ದಲಿತರಿಗೆ ಪ್ರವೇಶವಿಲ್ಲ: ಸುಳ್ಳು ಸುದ್ದಿ ಹರಿಬಿಟ್ಟ ಕಿಡಿಗೇಡಿಗಳ ವಿರುದ್ಧ ಆದಿಪುರುಷ್​ ಚಿತ್ರತಂಡ ಗರಂ!

ಹೈದರಾಬಾದ್​: ನಟ ಪ್ರಭಾಸ್​ ಅಭಿನಯದ ಆದಿಪುರುಷ್​ ಸಿನಿಮಾದ ಬಿಡುಗಡೆಗೆ ಕ್ಷಣಗಣನೆ ಆರಂಭವಾಗಿದೆ. ಮೊನ್ನೆಯಷ್ಟೇ ಚಿತ್ರತಂಡ ತಿರುಪತಿಯಲ್ಲಿ ಅದ್ಧೂರಿಯಾಗಿ ಪ್ರೀ ರಿಲೀಸ್​ ಈವೆಂಟ್​ ಸಹ ಮಾಡಿದೆ. ಈ ವೇಳೆ ಎಲ್ಲೆಡೆ ಜೈ ಶ್ರೀರಾಮ್​ ಘೋಷಣೆ ಮೊಳಗಿತು. ಚಿತ್ರದ ಟ್ರೈಲರ್ ಸಹ​ ಬಿಡುಗಡೆಯಾಗಿದ್ದು ಮಿಶ್ರ ಪ್ರತಿಕ್ರಿಯೆ ಪಡೆದುಕೊಳ್ಳುತ್ತಿದೆ. ಇದೆಲ್ಲದರ ನಡುವೆ ಆದಿಪುರುಷ್​ ಸಿನಿಮಾಗೆ ಸಂಬಂಧಿಸಿದ ಸುಳ್ಳು ಸುದ್ದಿಯೊಂದು ಎಲ್ಲೆಡೆ ಹರಿದಾಡುತ್ತಿದ್ದು, ಅದಕ್ಕೆ ಚಿತ್ರತಂಡವು ಕೂಡ ಪ್ರತಿಕ್ರಿಯಿಸಿದೆ.

ನಕಲಿ ಪೋಸ್ಟ್​

ಧರ್ಮ ಮತ್ತು ಜಾತಿಗೆ ಆದಿಪುರುಷ್​ ಸಿನಿಮಾವನ್ನು ಲಿಂಕ್​ ಮಾಡಿ ನಕಲಿ ಪೋಸ್ಟ್​ ಒಂದನ್ನು ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಡಲಾಗಿದೆ. ಪೋಸ್ಟ್​ನ ಸಾರಾಂಶ ಹೀಗಿದೆ. ಆದಿಪುರುಷ್​ ಬಿಡುಗಡೆಯಾಗುವ ಚಿತ್ರಮಂದಿರಗಳಿಗೆ ದಲಿತರಿಗೆ ಅನುಮತಿ ನೀಡುವುದಿಲ್ಲ. ರಾಮಾಯಣ ಪಾರಾಯಣ ನಡೆಯುವ ಸ್ಥಳ ಪವಿತ್ರವಾಗಿರಬೇಕು ಎಂಬುದು ನಮ್ಮ ನಂಬಿಕೆಯಾಗಿದ್ದು, ಈ ನಂಬಿಕೆಯನ್ನು ಗೌರವಿಸಿ ಪ್ರಭಾಸ್ ರಾಮನ ಪಾತ್ರ ಮಾಡುತ್ತಿರುವ ಚಿತ್ರಮಂದಿರಗಳಲ್ಲಿ ದಲಿತರಿಗೆ ಪ್ರವೇಶವಿಲ್ಲ ಎಂದು ಪೋಸ್ಟ್​ನಲ್ಲಿ ಬರೆಯಲಾಗಿದೆ ಮತ್ತು ಭಾರೀ ಬಜೆಟ್​ನಲ್ಲಿ ಧರ್ಮಕ್ಕಾಗಿ ನಿರ್ಮಿಸಲಾಗಿರುವ ಸಿನಿಮಾವನ್ನು ಪ್ರತಿಯೊಬ್ಬ ಹಿಂದು ಸಹ ನೋಡಬೇಕೆಂದು ಕರೆ ಕೊಡಲಾಗಿದೆ. ಈ ಪೋಸ್ಟ್ ಅನ್ನು ಯುವಿ ಕ್ರಿಯೇಷನ್ಸ್, ಪೀಪಲ್ಸ್ ಮೀಡಿಯಾ ಫ್ಯಾಕ್ಟರಿ ಹಾಗೂ ಆದಿಪುರುಷ್​ ತಂಡವೇ ರಚಿಸಿದೆ ಎಂದು ಪೋಸ್ಟ್​ನಲ್ಲಿ ವಾದಿಸಲಾಗಿದೆ.

