ಹಳೇ ಬ್ಯಾಂಕ್ ಖಾತೆಗಳಲ್ಲಿ ಹಣ ಮರೆತಿದ್ದೀರಾ? ಹಾಗಾದ್ರೆ ಬಡ್ಡಿ ಸಮೇತ ಹಣ ಹಿಂಪಡೆಯುವುದು ಹೇಗೆ? ಇಲ್ಲಿದೆ ಕಂಪ್ಲೀಟ್​ ಮಾಹಿತಿ...RBI

ನವದೆಹಲಿ: ಭಾರತದಾದ್ಯಂತ ಲಕ್ಷಾಂತರ ಬ್ಯಾಂಕ್ ಖಾತೆಗಳು ವರ್ಷಗಟ್ಟಲೆಯಿಂದ ನಿಷ್ಕ್ರಿಯಗೊಂಡಿರುವುದರಿಂದ ಅಥವಾ ಠೇವಣಿದಾರರು ತಮ್ಮ ಅವಧಿ ಮುಗಿದ ಸ್ಥಿರ ಠೇವಣಿಗಳನ್ನು ಹಿಂಪಡೆಯದ ಕಾರಣ ಅವುಗಳಲ್ಲಿನ ಹಣವು ಹಾಗೆಯೇ ಅನಾಥವಾಗಿ ಉಳಿದುಹೋಗಿದೆ. ಇಂತಹ ಹಣ ನಷ್ಟವಾಯಿತು ಎಂದು ಬಹುತೇಕರು ಭಾವಿಸುತ್ತಾರೆ, ಆದರೆ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ( RBI ) ನೀಡಿರುವ ಭರವಸೆಯ ಪ್ರಕಾರ, ಈ ಹಣವನ್ನು ಆರ್​ಬಿಐನ 'ಠೇವಣಿದಾರರ ಶಿಕ್ಷಣ ಮತ್ತು ಜಾಗೃತಿ' ನಿಧಿಗೆ ವರ್ಗಾಯಿಸಲಾಗಿದ್ದರೂ ಸಹ, ಮೂಲ ಠೇವಣಿದಾರರು ಅಥವಾ ಅವರ ಕಾನೂನುಬದ್ಧ ವಾರಸುದಾರರು ಸೂಕ್ತ ದಾಖಲೆಗಳನ್ನು ಒದಗಿಸಿ ಈ ಹಣವನ್ನು ಇಂದಿಗೂ ಮರಳಿ ಪಡೆಯಬಹುದಾಗಿದೆ.

ಸಾರ್ವಜನಿಕರಲ್ಲಿ ಈ ಬಗ್ಗೆ ಜಾಗೃತಿ ಮೂಡಿಸಲು ಆರ್‌ಬಿಐ ದೇಶಾದ್ಯಂತ ವಿಶೇಷ ಅಭಿಯಾನವೊಂದನ್ನು ಆರಂಭಿಸಿದೆ. ಗ್ರಾಹಕರು ತಾವು ಮರೆತುಬಿಟ್ಟಿರುವ ಇಂತಹ ಠೇವಣಿ ಹಣವನ್ನು ಹುಡುಕಲು ಆರ್‌ಬಿಐ 'ಉದ್ಗಮ್' (UDGAM - Unclaimed Deposits-Gateway to Access Information) ಎಂಬ ಅಧಿಕೃತ ಪೋರ್ಟಲ್ ಅನ್ನು ಪರಿಚಯಿಸಿದೆ. ಇದರ ಮೂಲಕ ಜನರು ಅತ್ಯಂತ ಸರಳವಾದ ಪರಿಶೀಲನಾ ಪ್ರಕ್ರಿಯೆಯನ್ನು ಪೂರ್ಣಗೊಳಿಸುವ ಮೂಲಕ ತಮ್ಮ ಹಳೆಯ ಹಣವನ್ನು ಸುಲಭವಾಗಿ ಪತ್ತೆಹಚ್ಚಿ, ಮರಳಿ ಪಡೆಯಬಹುದಾಗಿದೆ.

ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ನಿಯಮಗಳ ಪ್ರಕಾರ, ಉಳಿತಾಯ ಅಥವಾ ಚಾಲ್ತಿ ಖಾತೆಗಳಲ್ಲಿರುವ ಹಣವು 10 ವರ್ಷ ಅಥವಾ ಅದಕ್ಕಿಂತ ಹೆಚ್ಚು ಕಾಲ ಯಾವುದೇ ವಹಿವಾಟು ಇಲ್ಲದೆ ನಿಷ್ಕ್ರಿಯವಾಗಿದ್ದರೆ ಹಾಗೂ ಸ್ಥಿರ ಠೇವಣಿಗಳು ಅವಧಿ ಮುಗಿದ 10 ವರ್ಷಗಳ ನಂತರವೂ ವಿತ್‌ಡ್ರಾ ಆಗದಿದ್ದರೆ, ಅಂತಹ ಹಣವನ್ನು ‘ಕ್ಲೈಮ್ ಮಾಡದ ಠೇವಣಿಗಳು’ ಎಂದು ವರ್ಗೀಕರಿಸಲಾಗುತ್ತದೆ. ಬ್ಯಾಂಕುಗಳು ಈ ಮೊತ್ತವನ್ನು ಆರ್‌ಬಿಐ ಮೇಂಟೇನ್ ಮಾಡುವ ‘ಠೇವಣಿದಾರರ ಶಿಕ್ಷಣ ಮತ್ತು ಜಾಗೃತಿ’ ನಿಧಿಗೆ ಕಡ್ಡಾಯವಾಗಿ ವರ್ಗಾಯಿಸಬೇಕಾಗುತ್ತದೆ.

ಆದರೆ, ಹಣವನ್ನು ಆರ್‌ಬಿಐ ನಿಧಿಗೆ ವರ್ಗಾಯಿಸಿದ ತಕ್ಷಣ ಗ್ರಾಹಕರ ಮಾಲೀಕತ್ವದ ಹಕ್ಕುಗಳೇನೂ ಕೊನೆಗೊಳ್ಳುವುದಿಲ್ಲ. ಖಾತೆದಾರರು ಅಥವಾ ಅವರ ಕಾನೂನುಬದ್ಧ ವಾರಸುದಾರರು ತಾವು ಮೂಲತಃ ಯಾವ ಬ್ಯಾಂಕಿನಲ್ಲಿ ಖಾತೆ ಹೊಂದಿದ್ದರೋ, ಅದೇ ಬ್ಯಾಂಕಿಗೆ ಭೇಟಿ ನೀಡಿ ಯಾವುದೇ ಸಮಯದಲ್ಲಿ ಈ ಹಣವನ್ನು ಮರಳಿ ಪಡೆಯಬಹುದು. ಇದರೊಂದಿಗೆ, ಬಡ್ಡಿ ಅನ್ವಯವಾಗುವ ಠೇವಣಿಗಳಾಗಿದ್ದರೆ, ಆರ್‌ಬಿಐ ಮಾರ್ಗಸೂಚಿಗಳ ಅನ್ವಯ ಆ ಹಣಕ್ಕೆ ಬರಬೇಕಾದ ಬಡ್ಡಿಯನ್ನು ಸಹ ಸೇರಿಸಿ ಗ್ರಾಹಕರಿಗೆ ಪಾವತಿಸಲಾಗುತ್ತದೆ.

ಭಾರತೀಯ ರಿಸರ್ವ್ ಬ್ಯಾಂಕ್ ಅಧಿಕೃತ ಮಾಹಿತಿಯ ಪ್ರಕಾರ, ಒಟ್ಟು 7 ರೀತಿಯ ಬ್ಯಾಂಕ್ ಖಾತೆಗಳು ಅಥವಾ ವಹಿವಾಟುಗಳು 10 ವರ್ಷಗಳ ಅವಧಿಗೆ ಕ್ಲೈಮ್ ಆಗದೆ ಅಥವಾ ನಿಷ್ಕ್ರಿಯವಾಗಿ ಉಳಿದರೆ ಅವುಗಳನ್ನು 'ಕ್ಲೈಮ್ ಮಾಡದ ಠೇವಣಿಗಳು' ಎಂದು ಪರಿಗಣಿಸಿ ಆರ್‌ಬಿಐನ ಠೇವಣಿದಾರರ ಶಿಕ್ಷಣ ಮತ್ತು ಜಾಗೃತಿ ನಿಧಿಗೆ ವರ್ಗಾಯಿಸಲಾಗುತ್ತದೆ. ಈ ಪಟ್ಟಿಯಲ್ಲಿ ನಿಷ್ಕ್ರಿಯಗೊಂಡ ಉಳಿತಾಯ ಮತ್ತು ಚಾಲ್ತಿ ಖಾತೆಗಳು, ಅವಧಿ ಮುಗಿದ ನಂತರವೂ ಪಡೆಯದ ಸ್ಥಿರ ಠೇವಣಿಗಳು, ರಿಕರಿಂಗ್ ಠೇವಣಿಗಳು (RD) ಹಾಗೂ ಕ್ಯುಮುಲೇಟಿವ್ ಠೇವಣಿಗಳು ಸೇರಿವೆ. ಅಷ್ಟೇ ಅಲ್ಲದೆ, 10 ವರ್ಷಗಳವರೆಗೆ ಬಾಕಿ ಉಳಿದಿರುವ ಡಿಮ್ಯಾಂಡ್ ಡ್ರಾಫ್ಟ್‌ಗಳು (DD)/ಪೇ ಆರ್ಡರ್‌ಗಳು ಮತ್ತು ಕ್ಲೈಮ್ ಮಾಡದ NEFT ಅಥವಾ ATM ಕ್ರೆಡಿಟ್‌ಗಳು ಸೇರಿದಂತೆ ಇತರೆ ನಿರ್ದಿಷ್ಟ ಬ್ಯಾಂಕ್ ಬ್ಯಾಲೆನ್ಸ್‌ಗಳನ್ನು ಸಹ ಇದೇ ನಿಯಮದಡಿ ಆರ್‌ಬಿಐ ನಿಧಿಗೆ ವರ್ಗಾವಣೆ ಮಾಡಲಾಗುತ್ತದೆ.

