಕೆ ಇವು ಪ್ರಮುಖ ಕಾರಣಗಳು.
• ಚಿತ್ರದುರ್ಗ ಜಿಲ್ಲೆಯಲ್ಲಿ 2021 ಏಪ್ರಿಲ್​ನಿಂದ ಕಳೆದ ನವೆಂಬರ್ ಅಂತ್ಯದವರೆಗೆ ಜಿಲ್ಲೆಯಲ್ಲಿ 162 ನವಜಾತ ಶಿಶುಗಳ ಮರಣವಾಗಿದೆ.

ಬಳ್ಳಾರಿ ಮತ್ತು ವಿಜಯನಗರ ಜಿಲ್ಲೆ ವ್ಯಾಪ್ತಿಯಲ್ಲಿ ಕಳೆದ ಎಂಟು ತಿಂಗಳಲ್ಲಿ ಒಟ್ಟು 30,835 ಮಕ್ಕಳು ಜನಿಸಿದ್ದು, ಇದರಲ್ಲಿ ಒಂದು ವರ್ಷದೊಳಗಿನ 343 ಮಕ್ಕಳು ಮರಣ ಹೊಂದಿವೆ. ಜಿಲ್ಲೆಯಲ್ಲಿ ಪ್ರತಿ 1000 ಜೀವಂತ ಜನನಕ್ಕೆ ಈ ಮೊದಲು ಇದ್ದ 20ಕ್ಕೂ ಹೆಚ್ಚು ಮರಣ ಪ್ರಮಾಣವು ಪ್ರಸ್ತುತ 12ಕ್ಕೆ ಇಳಿದಿದೆ. ತಾಯಿ ಮತ್ತು ಮಗುವಿನ ಸೇವೆಗೆ ಸಂಬಂಧಿಸಿದಂತೆ ವೈದ್ಯಕೀಯ ಸೌಲಭ್ಯ ಮತ್ತು ತಜ್ಞ ವೈದ್ಯರ ಕೊರತೆ ಇಲ್ಲ. | ಡಾ.ಎಚ್.ಎಲ್.ಜನಾರ್ದನ ಡಿಎಚ್​ಒ, ಬಳ್ಳಾರಿ ಬಳ್ಳಾರಿ ಹಾಗೂ ವಿಜಯನಗರ ಜಿಲ್ಲೆಗಳಲ್ಲಿ ಶಿಶು ಮರಣ ಪ್ರಮಾಣ ಹೆಚ್ಚುತ್ತಿರುವುದು ಗಮನಕ್ಕೆ ಬಂದಿದೆ. ಅಪೌಷ್ಟಿಕತೆಯಿಂದಲೇ ಸಾವು ಹೆಚ್ಚುತ್ತಿದೆ ಎಂಬುದು ಸರಿಯಲ್ಲ. ಅಪೌಷ್ಟಿಕತೆ ನಿವಾರಣೆಗೆ ಹಲವು ಕಾರ್ಯಕ್ರಮ ಹಾಕಿಕೊಳ್ಳಲಾಗಿದೆ. ಶಿಶು ಮರಣ ಹೆಚ್ಚಳದ ಕುರಿತು ತನಿಖೆ ನಡೆಸಿ ವರದಿ ಪಡೆಯಲಾಗುವುದು. | ಹಾಲಪ್ಪ ಆಚಾರ್ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಸಚಿವ

https://www.vijayavani.net/ashwini-puneeth-rajkumar-returned-advance-amount-to-this-producer/

https://www.vijayavani.net/after-quarrel-with-wife-doctor-burnt-alive-and-lost-life/

https://www.vijayavani.net/person-shot-himself-with-pistol-and-lost-life/