ಒಂದು ದಿನದ ಮಟ್ಟಿಗೆ ಮಾತ್ರ ಬಿಡುಗಡೆಯಾಗಿದೆ 'ಡಿಡಿಎಲ್​ಜೆ' ... ಯಾಕೆ ಗೊತ್ತಾ?

ಮುಂಬೈ: ಭಾರತದಲ್ಲಿ ಅತೀ ಹೆಚ್ಚು ಸಮಯ ಪ್ರದರ್ಶನವಾದ ಚಿತ್ರಗಳ ಪಟ್ಟಿಯಲ್ಲಿ ಶಾರುಖ್​ ಖಾನ್​ ಮತ್ತು ಕಾಜೋಲ್​ ಅಭಿನಯದ ‘ದಿಲ್​ವಾಲೇ ದುಲ್ಹನಿಯಾ ಲೇ ಜಾಯೇಂಗೆ’ ಮೊದಲ ಸ್ಥಾನದಲ್ಲಿ ನಿಲ್ಲುತ್ತದೆ. ಈ ಚಿತ್ರ 1995ರ ಅಕ್ಟೋಬರ್​ 20ರಂದು ಬಿಡುಗಡೆಯಾಗಿ ಭರ್ಜರಿ ಯಶಸ್ಸು ಮತ್ತು ಜನಪ್ರಿಯತೆಗಳೆರಡನ್ನೂ ಪಡೆದಿತ್ತು. ಮುಂಬೈನ ಮರಾಠಾ ಮಂದಿರದಲ್ಲಿ ಚಿತ್ರಮಂದಿರವೊಂದರಲ್ಲೇ ಈ ಚಿತ್ರ ಸತತವಾಗಿ 24 ವರ್ಷಗಳಿಗೂ ಹೆಚ್ಚು ಸಮಯ ಪ್ರದರ್ಶನ ಕಂಡಿತ್ತು.

ಇದನ್ನೂ ಓದಿ: ‘ಪಠಾಣ್​’ ಜಿಂದಾ ಹೈ; ಶಾರೂಖ್​ ಖಾನ್​ ಹೊಸ ಚಿತ್ರದ ಟೀಸರ್​ ಬಂತು

ಈಗ್ಯಾಕೆ ಈ ವಿಷಯ ಎಂದರೆ, ‘ದಿಲ್​ವಾಲೇ ದುಲ್ಹನಿಯಾ ಲೇ ಜಾಯೇಂಗೆ’ ಚಿತ್ರವು ದೇಶಾದ್ಯಂತ ಇಂದು ಮಾತ್ರ ಹಲವು ಚಿತ್ರಮಂದಿರಗಳಲ್ಲಿ ವಿಶೇಷವಾಗಿ ಬಿಡುಗಡೆಯಾಗಿದೆ. ಅದಕ್ಕೆ ಕಾರಣವೇನು ಗೊತ್ತಾ? ಶಾರೂಖ್​ ಖಾನ್​ ಹುಟ್ಟುಹಬ್ಬ. ಇಂದು ತಮ್ಮ 57ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳುತ್ತಿರುವ ಶಾರೂಖ್​ ಖಾನ್​ ಅವರಿಗೆ ಉಡುಗೊರೆಯಾಗಿ ಪಿವಿಆರ್​ ಸಿನಿಮಾಸ್​ 18 ನಗರಗಳಲ್ಲಿ 28 ಚಿತ್ರಮಂದಿರಗಳಲ್ಲಿ ಈ ಚಿತ್ರವನ್ನು ವಿಶೇಷವಾಗಿ ಬಿಡುಗಡೆ ಮಾಡಿದೆ.