ನೀವು ಕ್ಲೈಮ್ ಮಾಡದ ಠೇವಣಿಗಳನ್ನು ಹೊಂದಿದ್ದೀರಾ ಎಂದು ಪರಿಶೀಲಿಸುವುದು ಹೇಗೆ?

ಮರೆತುಹೋಗಿರುವ ಠೇವಣಿ ಹಣವನ್ನು ಪತ್ತೆಹಚ್ಚಲು ಅತ್ಯಂತ ಸುಲಭವಾದ ಮಾರ್ಗವೆಂದರೆ ಆರ್‌ಬಿಐನ ಕೇಂದ್ರೀಕೃತ ಪ್ಲಾಟ್‌ಫಾರ್ಮ್ ಆದ 'ಉದ್ಗಮ್' (UDGAM) ಪೋರ್ಟಲ್ ಬಳಸುವುದಾಗಿದೆ. ಇದರಲ್ಲಿ ಸಾರ್ವಜನಿಕರು ಭಾಗವಹಿಸುವ ಒಟ್ಟು 30 ವಿವಿಧ ಬ್ಯಾಂಕುಗಳಲ್ಲಿ ಕ್ಲೈಮ್ ಮಾಡದೆ ಉಳಿದಿರುವ ತಮ್ಮ ಠೇವಣಿಗಳನ್ನು ಒಂದೇ ಸೂರಿನಡಿ ಹುಡುಕಬಹುದು. ಈ ಪೋರ್ಟಲ್‌ನಲ್ಲಿ ಸರ್ಚ್ ಮಾಡುವ ಮುನ್ನ ಸಾರ್ವಜನಿಕರು ತಮ್ಮ ಹೆಸರು ಮತ್ತು ಮೊಬೈಲ್ ಸಂಖ್ಯೆಯನ್ನು ನೀಡಿ ನೋಂದಾಯಿಸಿಕೊಳ್ಳುವುದು ಕಡ್ಡಾಯವಾಗಿದೆ. ನಂತರ, ಖಾತೆದಾರರ ಹೆಸರನ್ನು ನಮೂದಿಸಿ, ಸಂಬಂಧಪಟ್ಟ ಬ್ಯಾಂಕನ್ನು ಆಯ್ಕೆ ಮಾಡಿ, ಪ್ಯಾನ್ ಕಾರ್ಡ್, ಪಾಸ್‌ಪೋರ್ಟ್, ವೋಟರ್ ಐಡಿ, ಡ್ರೈವಿಂಗ್ ಲೈಸೆನ್ಸ್ ಅಥವಾ ಹುಟ್ಟಿದ ದಿನಾಂಕದಂತಹ ಗುರುತಿನ ಚೀಟಿಗಳಲ್ಲಿ ಯಾವುದಾದರೂ ಒಂದರ ವಿವರವನ್ನು ನೀಡಿ ಹಣವನ್ನು ಹುಡುಕಬಹುದು.

