ಕನಿಷ್ಠ 25 ಲಕ್ಷ ರೂ.ಬಂಡವಾಳವಿದ್ದರೆ ಸಹಕಾರಿ ಬ್ಯಾಂಕೊಂದನ್ನು ಆರಂಭಿಸಬಹುದು. ನಗರ, ಪಟ್ಟಣ ಹಾಗೂ ಗ್ರಾಮೀಣ ಭಾಗದ ಸಣ್ಣ ರೈತರು ಹಾಗೂ ಉದ್ಯಮಿಗಳಿಗೆ ಸಕಾಲದಲ್ಲಿ ಹಣಕಾಸು ನೆರವು/ಸಾಲ ನೀಡುವ ಉದ್ದೇಶದಿಂದಲೇ ಈ ಬ್ಯಾಂಕ್ಗಳು ಹುಟ್ಟಿಕೊಂಡವು. ಇತರ ಬ್ಯಾಂಕುಗಳಿಗೆ ಹೋಲಿಸಿದರೆ ಸಹಕಾರಿ ಬ್ಯಾಂಕ್ನಲ್ಲಿ ಅಧಿಕ ಬಡ್ಡಿ ಸಿಗುತ್ತದೆ. ಸಹಜವಾಗಿಯೇ ಇದು ಠೇವಣಿದಾರರನ್ನು ಆಕರ್ಷಿಸಿದವು. ಆದರೆ, ಕಾಲಾಂತರದಲ್ಲಿ ಹಲವು ಸಹಕಾರಿ ಬ್ಯಾಂಕುಗಳು ಮೂಲ ಉದ್ದೇಶ ಗಾಳಿಗೆ ತೂರಿ, ಅನರ್ಹ ವ್ಯಕ್ತಿ/ಸಂಸ್ಥೆಗಳಿಗೆ ಭದ್ರತೆಯಿಲ್ಲದೆ ಸಾಲ ನೀಡಿ, ಸ್ವಜನಪಕ್ಷಪಾತ, ಅವ್ಯವಹಾರ, ನಕಲಿ ಖಾತೆಗಳ ಸೃಷ್ಟಿ, ರಾಜ್ಯ ಸರ್ಕಾರಗಳ ಹಸ್ತಕ್ಷೇಪ, ರಾಜಕೀಯ ಪ್ರಭಾವದಿಂದಾಗಿ ಸೇರಿ ಹತ್ತಾರು ಅಕ್ರಮಗಳಿಗೆ ಕೈ ಹಾಕಿದವು. ಇದರಿಂದ ಠೇವಣಿದಾರರು ಬೀದಿಗೆ ಬಿದ್ದರು. ಹಾಗಂತ, ಎಲ್ಲ ಬ್ಯಾಂಕುಗಳು ಇದೇ ಹಾದಿಯಲ್ಲಿವೆ ಎಂದಲ್ಲ. ದುರಾಡಳಿತ ತೋರಿದ ಬ್ಯಾಂಕುಗಳಿಂದ ಸರಿ ದಾರಿಯಲ್ಲಿದ್ದ ಬ್ಯಾಂಕುಗಳಿಗೂ ಕೆಟ್ಟ ಹೆಸರು ಬಂದಿದೆ. ಬೆಂಗಳೂರಿನ ಗುರು ರಾಘವೇಂದ್ರ ಸಹಕಾರಿ ಬ್ಯಾಂಕ್, ಮಹಾರಾಷ್ಟ್ರದ ಪಿಎಂಸಿ ಬ್ಯಾಂಕ್, ಮಾಧವಪುರ ಮರ್ಚೆಂಟೈಲ್ ಕೋ ಆಪರೇಟಿವ್ ಬ್ಯಾಂಕ್, ಕೃಷಿ ಕೋ ಆಪರೇಟಿವ್ ಅರ್ಬನ್ ಬ್ಯಾಂಕ್, ಚಾರ್ವಿುನಾರ್ ಕೋ ಆಪರೇಟಿವ್ ಅರ್ಬನ್ ಬ್ಯಾಂಕ್, ನಾಗ್ಪುರ ಡಿಸ್ಟ್ರಿಕ್ಟ್ ಸೆಂಟ್ರಲ್ ಕೋ ಆಪರೇಟಿವ್ ಬ್ಯಾಂಕ್... ಹೀಗೆ ಹತ್ತು ಹಲವು ಬ್ಯಾಂಕ್ಗಳು ಹಗರಣದಲ್ಲಿ ಸಿಲುಕಿಕೊಂಡಿವೆ. ಇವುಗಳನ್ನು ನಂಬಿದ್ದ ಗ್ರಾಹಕರೀಗ ಕೋರ್ಟು-ಕಚೇರಿ ಅಲೆಯುವಂತಾಗಿದೆ. ಕಾಂಗ್ರೆಸ್ ನಾಯಕ ಡಿ.ಕೆ. ಶಿವಕುಮಾರ್ ವಿರುದ್ಧ ಅಕ್ರಮ ಆಸ್ತಿ/ಹಣ ಸಂಪಾದನೆ ಪ್ರಕರಣದಲ್ಲಿ ತನಿಖೆ ನಡೆಸುತ್ತಿದ್ದ ಜಾರಿ ನಿರ್ದೇಶನಾಲಯ, ಕಾಂಗ್ರೆಸ್ ನಾಯಕಿ ಲಕ್ಷ್ಮಿ ಹೆಬ್ಬಾಳ್ಕರ್ ಅವರನ್ನು ವಿಚಾರಣೆ ಮಾಡಿದನ್ನಿಲ್ಲಿ ನೆನಪಿಸಿಕೊಳ್ಳಬಹುದು. ಕಾಂಗ್ರೆಸ್ ಮುಖಂಡ ಕೆ.ಎನ್. ರಾಜಣ್ಣ ಅಧ್ಯಕ್ಷತೆಯ ಕರ್ನಾಟಕ ಸ್ಟೇಟ್ ಅಪೆಕ್ಸ್ ಕೋ ಆಪರೇಟಿವ್ ಬ್ಯಾಂಕ್ ಹೆಬ್ಬಾಳ್ಕರ್ ಮಾಲೀಕತ್ವದ ಸಕ್ಕರೆ ಕಾರ್ಖಾನೆಗೆ ನಿಯಮಬಾಹಿರವಾಗಿ 215 ಕೋಟಿ ರೂ. ಸಾಲ ನೀಡಿದೆ ಎಂಬ ಆರೋಪಗಳು ಕೇಳಿಬಂದಿದ್ದ ಹಿನ್ನೆಲೆಯಲ್ಲಿ ಇ.ಡಿ. ಅಧಿಕಾರಿಗಳು ಈ ಮೂವರನ್ನೂ ವಿಚಾರಣೆ ಮಾಡಿದ್ದರು. ಮೂವರೂ ಒಂದೇ ಪಕ್ಷಕ್ಕೆ ಸೇರಿರುವುದರಿಂದ ಅನುಮಾನ ಮೂಡುವುದು ಸಹಜವೇ. ಇಂಥದ್ದೇ ಮಾದರಿಯಲ್ಲಿ ದೇಶದ ಹತ್ತಾರು ಸಹಕಾರಿ ಬ್ಯಾಂಕುಗಳು ಹಗರಣಕ್ಕೆ ಸಾಕ್ಷಿಯಾಗಿವೆ.
