ಫಾರಿನ್ ಕಲರ್ ಟಿವಿ ಆಸೆ ಬಿಟ್ಟುಬಿಡಿ: ಇನ್ನೇನಿದ್ರೂ ಮೇಡ್ ಇನ್ ಇಂಡಿಯಾ ಜಮಾನಾ

ನವದೆಹಲಿ: ಫಾರಿನ್ ಕಲರ್​ ಟಿವಿ ಬೇಕು ಅಥವಾ ಚೀನಾ ಸೆಟ್​ ತಗೊಳ್ಳುವ ಆಸೆ ಇದ್ದರೆ ಬಿಟ್ಟುಬಿಡಿ. ಇನ್ನೇನಿದ್ದರೂ ಮೇಡ್ ಇನ್ ಇಂಡಿಯಾ ಜಮಾನಾ. ಕಲರ್​ ಟಿವಿ ಸೆಟ್​ಗಳ ಆಮದು ಮಾಡಿಕೊಳ್ಳುವುದರ ಮೇಲೆ ಕೇಂದ್ರ ಸರ್ಕಾರ ನಿರ್ಬಂಧ ಹೇರಿದೆ. ಚೀನಾದಿಂದ ಕಲರ್ ಟಿವಿ ಆಮದಾಗುವುದನ್ನು ತಡೆದು ಸ್ಥಳೀಯವಾಗಿ ಕಲರ್ ಟಿವಿ ಉತ್ಪಾದನೆ ಮತ್ತು ಮಾರಾಟವನ್ನು ಉತ್ತೇಜಿಸುವುದೇ ಕೇಂದ್ರ ಸರ್ಕಾರದ ಈ ನಡೆಯ ಉದ್ದೇಶ. ಈ ಸಂಬಂಧ ಡೈರೆಕ್ಟರೇಟ್​ ಜನರಲ್​ ಆಫ್ ಫಾರಿನ್ ಟ್ರೇಡ್​(ಡಿಜಿಎಫ್​ಟಿ) ಅಧಿಸೂಚನೆ ಪ್ರಕಟಿಸಿದೆ.

ಕಳೆದ ಹಣಕಾಸು ವರ್ಷದ ಅಂತ್ಯಕ್ಕೆ(2020ರ ಮಾರ್ಚ್ 31) ಭಾರತದಲ್ಲಿ ಮಾರಾಟವಾಗಿರುವ ಕಲರ್​ ಟಿವಿಗಳ ಮೌಲ್ಯ 5,850 ಕೋಟಿ ರೂಪಾಯಿ. ಇದರಲ್ಲಿ 3205 ಕೋಟಿ ರೂಪಾಯಿ ಉತ್ಪನ್ನ ವಿಯೆಟ್ನಾಂನದ್ದು. 2,186 ಕೋಟಿ ರೂಪಾಯಿ ಉತ್ಪನ್ನ ಚೀನಾದ್ದು. ಹೀಗಾಗಿ ಚೀನಾದ ರಫ್ತು ಮತ್ತು ಹೂಡಿಕೆಗಳ ವಿಚಾರದಲ್ಲಿ ಕೇಂದ್ರ ಸರ್ಕಾರ ಕಟ್ಟುನಿಟ್ಟಿನ ಕ್ರಮಕ್ಕೆ ಮುಂದಾಗಿದೆ.

ಇದನ್ನೂ ಓದಿ: ಸ್ಮಾರ್ಟ್​ಫೋನ್ ಕಳೆದುಕೊಂಡವರ ತುರ್ತು ಗಮನಕ್ಕೆ…

ಚೀನಾದ ರಫ್ತು ಕಡಿಮೆ ಮಾಡುವ ಮೂಲಕ ಅದರ ಮೇಲೆ ಅವಲಂಬಿತವಾಗಿರುವುದನ್ನು ತಪ್ಪಿಸಲು ಕೇಂದ್ರ ಸರ್ಕಾರ ತೀರ್ಮಾನಿಸಿದೆ. ಈ ಸಂಬಂಧ ಈಗಾಗಲೇ ಏಪ್ರಿಲ್​ನಲ್ಲೇ ವಿದೇಶಿ ನೇರ ಹೂಡಿಕೆ(ಎಫ್​ಡಿಐ) ನಿಯಮದಲ್ಲೂ ಭಾರಿ ತಿದ್ದುಪಡಿ ತರಲಾಗಿದೆ. ಭಾರತೀಯ ರೈಲ್ವೆ ಮತ್ತು ರಸ್ತೆ ಸಾರಿಗೆ ಇಲಾಖೆಗಳು ಚೀನಾ ಕಂಪನಿ ಜತೆಗಿನ ಒಪ್ಪಂದವನ್ನು ರದ್ದುಗೊಳಿಸಿವೆ. ಟಿಕ್ ಟಾಕ್ ಸೇರಿ 59 ಆ್ಯಪ್​ಗಳನ್ನು ಭಾರತ ಸರ್ಕಾರ ನಿಷೇಧಿಸಿದೆ. ಲಡಾಖ್​ನಲ್ಲಿ ಚೀನಾ ಸೇನೆ ಅತಿಕ್ರಮಿಸಿದ್ದು, ಆಕ್ರಮಣಕಾರಿ ಧೋರಣೆ ತಳೆದಿರುವುದಕ್ಕೆ ಗಡಿಯಲ್ಲಿ ತಕ್ಕ ಪ್ರತ್ಯುತ್ತರ ನೀಡಿದ ಬಳಿಕ ವಾಣಿಜ್ಯ ಸಮರವನ್ನೂ ಸಾರಿದೆ.

https://www.vijayavani.net/the-curious-case-of-a-belgian-woman-who-temporarily-thought-she-was-a-chicken/