ಬೌದ್ಧರ ಕೆತ್ತನೆಗಳ ವಿರೂಪ: ಪಾಕ್‌ಗೆ ತೀಕ್ಷ್ಣ ಸಂದೇಶ ರವಾನಿಸಿದ ಭಾರತ

ನವದೆಹಲಿ: ಪಾಕಿಸ್ತಾನ ಆಕ್ರಮಿತ ಪ್ರದೇಶದಲ್ಲಿರುವ ಗಿಲ್ಗಿಟ್-ಬಾಲ್ಟಿಸ್ತಾನದಲ್ಲಿ ಬಂಡೆಗಲ್ಲುಗಳ ಮೇಲಿರುವ ಪ್ರಾಚೀನ ಬೌದ್ಧ ಧರ್ಮದ ಕೆತ್ತನೆ, ಚಿತ್ರಕಲೆಗಳನ್ನು ವಿರೂಪಗೊಳಿಸಿರುವುದಕ್ಕೆ ಭಾರತ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ.

ಈ ಕೃತ್ಯವನ್ನು ಬಲವಾಗಿ ಖಂಡಿಸಿರುವ ಭಾರತ, ಪ್ರಾಚ್ಯವಸ್ತು ಪರಂಪರೆಯ ಮಹತ್ವವಿರುವ ಆ ಪ್ರದೇಶಕ್ಕೆ ಹೋಗಲು ಮತ್ತು ಅಲ್ಲಿನ ಕೆತ್ತನೆ-ಚಿತ್ರಕಲೆಗಳನ್ನು ಮೊದಲಿದ್ದ ಸ್ಥಿತಿಗೆ ತರಲು ತಜ್ಞರಿಗೆ ಅವಕಾಶ ನೀಡಬೇಕು ಎಂದು ಒತ್ತಾಯಿಸಿದೆ.

ಇದನ್ನೂ ಓದಿ  ಚೀನಾ ವಿಮಾನಗಳಿಗೆ ಪ್ರವೇಶ ನಿಷೇಧಿಸಿದ ಅಮೆರಿಕ!

ಅಕ್ರಮವಾಗಿ ಆಕ್ರಮಿಸಿಕೊಂಡಿರುವ ಆ ಪ್ರದೇಶವನ್ನು ತೆರವುಗೊಳಿಸಬೇಕು. ಅಲ್ಲಿನ ಜನರಿಗೆ ರಾಜಕೀಯ, ಆರ್ಥಿಕ ಮತ್ತು ಸಾಂಸ್ಕೃತಿಕ ಹಕ್ಕುಗಳನ್ನು ಮರಳಿ ನೀಡಬೇಕು ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ಅಧಿಕೃತ ವಕ್ತಾರ ಅನುರಾಗ್ ಶ್ರೀವಾಸ್ತವ ಬುಧವಾರ ಪಾಕ್ ಸರ್ಕಾರಕ್ಕೆ ಒತ್ತಾಯಿಸಿದ್ದಾರೆ.

ಬೌದ್ಧರ ಕೆತ್ತನೆಗಳನ್ನು ವಿರೂಪಗೊಳಿಸಿರುವುದು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆದ ಬಳಿಕ ಭಾರತ ಈ ಪ್ರತಿಕ್ರಿಯೆ ನೀಡಿದೆ. ಬೌದ್ಧ ಕಲೆಯ ಮೇಲೆ ಪಾಕಿಸ್ತಾನಿ ಧ್ವಜ, ಘೋಷಣೆ ಮುಂತಾದವುಗಳನ್ನು ಪೇಂಟ್ ಮಾಡಿರುವುದು ಕೆಲವು ದಿನಗಳ ಹಿಂದೆ ಬೆಳಕಿಗೆ ಬಂದಿತ್ತು. ಮೂಲಭೂತವಾದಿಗಳು ಅಥವಾ ಪಾಕ್ ಸೈನಿಕರು ಈ ಕೃತ್ಯ ಎಸಗಿರಬಹುದೆಂದು ಹೇಳಲಾಗಿದೆ. ಈ ಕೆತ್ತನೆಗಳು ಕ್ರಿ.ಶ. 800ಕ್ಕಿಂತ ಪ್ರಾಚೀನವಾದವುಗಳು ಎನ್ನಲಾಗಿದೆ.

https://www.vijayavani.net/covid-19-status-report-gok/