ಇನ್ನು ವ್ಯವಹಾರಗಳು, ಕಂಪನಿಗಳು ಮತ್ತು ವ್ಯಕ್ತಿಗತವಲ್ಲದ ಇತರ ಸಂಸ್ಥೆಗಳ ಕ್ಲೈಮ್ ಮಾಡದ ಠೇವಣಿಗಳನ್ನು ಹುಡುಕಲು ಸಹ ಈ ಪೋರ್ಟಲ್‌ನಲ್ಲಿ ಅವಕಾಶವಿದೆ. ಅಂತಹ ಸಂಸ್ಥೆಗಳು ತಮ್ಮ ಅಧಿಕೃತ ಹೆಸರಿನೊಂದಿಗೆ ಪ್ಯಾನ್ (PAN), ಕಾರ್ಪೊರೇಟ್ ಗುರುತಿನ ಸಂಖ್ಯೆ (CIN), ಅಧಿಕೃತ ಸಹಿದಾರರ ವಿವರಗಳು ಅಥವಾ ಸಂಸ್ಥೆ ಸ್ಥಾಪನೆಯಾದ ದಿನಾಂಕವನ್ನು ನಮೂದಿಸಿ ಹುಡುಕಾಟ ನಡೆಸಬಹುದು. ಒಂದು ವೇಳೆ ಗ್ರಾಹಕರಲ್ಲಿ ಈ ಯಾವುದೇ ಗುರುತಿನ ಚೀಟಿಗಳ ವಿವರಗಳು ಲಭ್ಯವಿಲ್ಲದಿದ್ದರೂ ಸಹ, ಕೇವಲ ಖಾತೆದಾರರ ಹಳೆಯ ವಿಳಾಸವನ್ನು ಬಳಸಿಕೊಂಡು ಕ್ಲೈಮ್ ಮಾಡದ ಹಣದ ವಿವರಗಳನ್ನು ಪತ್ತೆಹಚ್ಚಲು ಆರ್‌ಬಿಐ ಈ ಪೋರ್ಟಲ್‌ನಲ್ಲಿ ವಿಶೇಷ ವ್ಯವಸ್ಥೆ ಕಲ್ಪಿಸಿದೆ.

ಕ್ಲೈಮ್ ಮಾಡದ ಠೇವಣಿಯನ್ನು ಪತ್ತೆಹಚ್ಚುವುದು ಕೇವಲ ಮೊದಲ ಹಂತವಾಗಿದೆ. ಅದರ ನಿಜವಾದ ಮರುಪಾವತಿಯನ್ನು ಸಂಬಂಧಪಟ್ಟ ಬ್ಯಾಂಕಿನಿಂದಲೇ ಕ್ಲೈಮ್ ಮಾಡಬೇಕಾಗುತ್ತದೆ. ಈ ಪ್ರಕ್ರಿಯೆಯು ಈ ಕೆಳಗಿನವುಗಳನ್ನು ಒಳಗೊಂಡಿರುತ್ತದೆ:

* ಬ್ಯಾಂಕಿನ ಯಾವುದೇ ಶಾಖೆಗೆ ಭೇಟಿ ನೀಡುವುದು, ಅದು ಖಾತೆ ಇರುವ ಮೂಲ ಶಾಖೆಯಲ್ಲೇ ಆಗಬೇಕೆಂದೇನೂ ಇಲ್ಲ.

* ನಿಗದಿಪಡಿಸಿದ ಕ್ಲೈಮ್ ಫಾರ್ಮ್ ಜೊತೆಗೆ ಆಧಾರ್, ಪಾಸ್‌ಪೋರ್ಟ್, ವೋಟರ್ ಐಡಿ ಅಥವಾ ಡ್ರೈವಿಂಗ್ ಲೈಸೆನ್ಸ್‌ನಂತಹ ಮಾನ್ಯವಾದ ಕೆವೈಸಿ (KYC) ದಾಖಲೆಗಳನ್ನು ಸಲ್ಲಿಸುವುದು.

* ಬ್ಯಾಂಕ್ ನಿಮ್ಮ ಕ್ಲೈಮ್ ಅನ್ನು ಪರಿಶೀಲಿಸಿದ ನಂತರ ಮೊತ್ತವನ್ನು ಪಡೆಯುವುದು. ಒಂದು ವೇಳೆ ಆ ಠೇವಣಿಯು ಬಡ್ಡಿ ಒಳಗೊಂಡಿರುವುದಾಗಿದ್ದರೆ, ಆರ್‌ಬಿಐನ DEA ನಿಧಿಯಿಂದ ಬ್ಯಾಂಕ್ ಮರುಪಾವತಿ ಪಡೆಯುವ ಮೊದಲು, ಅರ್ಹ ಬಡ್ಡಿಯನ್ನು ಸಹ ಪಾವತಿಸಲಾಗುತ್ತದೆ.

