ಬಹುಪಾಲು ಜೀವನವನ್ನು ನೀರಿನಲ್ಲಿ ಕಳೆಯುವ ಮೊಸಳೆಗಳು ತಮ್ಮ ದೇಹದ ಉಷ್ಣಾಂಶವನ್ನು ಅಂದಾಜು 30 ರಿಂದ 35 ಡಿಗ್ರಿ ಸೆಂಟಿಗ್ರೇಡ್ ಒಳಗೆ ಕಾಪಾಡಿಕೊಳ್ಳಬೇಕು. ಆದ್ದರಿಂದ ನೀರು, ಮರದ ನೆರಳು ಮತ್ತು ಸೂರ್ಯನ ಬಿಸಿಲಿನಿಂದ ದೇಹದ ಉಷ್ಣಾಂಶವನ್ನು ಸರಿದೂಗಿಸಿಕೊಳ್ಳುತ್ತವೆ. ನೀರು ತುಂಬಾ ತಂಪಾಗಿದ್ದರೆ ಸತ್ತುಹೋಗುತ್ತವೆ. ಆದ್ದರಿಂದ ಇವುಗಳು ಶೀತ ಪ್ರದೇಶಗಳಲ್ಲಿ ವಾಸಿಸಲಾಗುವುದಿಲ್ಲ. ಇವುಗಳಿಗೆ ದೇಹದಿಂದ ಬೆವರು ಬರುವುದಿಲ್ಲ, ಬದಲಾಗಿ ಬಾಯಿಯ ಮೂಲಕ ಬೆವರುತ್ತವೆ. ಆದ್ದರಿಂದ ಇವುಗಳು ಆಗಾಗ್ಗೆ ದಡದ ಮೇಲೆ ಬಂದು ಬಾಯಿಯನ್ನು ಅಗಲವಾಗಿ ತೆರೆಯುತ್ತವೆ. ಬಾಯಿಯ ಮೂಲಕ ಗಾಳಿಯಾಡಿ ದೇಹದ ಉಷ್ಣಾಂಶವನ್ನು ಹತೋಟಿಗೆ ತಂದುಕೊಳ್ಳುತ್ತವೆ. ಇದನ್ನು ಥೆರ್ಮೋರೆಗ್ಯುಲೇಷನ್ ಎಂದು ಹೇಳುತ್ತಾರೆ.
