11ರವರೆಗೆ 'ರಾಷ್ಟ್ರೀಯ ಅಂಚೆ ಸಪ್ತಾಹ'; ಜಿಪಿಒ ವತಿಯಿಂದ 'ಗ್ರಾಹಕರ ಭೇಟಿ' ಕಾರ್ಯಕ್ರಮ

ಬೆಂಗಳೂರು: ಭಾರತೀಯ ಅಂಚೆ ಇಲಾಖೆ 11ರವರೆಗೆ 'ರಾಷ್ಟ್ರೀಯ ಅಂಚೆ ಸಪ್ತಾಹ' ಆಚರಿಸುತ್ತಿದೆ. 'ಟಪಾಲುಗಳು ಮತ್ತು ಪಾರ್ಸೆಲ್​' ದಿನದ ಹಿನ್ನೆಲೆ ಬೆಂಗಳೂರು ಜನರಲ್​ ಅಂಚೆ ಕಚೇರಿ (ಜಿಪಿಒ) ವತಿಯಿಂದ ಸೋಮವಾರ ನಗರದ ಹೋಟೆಲ್​ನಲ್ಲಿ 'ಗ್ರಾಹಕರ ಭೇಟಿ' (ಕಸ್ಟಮರ್​ ಮೀಟ್​) ಕಾರ್ಯಕ್ರಮ ಆಯೋಜಿಸಿತ್ತು.

ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿದ್ದ ಗ್ರಾಹಕರು, ಅಂಚೆ ಇಲಾಖೆಗೆ ಅಗತ್ಯ ಸಲಹೆಗಳನ್ನು ನೀಡಿದರು. ಇಲಾಖೆಯ ಗುಣಮಟ್ಟದ ಸೇವೆ ಗ್ರಾಹಕರ ವಿಶ್ವಾಸಕ್ಕೆ ಕಾರಣವಾಗಿದೆ. ಕೊರಿಯರ್​ ವಿಭಾಗದ ಕಾರ್ಯವ್ಯಾಪ್ತಿ ವಿಸ್ತಾರವಾಗುತ್ತಿದೆ. ಪ್ರಸ್ತುತ 110 ದೇಶಗಳಿಗೆ ಪಾರ್ಸೆಲ್​ ಕಳುಹಿಸುತ್ತಿದ್ದೇವೆ ಎಂದು ಅಂಚೆ ಇಲಾಖೆ ಕರ್ನಾಟಕ ವೃತ್ತದ ಮುಖ್ಯ ಪೋಸ್ಟ್​ ಮಾಸ್ಟರ್​ ಎಸ್​. ರಾಜೇಂದ್ರಕುಮಾರ್​ ತಿಳಿಸಿದರು.

ಅತ್ಯಾಧುನಿಕ ತಂತ್ರಜ್ಞಾನ ಸೌಲಭ್ಯಗಳನ್ನು ಬಳಸಿಕೊಂಡು ಅಂಚೆ ಸೇವೆ ಉನ್ನತಿಕರಿಸಲಾಗುತ್ತಿದೆ. ಸಂಪರ್ಕ ವ್ಯಾಪ್ತಿ ಹೆಚ್ಚುತ್ತಿರುವುದು ಉತ್ತಮ ಬೆಳವಣಿಗೆಯಾಗಿದೆ. ಮುಂದಿನ ಒಂದು ವರ್ಷದಲ್ಲಿ ಐಟಿ ಕಾರಿಡಾರ್​ ಹಾಗೂ ಜನಸಂಖ್ಯೆ ಆಧರಿಸಿ ಪ್ರಮುಖ ಸ್ಥಳಗಳಲ್ಲಿ "ಪಾರ್ಸೆಲ್​ ಡೆಲಿವರಿ ಬಾಕ್ಸ್​'ಗಳನ್ನು ಅಳವಡಿಸಲು ಉದ್ದೇಶಿಸಿದ್ದೇವೆ. ಮುಖ್ಯವಾಗಿ ಗುಣಮಟ್ಟದ ಸೇವೆ ನೀಡುವ ನಿಟ್ಟಿನಲ್ಲಿ ಅಗತ್ಯಕ್ಕೆ ತಕ್ಕಂತೆ ಬದಲಾವಣೆಗಳನ್ನು ಅಂಚೆ ಇಲಾಖೆ ಮಾಡುತ್ತಿದೆ ಎಂದರು. ಸರ್ಕಾರದ ವಿವಿಧ ಇಲಾಖೆಗಳೊಂದಿಗೆ ಸ್ಪೀಡ್​ ಪೋಸ್ಟ್​ ಒಪ್ಪಂದ ಮಾಡಿಕೊಂಡಿದ್ದೇವೆ. ಮುಖ್ಯವಾಗಿ ರಾಜ್ಯ ದ್ವಿದಳ ಧಾನ್ಯಗಳ ಅಭಿವೃದ್ಧಿ ಮಂಡಳಿ ಜತೆ ಒಪ್ಪಂದ ಮಾಡಿಕೊಂಡಿದ್ದು, ಇದರಿಂದ ಬೇಳುಕಾಳುಗಳು ಹಾಗೂ ಬೀಜಗಳನ್ನು ರೈತರ ಮನೆಬಾಗಿಲಿಗೆ ತಲುಪಿಸಲು ಸಾಧ್ಯವಾಗಲಿದೆ. ಯೋಜನೆಗೆ ಶ್ರೀದಲ್ಲಿ ಚಾಲನೆ ಸಿಗಲಿದೆ. ರಾಜ್ಯ ಬೀಜ ನಿಗಮ ನಿಯಮಿತದೊಂದಿಗೆ 'ಬಿಜಿನೆಸ್​ ಪಾರ್ಸೆಲ್​' ಒಪ್ಪಂದ ಮಾಡಲಾಗಿದೆ. ಇದರಿಂದ ರೈತರಿಗೆ ನೇರವಾಗಿ ಗ್ರಾಹಕರಿಗೆ ಮಾವು ಮಾರಾಟ ಮಾಡಲು ಸಾಧ್ಯವಾಗುತ್ತಿದೆ. ಕಳೆದ ಐದು ವರ್ಷದಲ್ಲಿ 350 ಟನ್​ ಮಾವು ಸರಬರಾಜು ಮಾಡಲಾಗಿದೆ ಎಂದು ತಿಳಿಸಿದರು.

8ರಂದು 'ಅಂಚೆ ಚೀಟಿಗಳ ಸಂಗ್ರಹ ದಿನ', 9ರಂದು 'ವಿಶ್ವ ಅಂಚೆ ದಿನ', 10ರಂದು 'ಅಂತ್ಯೋದಯ ದಿವಸ್​' ಮತ್ತು 11ರಂದು 'ವಿಟ್ಟಿಯ ಸಶಕ್ತೀಕರಣ ದಿವಸ್​' ಆಚರಿಸಲಾಗುತ್ತಿದೆ.