ಆರ್​ಟಿಒ ಕಚೇರಿಗಳಲ್ಲಿ ಖಾಸಗಿ ದರ್ಬಾರ್!; ಬೆಂಗಳೂರು, ಮೈಸೂರು, ದಾವಣಗೆರೆಯಲ್ಲಿ ಎಫ್​ಐಆರ್​

| ಕೀರ್ತಿನಾರಾಯಣ ಸಿ. ಬೆಂಗಳೂರು

ರಾಜ್ಯದ ಪ್ರಾದೇಶಿಕ ಸಾರಿಗೆ ಅಧಿಕಾರಿ (ಆರ್​ಟಿಒ) ಕಚೇರಿಗಳಲ್ಲಿ ‘ಖಾಸಗಿ’ ವ್ಯಕ್ತಿಗಳ ದರ್ಬಾರ್ ಜೋರಾಗಿದೆ. ಅದರಲ್ಲೂ, ಬೆಂಗಳೂರಿನ ಜಯನಗರ ಆರ್​ಟಿಒ ಕಚೇರಿಯಲ್ಲೇ ಕುಳಿತು ಸೂಪರಿಂಟೆಂಡೆಂಟ್ ಹೆಸರಲ್ಲಿ ಗ್ರಾಹಕರಿಂದ ಹಣ ವಸೂಲಿ ಮಾಡಿದ ವ್ಯಕ್ತಿ ಹಾಗೂ ಮೈಸೂರು ಆರ್​ಟಿಒ ಕಚೇರಿಯಲ್ಲಿ ಅಧಿಕಾರಿ ಹಾಗೂ ನೌಕರರಂತೆ ಅನಧಿಕೃತ ವ್ಯಕ್ತಿಗಳು ಕರ್ತವ್ಯ ನಿರ್ವಹಿಸುತ್ತಿರುವುದರ ವಿರುದ್ಧ ಎಫ್​ಐಆರ್ ದಾಖಲಾ ಗಿರುವುದು ಸಾರ್ವಜನಿಕ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.

ಆರ್​ಟಿಒ ಕಚೇರಿಗಳಲ್ಲಿ ಶೇ.50ಕ್ಕೂ ಅಧಿಕ ಹುದ್ದೆಗಳು ಖಾಲಿ ಉಳಿದಿವೆ. ಇದಲ್ಲದೆ, ಅಧಿಕಾರಿ ಮತ್ತು ಸಿಬ್ಬಂದಿಯ ವರ್ಗಾವಣೆ ಹಾಗೂ ಮುಂಬಡ್ತಿಗೆ ‘ಸಿಂಡಿಕೇಟ್’ನ ಕೆಲ ಮುಖಂಡರು ‘ಭಾರಿ’ ಡಿಮ್ಯಾಂಡ್ ಮಾಡುತ್ತಿದ್ದಾರೆಂಬ ಮಾತುಗಳು ಕೇಳಿಬರುತ್ತಿವೆ. ಹೀಗಾಗಿ ಲಕ್ಷಗಟ್ಟಲೇ, ಕೆಲವೆಡೆ ಕೋಟ್ಯಂತರ ತೆತ್ತು ಹುದ್ದೆಗೆ ಬಂದವರು ಖಾಸಗಿ ವ್ಯಕ್ತಿಗಳನ್ನು ಬಳಸಿಕೊಂಡು ‘ಸಂಪಾದನೆ’ಗಿಳಿದಿರುವುದು ಗೊತ್ತಾಗಿದೆ. 145 ಬ್ರೇಕ್ ಇನ್​ಸ್ಪೆಕ್ಟರ್​ಗಳ ನೇಮಕಾತಿಗೆ ಕೆಪಿಎಸ್ಸಿ ಹಾಗೂ ಹೈಕೋರ್ಟ್ ಹಸಿರು ನಿಶಾನೆ ತೋರಿ ತಿಂಗಳುಗಳಾದರೂ ಈವರೆಗೆ ಅವರಿಗೆ ಆದೇಶಪತ್ರ ಕೊಟ್ಟಿಲ್ಲ.

