16 ಆಕಳು, 2 ಹೋರಿ ಮಾರಾಟ

ಬಂಕಾಪುರ: ಪಟ್ಟಣದ ಖಿಲಾರಿ ತಳಿಯ ಗೋವು ಸಂವರ್ಧನಾ ಕೇಂದ್ರದಲ್ಲಿ ಹರಾಜು ಪ್ರಕ್ರಿಯೆ ಮೂಲಕ ಜಾನುವಾರುಗಳನ್ನು ಗುರುವಾರ ಮಾರಾಟ ಮಾಡಲಾಯಿತು.

ಕಳೆದ ಸಾಲಿನಲ್ಲಿ ನಡೆದ ಸಾರ್ವಜನಿಕ ಬಹಿರಂಗ ಹರಾಜಿನಲ್ಲಿ ವಿಲೇವಾರಿ ಆಗದೇ ಉಳಿದ ಜಾನುವಾರುಗಳನ್ನು ಕೇಂದ್ರದ ಅಧಿಕಾರಿಗಳು ಸರ್ಕಾರದ ಆದೇಶದ ಮೇರೆಗೆ ನೊಂದಾಯಿತ ಗೋ ಶಾಲೆ ಮತ್ತು ಸಂಸ್ಥೆಗಳಿಗೆ 16 ಆಕಳು ಮತ್ತು ಎರಡು ಹೋರಿಗಳನ್ನು ಹರಾಜಿನ ಮೂಲಕ ಮಾರಾಟ ಮಾಡಿದರು.

ಹರಾಜು ಪ್ರಕ್ರಿಯೆಯಲ್ಲಿ ಒಂದು ಸಂಸ್ಥೆ ಎರಡು ಗೋಶಾಲೆಗಳು ಪಾಲ್ಗೊಂಡಿದ್ದವು. ಇವುಗಳಲ್ಲಿ ಬಾಲೆಹೊಸೂರ ದಿಂಗಾಲೇಶ್ವರ ಮಠದ ಕುಮಾರೇಶ್ವರ ಜೀವ ವಿಕಾಸನ ಟ್ರಸ್ಟ್ ಗೋಶಾಲೆ ಎಂಟು ಆಕಳು, ಒಂದು ಹೋರಿ, ದಾವಣಗೆರೆ ಹೆಬ್ಬಾಳ ಮಠದ ಗೋಶಾಲೆ ಐದು ಆಕಳು, ಒಂದು ಹೋರಿ ಹಾಗೂ ಬೆಳಗಾವಿಯ ಯುನೈಟೆಡ್ ಸಮಾಜ ಕಲ್ಯಾಣ ಟ್ರಸ್ಟ್​ಗೆ ಮೂರು ಆಕಳುಗಳನ್ನು ಮಾರಾಟ ಮಾಡಲಾಯಿತು.

ಗೋವು ತಳಿ ಸಂವರ್ಧನಾ ಕೇಂದ್ರದ ಜಂಟಿ ನಿರ್ದೇಶಕ ಡಾ. ಜೆ. ಪಂಪಾಪತಿ, ಬಂಕಾಪುರ ಕೇಂದ್ರದ ಉಪನಿರ್ದೇಶಕ ಡಾ. ಬಸವರಾಜ ಹಿರೇಮಠ, ಕೃಷಿ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ಡಾ. ಅನೀಲ ಎಸ್. ಪಾಟೀಲ, ಜ್ಯೋತಿ ಹಿರೇಮಠ, ಬಿ.ಎಚ್. ಬ್ಯಾಡಗಿ, ಕೃಷ್ಣಾ ನಾಯಕ ಇದ್ದರು.