ಮುಂಬೈ, ದೆಹಲಿ, ಬೆಂಗಳೂರು, ಚೆನ್ನೈ, ಹೈದರಾಬಾದ್​, ಕೊಲ್ಕತ್ತಾ ಮುಂತಾದ ಕಡೆಎ ಈ ಚಿತ್ರ ಬಿಡುಗಡೆಯಾಗುತ್ತಿದ್ದು, ಪಿವಿಆರ್​ ಈ ಚಿತ್ರವನ್ನು ಬಿಡುಗಡೆ ಮಾಡುತ್ತಿರುವುದಕ್ಕೂ ಒಂದು ಕಾರಣವಿದೆ. 1995ರಲ್ಲಿ ದೆಹಲಿಯ ವಸಂತ್​ ವಿಹಾರ್​ನಲ್ಲಿ ಪಿವಿಆರ್​ ಪ್ರಾರಂಭವಾದಾಗ, ಬಿಡುಗಡೆಯಾದ ಮೊದಲ ಚಿತ್ರವೆಂದರೆ ಅದು ‘ದಿಲ್​ವಾಲೇ ದುಲ್ಹನಿಯಾ ಲೇ ಜಾಯೇಂಗೆ’. ಆ ವಿಶ್ವಾಸಕ್ಕೆ ಶಾರೂಖ್​ ಖಾನ್​ ಹುಟ್ಟುಹಬ್ಬದ ಪ್ರಯುಕ್ತ ಒಂದು ದಿನದ ಮಟ್ಟಿಗೆ ಇಡೀ ದೇಶದಲ್ಲಿ ಚಿತ್ರವನ್ನು ಬಿಡುಗಡೆ ಮಾಡಲಾಗುತ್ತಿದೆ.

ಯಶ್​ ಚೋಪ್ರಾ ನಿರ್ಮಾಣದ ಮತ್ತು ಅವರ ಮಗ ಆದಿತ್ಯ ಚೋಪ್ರಾ ನಿರ್ದೇಶನದ ಈ ಚಿತ್ರದಲ್ಲಿ ಶಾರೂಖ್ ಖಾನ್​​, ಕಾಜೋಲ್​, ಅನುಪಮ್​ ಖೇರ್​, ಅಮರೀಶ್​ ಪುರಿ, ಫರೀದಾ ಜಲಾಲ್​, ಮಂದಿರಾ ಬೇಡಿ ಸೇರಿ ಹಲವರು ನಟಿಸಿದ್ದರು.

ಇದನ್ನೂ ಓದಿ: ನವೆಂಬರ್​ನಲ್ಲಿ ಸಿನಿಮಾ ಹಬ್ಬ; 20ಕ್ಕೂ ಹೆಚ್ಚು ಕನ್ನಡ ಚಿತ್ರಗಳ ಬಿಡುಗಡೆ!

ಇನ್ನು, ಶಾರೂಖ್​ ಹುಟ್ಟುಹಬ್ಬದ ಅಂಗವಾಗಿ ಡಿಸ್ನಿ-ಹಾಟ್​ಸ್ಟಾರ್​ ಸಂಸ್ಥೆಯು ಇನ್ನೊಂದು ಉಡುಗೊರೆಯನ್ನು ನೀಡಿದೆ. ಶಾರೂಖ್​ ಅತಿಥಿ ಪಾತ್ರದಲ್ಲಿ ನಟಿಸಿರುವ 'ಬ್ರಹ್ಮಾಸ್ತ್ರ' ಚಿತ್ರವು ಇದೇ ನಾಲ್ಕರಂದು ಡಿಸ್ನಿ-ಹಾಟ್​ಸ್ಟಾರ್​ನಲ್ಲಿ ಸ್ಟ್ರೀಮ್​ ಆಗಲಿದೆ. ಆದರೆ, ಶಾರೂಖ್​ ಹುಟ್ಟುಹಬ್ಬದ ಪ್ರಯುಕ್ತ ಅವರ ಅಭಿನಯದ ಭಾಗದ ಕೆಲವು ನಿಮಿಷಗಳಷ್ಟು ದೃಶ್ಯಗಳನ್ನು ಡಿಸ್ನಿ-ಹಾಟ್​ಸ್ಟಾರ್​ ತನ್ನ ವೆಬ್​ಸೈಟ್​ ಮತ್ತು ಯೂಟ್ಯೂಬ್​ ಚಾನಲ್​ಗಳಲ್ಲಿ ಬಿಡುಗಡೆ ಮಾಡಿದೆ.

https://www.vijayavani.net/uttarakaanda-to-be-launched-on-november-06th/