ಹೈದರಾಬಾದ್ ಕರ್ನಾಟಕದ ಐವರು ಎಆರ್​ಟಿಒಗಳಿಗೆ ಆರ್​ಟಿಒ ಹುದ್ದೆಗೆ ಬಡ್ತಿ ಕೊಡುವಂತೆ ಈ ಹಿಂದಿನ ಸಾರಿಗೆ ಆಯುಕ್ತರೇ ಶಿಫಾರಸು ಮಾಡಿದ್ದರೂ ಈವರೆಗೆ ಅವರಿಗೆ ಬಡ್ತಿ ಕೊಟ್ಟಿಲ್ಲ. ಸಿಂಡಿಕೇಟ್​ನ ದಬ್ಬಾಳಿಕೆ ವಿಚಾರ ಇಲಾಖೆಯ ಹಿರಿಯ ಅಧಿಕಾರಿಗಳು ಹಾಗೂ ಸಾರಿಗೆ ಸಚಿವರ ಗಮನಕ್ಕಿದ್ದರೂ ಯಾವುದೇ ಕ್ರಮ ಕೈಗೊಳ್ಳದೆ ಮೌನ ವಹಿಸಿದ್ದಾರೆಂದು ಅಧಿಕಾರಿ ವರ್ಗ ಅಸಮಾಧಾನ ವ್ಯಕ್ತಪಡಿಸಿದೆ.

ಸಿಕ್ಕಿಬಿದ್ದವರಾರು?

• ಹರಿಯಾಣದಲ್ಲಿ ನೋಂದಣಿಯಾಗಿದ್ದ ಕಾರನ್ನು ರಾಜ್ಯಕ್ಕೆ ವರ್ಗಾವಣೆ ಮಾಡಿಸಿಕೊಳ್ಳಲು ಮಹಿಳೆಯೊಬ್ಬರು ಜಯನಗರ ಆರ್​ಟಿಒ ಕಚೇರಿಗೆ ಹೋದಾಗ ಕ್ಯಾಬಿನ್​ನಲ್ಲಿ ಕುಳಿತಿದ್ದ ಖಾಸಗಿ ವ್ಯಕ್ತಿ ಅರ್ಜಿ ಸ್ವೀಕರಿಸಿದ್ದ. 1.05 ಲಕ್ಷ ರೂ. ಖರ್ಚು ಆಗಲಿದೆ ಎಂದು ಹೇಳಿ ಆರ್​ಟಿಒ ಹೆಸರಲ್ಲಿ 94 ಸಾವಿರ ರೂ. ಡಿಡಿ ಪಡೆದಿದ್ದ. ಆದರೆ, ನೋಂದಣಿ ವರ್ಗಾಯಿಸಲಿಲ್ಲ. ಕೊನೆಗೆ ವಿಚಾರಿಸಿದಾಗ ಆತ ಅಧಿಕಾರಿಯೇ ಅಲ್ಲ ಎಂದು ಗೊತ್ತಾಗಿ ಜಯನಗರ ಪೊಲೀಸ್ ಠಾಣೆಗೆ ದೂರು ಕೊಟ್ಟಿದ್ದು, ಎಫ್​ಐಆರ್ ದಾಖಲಾಗಿದೆ.
• ಮೈಸೂರಿನ ಪಶ್ಚಿಮ ಪ್ರಾದೇಶಿಕ ಸಾರಿಗೆ ಕಚೇರಿಯಲ್ಲಿ ಕೆಲ ಅನಧಿಕೃತ ವ್ಯಕ್ತಿಗಳು ಸರ್ಕಾರಿ ಅಧಿಕಾರಿ ಮತ್ತು ನೌಕರರಂತೆ ಕೆಲಸ ಮಾಡುತ್ತಾ, ಕಚೇರಿಯಲ್ಲೇ ಕುಳಿತು ಸರ್ಕಾರಿ ದಾಖಲೆಗಳನ್ನು ತಮಗೆ ಬೇಕಾದಂತೆ ಮಾರ್ಪಡಿಸಿ ಸರ್ಕಾರಕ್ಕೆ ಮತ್ತು ಸಾರ್ವಜನಿಕರಿಗೆ ವಂಚನೆ ಮಾಡುತ್ತಿರುವ ಬಗ್ಗೆ 35 ಜನರ ವಿರುದ್ಧ ಲಕ್ಷ್ಮೀಶಪುರ ಠಾಣೆಯಲ್ಲಿ ಎಫ್​ಐಆರ್ ದಾಖಲಾಗಿದೆ.
• ಕೋಲಾರ, ದಾವಣಗೆರೆ ಸೇರಿ ರಾಜ್ಯದ ಕೆಲ ಆರ್​ಟಿಒ ಕಚೇರಿಗಳಲ್ಲಿ ಅವ್ಯವಹಾರ ನಡೆದು, ಖಾಸಗಿ ವ್ಯಕ್ತಿಗಳನ್ನು ಬಂಧಿಸಲಾಗಿದೆ.

