ಬೆಳ್ತಂಗಡಿ: ಶುಕ್ರವಾರ ರಾತ್ರಿ ಮತ್ತು ಶನಿವಾರ ಬೆಳಗ್ಗೆ ಬೆಳ್ತಂಗಡಿ ತಾಲೂಕಿನಲ್ಲಿ ಉತ್ತಮ ಮಳೆಯಾಗಿದ್ದು ಹೆದ್ದಾರಿ ಸಂಚಾರ ಸಮಸ್ಯೆ ಮುಂದುವರಿಯಿತು.
ಮದ್ದಡ್ಕ, ಬೆಳ್ತಂಗಡಿ, ಉಜಿರೆ, ಮುಂಡಾಜೆ, ಚಿಬಿದ್ರೆ, ಚಾರ್ಮಾಡಿ ಮೊದಲಾದ ಸ್ಥಳಗಳಲ್ಲಿ ಅಭಿವೃದ್ಧಿಗಾಗಿ ರಸ್ತೆ ಅಗೆದು ಹಾಕಿ ಕೆಲವು ಕಡೆ ಮಾತ್ರ ಡಾಂಬರೀರಣ ನಡೆದಿದೆ.
ಉಳಿದೆಡೆ ರಸ್ತೆ ಅಗೆದು ಜಲ್ಲಿ ಹಾಕಲಾಗಿದ್ದರೆ ಇನ್ನು ಕೆಲವೆಡೆ ಮಣ್ಣಿನ ರಸ್ತೆ ಇದೆ. ಇಲ್ಲಿ ವಾಹನ ಸಂಚಾರಕ್ಕೆ ಹೆಚ್ಚಿನ ಸಮಸ್ಯೆ ಉಂಟಾಗಿದೆ ದಿನಂಪ್ರತಿ ಸಾವಿರಾರು ವಾಹನ ಸಂಚಾರ ನಡೆಸುವ ಹೆದ್ದಾರಿ ರಸ್ತೆಯ ಈ ಸ್ಥಿತಿಗೆ ಚಾಲಕರು ಹಿಡಿಶಾಪ ಹಾಕುತ್ತಿದ್ದಾರೆ. ದ್ವಿಚಕ್ರ ವಾಹನ ಸವಾರರು ಇಲ್ಲಿ ಸಂಚರಿಸಲು ಪಾಡು ಪಡುವಂತಾಗಿದೆ. ಮಣ್ಣು ಅಗೆದು ಹಾಕಲಾಗಿರುವಲ್ಲಿ ಪಾದಾಚಾರಿಗಳಿಗೆ ಕೆಸರಿನ ಸಿಂಚನ ಸಾಮಾನ್ಯವಾಗಿದೆ. ಹೆದ್ದಾರಿ ಅಭಿವೃದ್ಧಿ ಕಾಮಗಾರಿ ಆಮೆಗತಿಯಲ್ಲಿ ಸಾಗುತ್ತಿರುವ ಬಗ್ಗೆ ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
