ದಿನವೊಂದರಲ್ಲಿ ಸಾಯುವವರ ಪ್ರಮಾಣ ಇನ್ನೂರರ ಗಡಿಯತ್ತ!: ಒಂದೇ ದಿನ 190 ಮಂದಿ ಕೋವಿಡ್-19 ಸೋಂಕಿಗೆ ಬಲಿ

ಬೆಂಗಳೂರು: ರಾಜ್ಯದಲ್ಲಿ ಕರೊನಾ ಎರಡನೇ ಅಲೆ ಕೈಮೀರಿದ್ದು, ಹೆಚ್ಚಿನ ಪ್ರಮಾಣದಲ್ಲಿ ಸಾವು-ನೋವು ಸಂಭವಿಸುತ್ತಿದ್ದು, ಆತಂಕ ಹೆಚ್ಚಿಸಿದೆ. ಶುಕ್ರವಾರ ಒಂದೇ ದಿನ ಬೆಂಗಳೂರಿನಲ್ಲಿ 124 ಮಂದಿ ಸೇರಿ ರಾಜ್ಯಾದ್ಯಂತ 190 ಜನರು ಸೋಂಕಿಗೆ ಬಲಿಯಾಗಿದ್ದಾರೆ. ಇದರೊಂದಿಗೆ ಈವರೆಗಿನ ಮೃತರ ಸಂಖ್ಯೆ 14,075ಕ್ಕೆ ಏರಿಕೆಯಾಗಿದೆ.

ಒಂದೆಡೆ ಸೋಂಕು ಮಿತಿಮೀರಿ ಏರುತ್ತಿದ್ದರೆ, ಮತ್ತೊಂದೆಡೆ ಗಂಭೀರ ಸಮಸ್ಯೆಯಿಂದ ತುರ್ತು ನಿಗಾ ಘಟಕ ಸೇರುತ್ತಿರುವವರ ಸಂಖ್ಯೆ 1,128ಕ್ಕೆ ಹೆಚ್ಚಳವಾಗಿದೆ. ದಿನದ ಸಾವಿನ ಸಂಖ್ಯೆ 200 ಗಡಿ ಸಮೀಪಿಸಿದೆ. ಬೆಂಗಳೂರಿನಲ್ಲಿ 124, ಹಾಸನ 8, ಕಲಬುರಗಿ 7, ಬಳ್ಳಾರಿ 6, ಕೋಲಾರ, ತುಮಕೂರು, ಧಾರವಾಡ ತಲಾ 5, ಹಾವೇರಿ, ಮಂಡ್ಯ, ಮೈಸೂರು, ಬೆಂಗಳೂರು ಗ್ರಾಮಾಂತರ ತಲಾ 4, ಬೆಳಗಾವಿ, ಬೀದರ್, ಚಾಮರಾಜನಗರ, ಚಿಕ್ಕಬಳ್ಳಾಪುರ, ವಿಜಯಪುರ ತಲಾ 2, ಚಿಕ್ಕಮಗಳೂರು, ರಾಮನಗರ, ಶಿವಮೊಗ್ಗ ಮತ್ತು ಯಾದಗಿರಿ ತಲಾ ಒಬ್ಬರು ಸೇರಿ 190 ಮಂದಿ ಸಾವಿಗೀಡಾಗಿದ್ದಾರೆ.

ಇದನ್ನೂ ಓದಿ: ಉಸಿರುಗಟ್ಟಿ ನರಳಾಡಿದ ಕೋವಿಡ್​ ಸೋಂಕಿತ; ಮಾಧ್ಯಮದವರಿಗೆ ತಿಳಿಸುತ್ತೇವೆ ಎಂದ ಮೇಲೆ ಆಸ್ಪತ್ರೆಗೆ ದಾಖಲಿಸಿಕೊಂಡ ಸಿಬ್ಬಂದಿ

ಸೋಂಕು ಪ್ರಮಾಣ ಶೇ. 15: ಕಳೆದ 24 ಗಂಟೆಯಲ್ಲಿ 26,962 ಹೊಸ ಸೋಂಕು ಪ್ರಕರಣಗಳು ವರದಿಯಾಗಿದ್ದು, ಇದರೊಂದಿಗೆ ದಿನದ ಸೋಂಕು ಪ್ರಮಾಣ ಶೇ. 15.19ಕ್ಕೆ ಏರಿಕೆಯಾಗಿದ್ದು, ಈವರೆಗಿನ ಒಟ್ಟು ಸೋಂಕಿತರ ಸಂಖ್ಯೆ 12.74 ಲಕ್ಷ ದಾಟಿದೆ. 8,697 ಮಂದಿ ಆಸ್ಪತ್ರೆಯಿಂದ ಬಿಡುಗಡೆ ಹೊಂದಿದ್ದು, ಗುಣಮುಖರ ಸಂಖ್ಯೆ 10.46 ಲಕ್ಷ ಮೀರಿದೆ. ಸೋಂಕು ಹೆಚ್ಚಳದೊಂದಿಗೆ ಆಸ್ಪತ್ರೆಯಲ್ಲಿ ಹಾಸಿಗೆಗೆ ಪರದಾಡುವವರ ಸಂಖ್ಯೆಯೂ ಹೆಚ್ಚಾಗಿದೆ.

ರಾಜ್ಯಾದ್ಯಂತ ವ್ಯಾಪಿಸಿದ ಸೋಂಕು: ಬೆಂಗಳೂರು 16,662, ತುಮಕೂರು 1004, ಕಲಬುರಗಿ 742, ಬಳ್ಳಾರಿ 695, ಮೈಸೂರು 645, ಬೆಂಗಳೂರು ಗ್ರಾಮಾಂತರ 588, ಮಂಡ್ಯ 519, ಕೋಲಾರ 504 ಸೇರಿದಂತೆ ಒಂದೇ ದಿನ 26, 962 ಸೋಂಕು ಪ್ರಕರಣಗಳು ದೃಢಪಟ್ಟಿವೆ.

https://www.vijayavani.net/there-is-no-problem-for-funeral-at-bangalore/

https://www.vijayavani.net/here-they-are-giving-expired-medicine/