ಅನಧಿಕೃತ ವ್ಯಕ್ತಿಗಳಿಂದಲೇ ಕೆಲಸ

• ಬಹುತೇಕ ಆರ್​ಟಿಒ ಕಚೇರಿಗಳಲ್ಲಿ ಖಾಸಗಿಯವರ ನೇಮಕ
• ಅನಧಿಕೃತ ವ್ಯಕ್ತಿಗಳಿಗೆ ಕಚೇರಿಗಳಲ್ಲಿ ಕುರ್ಚಿ, ಕ್ಯಾಬಿನ್ ವ್ಯವಸ್ಥೆ
• ಫೈಲ್ ಸ್ವೀಕಾರ, ಶುಲ್ಕ ಪಾವತಿ ಎಲ್ಲವೂ ಇವರಿಂದಲೇ
• ನಿಯಮಬಾಹಿರ ಡೀಲ್​ಗಳನ್ನು ತರುವುದೇ ಇವರ ಕಾಯಕ
• ಡೀಲ್ ನಂತರ ಹಣ ಸ್ವೀಕರಿಸಿ ಅಧಿಕಾರಿಗೆ ಕೊಡುವುದು.
• ಅಧಿಕಾರಿಗಳ ಲಾಗಿನ್ ಐಡಿ, ಪಾಸ್​ವರ್ಡ್ ಬಳಕೆ

ಬಡ್ತಿ ನೀಡಲು ಮೀನಮೇಷ: ರಾಜ್ಯದಲ್ಲಿ 47 ಆರ್​ಟಿಒ ಹುದ್ದೆಗಳು ಮಂಜೂರಾಗಿದ್ದು, ಅದರಲ್ಲಿ 20 ಹುದ್ದೆಗಳು ಖಾಲಿ ಉಳಿದಿವೆ. ಹೈದರಾಬಾದ್ ಕರ್ನಾಟಕದ ಐವರು ಎಆರ್​ಟಿಒಗೆ ಬಡ್ತಿ ಅಥವಾ ನಿಯಮ 32ರಡಿ ಸ್ವತಂತ್ರ ಪ್ರಭಾರದಲ್ಲಿರಿಸುವಂತೆ ಕಳೆದ ಮಾರ್ಚ್​ನಲ್ಲೇ ಶಿಫಾರಸು ಮಾಡಲಾಗಿದೆ. ಆದರೆ, ಈವರೆಗೂ ಬಡ್ತಿಯನ್ನೇ ಕೊಟ್ಟಿಲ್ಲ. ಉದ್ದೇಶಪೂರ್ವಕವಾಗಿ ತಡೆ ಮಾಡಲಾಗಿದೆ ಎಂದು ಅಧಿಕಾರಿಗಳು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಅಧಿಕಾರಿಗಳು ಹೇಳೋದೇನು?

• ಇಲಾಖೆಯಲ್ಲಿ ಕೆಳಹಂತದ ಎಲ್ಲ ಹುದ್ದೆಗಳು ಖಾಲಿ
• ಯಾವುದೇ ವರ್ಗಾವಣೆ, ಬಡ್ತಿ ಬೇಕಾದರೆ ಸಿಂಡಿಕೇಟ್​ಗೆ ಹಣ
• ಹೆಚ್ಚು ಹಣ ಕೊಟ್ಟವರಿಗೆ ಕೇಳಿದ ಹುದ್ದೆ ಸಿಗೋದು ಪಕ್ಕಾ
• ಆ ಹುದ್ದೆಗೆ ಬಂದವರು ವಸೂಲಿಗೆ ಇಳಿಯುತ್ತಾರೆ
• ಪ್ರಾಮಾಣಿಕವಾಗಿ ಕೆಲಸ ಮಾಡುವವರಿಗೂ ಕಿರುಕುಳ
• ವರ್ಗಾವಣೆ, ಬಡ್ತಿಗೆ ಹಣ ಪಡೆಯದಿದ್ದರೆ ಅವ್ಯವಹಾರಕ್ಕೆ ಕಡಿವಾಣ
• ಸಚಿವರು, ಆಯುಕ್ತರು, ಗಮನಹರಿಸಿ ದಬ್ಬಾಳಿಕೆಗೆ ಬ್ರೇಕ್ ಹಾಕಬೇಕು

https://www.vijayavani.net/trainee-teachers-in-uttarpradesh-will-now-be-exposed-to-the-lab-school

https://www.vijayavani.net/do-not-drink-this-beer-for-the-time-being