ಕೋವಿಡ್-19 ಅಥವಾ ಕರೊನಾದ ಸಮಸ್ಯೆ ಪ್ರಾರಂಭವಾದಾಗಿನಿಂದ ಹಲವಾರು ಔಷಧಗಳು, ವಿಧಾನಗಳು, ಚಿಕಿತ್ಸೆಗಳು ಫಲಕಾರಿಯಾಗಬಹುದು ಎಂದು ಊಹಿಸಿದರೂ ಇಲ್ಲಿಯವರೆಗೆ ಯಾವುದೂ ಸರಿಯಾಗಿ ಫಲ ನೀಡಿಲ್ಲ. ಆದರೆ ಇವುಗಳಲ್ಲಿ ಕೆಲವು ವಿಧಾನಗಳು ಹೇಗೆಂದರೆ - ನಾವು ಅವನ್ನು ಅನುಸರಿಸುವುದರಿಂದ ಕರೊನಾದ ಸಮಸ್ಯೆ ದೂರವಾಗುವುದು ಖಚಿತವಿಲ್ಲವಾದರೂ ನಮ್ಮ ಆರೋಗ್ಯ ವೃದ್ಧಿಯಾಗುತ್ತದೆ. ಅಂಥವುಗಳಲ್ಲಿ ಒಂದು ಜಲನೇತಿ. ಯೋಗಶಾಸ್ತ್ರದಲ್ಲಿ ಹೇಳಿದ ಆರು ರೀತಿಯ ಶುದ್ಧಿಕ್ರಿಯೆಗಳಲ್ಲಿ ಇದೂ ಒಂದು. ‘ಹಠಯೋಗ ಪ್ರದೀಪಿಕಾ’ ಗ್ರಂಥದಲ್ಲಿ, ‘ಕಪಾಲಶೋಧಿನೀ ಚೈವ ದಿವ್ಯದೃಷ್ಟಿಪ್ರದಾಯಿನೀ | ಜತ್ರೂರ್ಧ್ವಜಾತ ರೋಗೌಘಂ ನೇತಿರಾಶು ನಿಹಂತಿ ಚ || ಎಂದಿದ್ದಾರೆ. ‘ನೇತಿಯು ನೆಗಡಿ, ಶೀತ ಹಾಗೂ ಇತರ ಕಫ ರೋಗಗಳನ್ನು ದೂರ ಮಾಡುತ್ತದೆ. ನೇತ್ರವಿಕಾರ, ಕೂದಲು ಬೆಳ್ಳಗಾಗುವುದು, ತಲೆನೋವು ಮೊದಲಾದ ಕಾಯಿಲೆಗಳಲ್ಲಿ ನೇತಿಯು ಅತ್ಯಂತ ಲಾಭಪ್ರದ. ಅಂದರೆ ಕತ್ತಿನ ಮೇಲಿನ ಎಲ್ಲ ರೋಗಗಳನ್ನು ವಾಸಿ ಮಾಡುತ್ತದೆ’ ಎಂಬುದು ತಾತ್ಪರ್ಯ.
