ಶಾರೂಖ್ ಖಾನ್ ಅಭಿನಯದ ‘ಜೀರೋ’ ಚಿತ್ರ ಸೂಪರ್ ಫ್ಲಾಪ್ ಆದ ನಂತರ, ‘ಬಾಲಿವುಡ್ ಬಾದ್ಷಾ’ ಅದ್ಯಾಕೋ ಬೇಸರದಿಂದ ಮನೆಯಲ್ಲಿ ಕುಳಿತುಬಿಟ್ಟರು. ಅವರ ಮುಂದಿನ ಚಿತ್ರ ಯಾವುದು? ಯಾವಾಗ ಶುರುವಾಗುತ್ತದೆ? ಎಂಬ ಹಲವು ಪ್ರಶ್ನೆಗಳು ಅವರ ಅಭಿಮಾನಿಗಳನ್ನು ಕಾಡುತ್ತಲೇ ಇತ್ತು.
ಈ ಮಧ್ಯೆ ‘ಮುನ್ನಾಭಾಯ್ ಎಂ.ಬಿ.ಬಿ.ಎಸ್’, ‘ಥ್ರೀ ಈಡಿಯಟ್ಸ್’, ‘ಪಿಕೆ’ ಖ್ಯಾತಿಯ ರಾಜಕುಮಾರ್ ಹಿರಾನಿ ಜತೆಗೆ ಶಾರೂಖ್ ಖಾನ್ ಸಿನಿಮಾ ಮಾಡುತ್ತಾರೆ ಎಂಬ ಸುದ್ದಿ ಇದ್ದರೂ, ಇಬ್ಬರೂ ಆ ಬಗ್ಗೆ ತುಟಿಕ್ ಪಿಟಿಕ್ ಎಂದಿರಲಿಲ್ಲ. ಕೆಲವು ತಿಂಗಳುಗಳ ಹಿಂದೆ ಶಾರೂಖ್, ರಾಜು ಹಿರಾನಿ ಜತೆಗೆ ಸಿನಿಮಾ ಮಾಡುತ್ತಿರುವ ಹಿಂಟ್ ಕೊಟ್ಟಿದ್ದರು. ಆದರೆ, ಯಾವಾಗ ಶುರು ಎಂದು ಹೇಳಿರಲಿಲ್ಲ.
ಇದನ್ನೂ ಓದಿ: ‘ಪಾರ್ವತಿ’ಯನ್ನು ದತ್ತು ಪಡೆದ ಸೆಂಚುರಿ ಸ್ಟಾರ್ ಶಿವರಾಜ್ಕುಮಾರ್
ಈಗ ಈ ಎಲ್ಲಾ ಪ್ರಶ್ನೆಗಳಿಗೂ ಉತ್ತರ ಸಿಕ್ಕಿದೆ. ಎಲ್ಲಾ ಅಂದುಕೊಂಡಂತೆ ಆಗಿದ್ದರೆ, ಬಹುಶಃ ಈ ವರ್ಷದ ಕೊನೆಯಲ್ಲಿ ಶಾರೂಖ್ ಮತ್ತು ಹಿರಾನಿ ಕಾಂಬಿನೇಷನ್ನ ಚಿತ್ರ ಶುರುವಾಗಿರಬೇಕಿತ್ತು. ಆದರೆ, ಕರೊನಾ ಹಾವಳಿ ಹೆಚ್ಚಿರುವುದರಿಂದ, ಚಿತ್ರ 2021ರ ಏಪ್ರಿಲ್ನಲ್ಲಿ ಶುರುವಾಗಲಿದೆ ಎಂದು ಹೇಳಲಾಗುತ್ತಿದೆ.
ಪ್ರಮುಖವಾಗಿ, ಈ ಚಿತ್ರದ ಬಹುಭಾಗದ ಚಿತ್ರೀಕರಣ ಕೆನಡಾ ಮತ್ತು ಪಂಜಾಬ್ನಲ್ಲಿ ನಡೆಯಲಿದೆಂತೆ. ಇವೆರೆಡರ ಜನವರಿಯಲ್ಲಿ ಲೊಕೇಶನ್ ನೋಡಲಿಕ್ಕೆ ಕೆನಡಾ ಮತ್ತು ಪಂಜಾಬ್ ಕಡೆಗೆ ಹಿರಾನಿ ಮತ್ತು ತಂಡ ಪ್ರಯಾಣ ಬೆಳೆಸಲಿದೆಯಂತೆ. ಆ ನಂತರ ಏಪ್ರಿಲ್ನಿಂದ ಚಿತ್ರೀಕಣ ಶುರುವಾಗಲಿದೆ.
