ಕೋವಿಡ್​ ಭೀಕರತೆಗೆ ಸಾಕ್ಷಿಯಾದ ಆಸ್ಪತ್ರೆ: ಕರೊನಾ ಮೃತದೇಹಗಳ ಎದುರೇ ರೋಗಿಗಳಿಗೆ ಚಿಕಿತ್ಸೆ

ಬ್ರಾಸಿಲಿಯಾ: ಕರೊನಾ ವೈರಸ್​ ವಿರುದ್ಧ ಹೋರಾಡುತ್ತಿದ್ದ ರೋಗಿಗಳ ಎದುರೇ ಕೋವಿಡ್​ನಿಂದ ಸಾವಿಗೀಡಾದವರ ಮೃತದೇಹಗಳನ್ನು ಇಟ್ಟಿದ್ದಂತಹ ಶಾಕಿಂಗ್​ ವಿಡಿಯೋವನ್ನು ಬ್ರೆಜಿಲ್​ನ ಆಸ್ಪತ್ರೆಯಲ್ಲಿ ಸೆರೆಹಿಡಿಯಲಾಗಿದ್ದು, ಕರೊನಾ ಭೀಕರತೆಗೆ ಸಾಕ್ಷಿಯಾಗಿದೆ.

ರೋಗಿಗಳ ಎದುರೇ ಕರೊನಾದಿಂದ ಜೀವ ಕಳೆದುಕೊಂಡ 14 ಮಂದಿಯ ಮೃತದೇಹಗಳನ್ನು ಇಡಲಾಗಿತ್ತು. ರೋಗಿಗಳ ಮನಸ್ಸನ್ನು ಘಾಸಿಗೊಳಿಸುವ ದೃಶ್ಯ ಕಂಡುಬಂದಿದ್ದು, ಉತ್ತರ ಬ್ರೆಜಿಲ್​ನ ಅಮೆಜಾನಾಸ್​ ​ ರಾಜ್ಯದ ಮಾನೌಸ್​ ನಗರದ ಜಾವೋ ಲುಸಿಯೋ ಆಸ್ಪತ್ರೆಯಲ್ಲಿ.

ಆಸ್ಪತ್ರೆಯ ನರ್ಸ್​ ಒಬ್ಬರು ಭೀಕರ ದೃಶ್ಯವನ್ನು ಸೆರೆಹಿಡಿದಿದ್ದಾರೆ. ರೋಗಿಗಳಿದ್ದ ವಾರ್ಡ್​ನಲ್ಲಿ ಮೃತದೇಹಗಳನ್ನು ಬ್ಲಾಂಕೆಟ್​ನಿಂದ​ ಮುಚ್ಚಿ ಇರಿಸಿದ್ದ ದೃಶ್ಯ ವಿಡಿಯೋದಲ್ಲಿದೆ.

ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಅಮೆಜಾನಾಸ್​ ರಾಜ್ಯ ಆರೋಗ್ಯ ಕಾರ್ಯದರ್ಶಿ, ಸಂತ್ರಸ್ತರು ಏಪ್ರಿಲ್​ 15 ರಾತ್ರಿ ಮರಣ ಹೊಂದಿದ್ದರು. ಏಪ್ರಿಲ್​ 16ರ ಬೆಳಗ್ಗೆ 5 ಮೃತದೇಗಳನ್ನು ಹೊರತೆಗೆಯಲಾಯಿತು. ಇನ್ನು ಒಂಬತ್ತು ದೇಹಗಳು ಆಸ್ಪತ್ರೆಯಲ್ಲಿ ಉಳಿದುಕೊಂಡವು. ಮರಣ ಪ್ರಮಾಣ ಪತ್ರದೊಂದಿಗೆ ಕುಟುಂಬ ಸದಸ್ಯರಿಗೆ ಎದುರು ನೋಡುತ್ತಿದ್ದೆವು ಎಂದಿದ್ದಾರೆ.

ಇದೀಗ ಆಸ್ಪತ್ರೆಯನ್ನು ಸಂಪೂರ್ಣವಾಗಿ ಕೋವಿಡ್​ 19 ಎಂದು ಪರಿಗಣಿಸಲಾಗಿದೆ. ಮತ್ತಷ್ಟು ಬೆಡ್​ಗಳನ್ನು ಹೆಚ್ಚಿಸಲಾಗುತ್ತಿದೆ. ಮುಂದೆ ಈ ರೀತಿಯ ಘಟನೆಗಳು ನಡೆಯದಂತೆ ಎಚ್ಚರ ವಹಿಸಲಾಗುವುದು ಎಂದು ಭರವಸೆ ನೀಡಿದ್ದಾರೆ.

ಅಮೆಜಾನಾಸ್​ ರಾಜ್ಯವೊಂದರಲ್ಲೇ ಕೋವಿಡ್​ ಪ್ರಕರಣಗಳು 1,719ಕ್ಕೇರಿದ್ದು, 124 ಮಂದಿ ಈವರೆಗೂ ಸಾವಿಗೀಡಾಗಿದ್ದಾರೆ. ಇತ್ತೀಚಿನ ವರದಿಯ ಪ್ರಕಾರ ಬ್ರೆಜಿಲ್​ನಲ್ಲಿ 30,891 ಪ್ರಕರಣಗಳಿದ್ದು, 1,952 ಮಂದಿ ಮೃತಪಟ್ಟಿದ್ದಾರೆ. (ಏಜೆನ್ಸೀಸ್​)

https://www.vijayavani.net/wuhans-coronavirus-death-toll-rises-by-50-after-chinese-city-revises-original-figures/