ಇದನ್ನೂ ಓದಿ: 1 ಲಕ್ಷ ರೂ. ಬೇಕಂತೆ! ವಿಡಿಯೋ ರೆಕಾರ್ಡ್​ ಮಾಡಿದ್ದಕ್ಕೆ ಮಹಿಳಾ ಅಧಿಕಾರಿಯಿಂದ ಅನುಚಿತ ವರ್ತನೆ

ಚಿತ್ರತಂಡದ ಸ್ಪಷ್ಟನೆ

ಆದರೆ, ಈ ಪೋಸ್ಟ್​ ಆದಿಪುರುಷ್​ ಚಿತ್ರತಂಡದ ಗಮನಕ್ಕೆ ಬಂದಿದ್ದು, ಖಡಕ್​ ಆಗಿಯೇ ಪ್ರತಿಕ್ರಿಯೆ ನೀಡಿದೆ. ಇದೊಂದು ಸುಳ್ಳು ಸುದ್ದಿಯಾಗಿದ್ದು, ಇಂಥದ್ದನ್ನು ಯಾರು ನಂಬಬೇಡಿ. ಆದಿಪುರುಷ್​ ಸಿನಿಮಾ ಹೆಸರಿನಲ್ಲಿರುವ ಈ ಪೋಸ್ಟ್​ ಜನರ ದಾರಿ ತಪ್ಪಿಸುವಂತಿದೆ. ಆದಿಪುರುಷ್​ ಸಿನಿಮಾ ತಂಡವು ಯಾವುದೇ ಜಾತಿ, ಬಣ್ಣ ಅಥವಾ ಧರ್ಮದ ಆಧಾರದ ಮೇಲೆ ತಾರತಮ್ಯವಿಲ್ಲದೆ ಸಮಾನತೆಗಾಗಿ ದೃಢವಾಗಿ ನಿಂತಿದೆ ಎಂದು ಸ್ಪಷ್ಟನೆ ನೀಡಿದೆ.

ಸಿನಿಮಾ ವಿಚಾರಕ್ಕೆ ಬಂದರೆ, ಆದಿಪುರುಷ್​ ಸಿನಿಮಾ ರಾಮಾಯಣ ಆಧಾರಿತ ಸಿನಿಮಾ ಆಗಿದೆ. ಪ್ರಭಾಸ್​ ರಾಮನ ಪಾತ್ರಕ್ಕೆ ಬಣ್ಣ ಹಚ್ಚಿದ್ದರೆ, ಕೃತಿ ಸನೋನ್ ಸೀತೆಯಾಗಿ ಕಾಣಿಸಿಕೊಂಡಿದ್ದಾರೆ. ಸೈಫ್​ ಅಲಿ ಖಾನ್​ ರಾವಣ ಪಾತ್ರದಲ್ಲಿ ಅಬ್ಬರಿಸಿದ್ದಾರೆ. ಈ ಸಿನಿಮಾ ಜೂನ್​ 16ರಂದು ವಿಶ್ವದಾದ್ಯಂತ ತೆರೆಕಾಣಲಿದೆ. (ಏಜೆನ್ಸೀಸ್​)

https://www.vijayavani.net/adipurush-pre-release-event

https://www.vijayavani.net/yashika-aannand-kisses-shalinis-cousin-richard-rishi-in-viral-pics-sparks-dating-rumors