ಇದನ್ನೂ ಓದಿ: ನನ್ನ ಮುಂದಿನ ಚಿತ್ರಕ್ಕೂ ನೀವೇ ಹಾಡ್ತೀರಾ ಅಂತ ನಂಬಿಕೆ ಇದೆ …
ಸದ್ಯಕ್ಕೆ ಹಿರಾನಿ ತಮ್ಮ ತಂಡದವರ ಜತೆಗೆ ಕೂತು, ಪ್ರೀ-ಪ್ರೊಡಕ್ಷನ್ ಕೆಲಸಗಳಲ್ಲಿ ತೊಡಗಿಸಿಕೊಂಡಿದ್ದಾರೆ. ಚಿತ್ರಕಥೆ, ಸಂಭಾಷಣೆ ಮತ್ತು ಸಂಗೀತದ ಕೆಲಸಗಳನ್ನು ಮುಗಿಸಿ, ಆ ನಂತರ ಮುಂದಿನ ವರ್ಷ ಶೂಟಿಂಗ್ ಮಾಡಿ, ಎಲ್ಲಾ ಅಂದುಕೊಂಡಂತೆ ಆದರೆ, 2021ರ ಕೊನೆಗೆ ಈ ಚಿತ್ರವನ್ನು ಬಿಡುಗಡೆ ಮಾಡುವುದಕ್ಕೆ ಪ್ಲಾನ್ ಮಾಡಲಾಗುತ್ತಿದೆ.
ಹಾಗೆ ನೋಡಿದರೆ, ರಾಜಕುಮಾರ್ ಹಿರಾನಿ ಮತ್ತು ಶಾರೂಖ್ ಖಾನ್ 15 ವರ್ಷಗಳ ಹಿಂದೆಯೇ ಜತೆಗೆ ಚಿತ್ರ ಮಾಡಬೇಕಿತ್ತು. ‘ಮುನ್ನಾಭಾಯ್ ಎಂ.ಬಿ.ಬಿ.ಎಸ್’ ಕಥೆಯನ್ನು ಹಿರಾನಿ ಮೊದಲು ತೆಗೆದುಕೊಂಡು ಹೋಗಿದ್ದೇ ಶಾರೂಖ್ ಖಾನ್ ಬಳಿ. ಆದರೆ, ‘ಕಿಂಗ್ ಖಾನ್’ ಅಷ್ಟೇನೂ ಆಸಕ್ತಿ ತೋರಿಸಲಿಲ್ಲವಂತೆ. ಆ ನಂತರ ‘ಥ್ರೀ ಈಡಿಯಟ್ಸ್’ಗೆ ಸಹ ಶಾರೂಖ್ ಅವರನ್ನ ಅಪ್ರೋಚ್ ಮಾಡಿದ್ದಾರೆ ಹಿರಾನಿ. ಆಗಲೂ ಕಾರಣಾಂತರಗಳಿಂದ ವರ್ಕೌಟ್ ಆಗಲಿಲ್ಲ. ಈಗ ಹಿರಾನಿ ಮತ್ತು ಶಾರೂಖ್ ಕೊನೆಗೂ ಜತೆಯಾಗಿ ಕೆಲಸ ಮಾಡಲಿದ್ದಾರೆ ಎಂಬ ವಿಚಾರ ಅವರಿಬ್ಬರ ಅಭಿಮಾನಿಗಳಿಗೆ ಸಾಕಷ್ಟು ಖುಷಿ ನೀಡಿದೆ.
ಕಂಗನಾ ಮೊದಲು ಪದ್ಮಶ್ರೀ ಪ್ರಶಸ್ತಿ ವಾಪಸ್ ಮಾಡ್ಲಿ … ಆದಿತ್ಯ ಪಂಚೋಲಿ ಆಗ್ರಹ