ಈ ದೇವರಿಗೆ ಹಣ್ಣು-ಕಾಯಿ ಬೇಡವಂತೆ!... ಅದಕ್ಕೇ ಏಡಿಗಳನ್ನು ಅರ್ಪಿಸುತ್ತಾರೆ ಭಕ್ತರು!

ಸೂರತ್: ಸಾಮಾನ್ಯವಾಗಿ ದೇವರಿಗೆ ಹಣ್ಣು, ಕಾಯಿ, ಹಾಲು, ಸಿಹಿ ತಿಂಡಿ ನೈವೇದ್ಯ ಮಾಡುವುದು ವಾಡಿಕೆ. ಆದರೆ ಈ ಶಿವದೇಗುಲದಲ್ಲಿ ಜೀವಂತ ಏಡಿಗಳನ್ನು ದೇವರಿಗೆ ಅರ್ಪಿಸುತ್ತಾರೆ. ಹೌದು, ಇಂತಹುದೊಂದು ದೇವಾಲಯ ಗುಜರಾತಿನಲ್ಲಿದೆ! ಅದು ಸೂರತ್ ಜಿಲ್ಲೆಯ ಉಮ್ರ ಗ್ರಾಮದಲ್ಲಿರುವ ರಾಮನಾಥ ಶಿವ ಘೇಲಾ ದೇವಸ್ಥಾನ. ಇಲ್ಲಿ ಮಕರ ಸಂಕ್ರಾಂತಿಯ ದಿನ ಶಿವಲಿಂಗಕ್ಕೆ ಜೀವಂತ ಏಡಿಗಳನ್ನು ಅರ್ಪಿಸುವ ಪ್ರತೀತಿ ಬೆಳೆದುಬಂದಿದೆ. ನೂರಾರು ವರ್ಷಗಳಿಂದ ಈ ಪರಂಪರೆ ನಡೆದುಬಂದಿದೆ.

ಇಲ್ಲಿನ ಶಿವಲಿಂಗವನ್ನು ಸ್ವತಃ ಶ್ರೀರಾಮನೇ ಪ್ರತಿಷ್ಠಾಪಿಸಿದ್ದು ಎಂಬ ನಂಬಿಕೆ ಇದೆ. ಒಂದು ದಿನ ಸಾಗರದಂಡೆಯಲ್ಲಿ ಶ್ರೀ ರಾಮನ ಪಾದಗಳ ಮೇಲೆ ಬಂದ ಏಡಿಯೊಂದನ್ನು ನೋಡಿ ಆನಂದಪಟ್ಟು, ದೇವರ ಪೂಜೆಯಲ್ಲಿ ಏಡಿಗೆ ಸ್ಥಾನ ಕೊಟ್ಟನಂತೆ. ಪೂಜೆ ಮಾಡಿದ ನಂತರ, ರಾಮನು ಈ ಶಿವಲಿಂಗಕ್ಕೆ ಏಡಿಗಳನ್ನು ಅರ್ಪಿಸುವವರಿಗೆ ಇಷ್ಟಾರ್ಥಗಳು ಸಿದ್ಧಿಸುವುದಾಗಿ ಹೇಳಿದನಂತೆ. ಆಗಿನಿಂದ ಜನಪ್ರಿಯವಾಗಿದೆ ಈ ರೂಢಿ.

ಏಡಿಗಳನ್ನು ಅರ್ಪಿಸುವುದರಿಂದ ಅದೃಷ್ಟ ಒಲಿಯುತ್ತದೆ. ಸಂಪತ್ತು ಹೆಚ್ಚುವುದರೊಂದಿಗೆ ಆರೋಗ್ಯದ ಸಮಸ್ಯೆಗಳು ನಿವಾರಣೆಯಾತ್ತವೆ ಎಂದು ಭಕ್ತರು ನಂಬಿದ್ದಾರೆ.

ಸಂಕ್ರಾಂತಿಯಂದು ಸಾವಿರಾರು ಸಂಖ್ಯೆಯಲ್ಲಿ ಇಲ್ಲಿಗೆ ಆಗಮಿಸುವ ಭಕ್ತರು ಹಣ್ಣುಕಾಯಿ ಕೊಂಡಂತೆ ಏಡಿಗಳನ್ನು ಕೊಂಡು ದೇವರಿಗೆ ನೀಡುತ್ತಾರೆ. ಮತ್ತೆ ಆ ಏಡಿಗಳ ಗತಿ ಏನು ಎಂದಿರಾ? ದೇವಾಯಲದ ಅಧಿಕಾರಿಗಳು ಅವುಗಳನ್ನೆಲ್ಲಾ ಸಂಗ್ರಹಿಸಿ ಹತ್ತಿರದ ಸಮುದ್ರದಂಡೆಯಲ್ಲಿ ವಾಪಸ್ ಬಿಟ್ಟುಬರುತ್ತಾರಂತೆ.

https://www.vijayavani.net/s-nyayadevate-samsara-madalu-ganda/

https://www.vijayavani.net/if-you-keep-wearing-mask-it-will-be-dangerous-to-your-eyes/