ಮುಖ್ಯವಾಗಿ, DEA ನಿಧಿಗೆ ವರ್ಗಾಯಿಸಲಾದ ಹಣವನ್ನು ಕ್ಲೈಮ್ ಮಾಡಲು ಯಾವುದೇ ಸಮಯದ ಮಿತಿಯನ್ನು ನಿಗದಿಪಡಿಸಲಾಗಿಲ್ಲ.

ಬ್ಯಾಂಕುಗಳಲ್ಲಿ ಕ್ಲೈಮ್ ಮಾಡದೆ ಬಾಕಿ ಉಳಿದಿರುವ ಠೇವಣಿ ಹಣವನ್ನು ಗ್ರಾಹಕರು ಅತ್ಯಂತ ಸರಳವಾದ 5 ಹಂತಗಳಲ್ಲಿ ಮರಳಿ ಪಡೆಯಬಹುದಾಗಿದೆ. ಇದರ ಮೊದಲ ಹಂತವಾಗಿ ಗ್ರಾಹಕರು ಆರ್‌ಬಿಐನ ಅಧಿಕೃತ ‘ಉದ್ಗಮ್’ (UDGAM) ಪೋರ್ಟಲ್ ಅಥವಾ ತಮ್ಮ ಬ್ಯಾಂಕಿನ ವೆಬ್‌ಸೈಟ್‌ಗೆ ಭೇಟಿ ನೀಡಿ ಕ್ಲೈಮ್ ಮಾಡದ ಠೇವಣಿಯ ವಿವರಗಳನ್ನು ಹುಡುಕಬೇಕಾಗುತ್ತದೆ. ಎರಡನೇ ಹಂತದಲ್ಲಿ, ಸಂಬಂಧಪಟ್ಟ ಬ್ಯಾಂಕಿನ ಯಾವುದೇ ಹತ್ತಿರದ ಶಾಖೆಗೆ ಭೇಟಿ ನೀಡಬೇಕು (ಅದು ಖಾತೆ ಇರುವ ಮೂಲ ಶಾಖೆಯಾಗಬೇಕೆಂದೇನೂ ಇಲ್ಲ). ಮೂರನೇ ಹಂತವಾಗಿ, ನಿಗದಿತ ಕ್ಲೈಮ್ ಫಾರ್ಮ್‌ನೊಂದಿಗೆ ಆಧಾರ್, ಪಾಸ್‌ಪೋರ್ಟ್, ವೋಟರ್ ಐಡಿ ಅಥವಾ ಡ್ರೈವಿಂಗ್ ಲೈಸೆನ್ಸ್‌ನಂತಹ ಮಾನ್ಯವಾದ ಕೆವೈಸಿ (KYC) ದಾಖಲೆಗಳನ್ನು ಸಲ್ಲಿಸಬೇಕು. ನಾಲ್ಕನೇ ಹಂತದಲ್ಲಿ ಬ್ಯಾಂಕ್ ನಿಮ್ಮ ಕ್ಲೈಮ್ ಅನ್ನು ಕೂಲಂಕಷವಾಗಿ ಪರಿಶೀಲಿಸಿ ಪಾವತಿ ಪ್ರಕ್ರಿಯೆಯನ್ನು ಪೂರ್ಣಗೊಳಿಸುತ್ತದೆ ಮತ್ತು ಅಂತಿಮ ಐದನೇ ಹಂತದಲ್ಲಿ ಗ್ರಾಹಕರು ತಮ್ಮ ಹಣವನ್ನು ಅದಕ್ಕೆ ಬರಬೇಕಾದ ಬಡ್ಡಿಯೊಂದಿಗೆ (ಅನ್ವಯವಾಗುವ ಕಡೆಗಳಲ್ಲಿ) ಸುರಕ್ಷಿತವಾಗಿ ಮರಳಿ ಪಡೆಯಬಹುದು.

ಆರ್‌ಬಿಐ ನಿಯಮಗಳ ಪ್ರಕಾರ, ಬ್ಯಾಂಕುಗಳು ಇಂತಹ ನಿಷ್ಕ್ರಿಯ ಅಥವಾ ಕ್ಲೈಮ್ ಮಾಡದ ಬ್ಯಾಲೆನ್ಸ್‌ಗಳು ಸತತ 10 ವರ್ಷಗಳನ್ನು ಪೂರೈಸಿದ ಮುಂದಿನ ತಿಂಗಳ ಕೊನೆಯ ಕೆಲಸದ ದಿನದಂದು ಅವುಗಳನ್ನು ಡಿಇಎ (DEA) ನಿಧಿಗೆ ವರ್ಗಾಯಿಸುತ್ತವೆ. ಈ ಡಿಇಎ ನಿಧಿಯು ಕೇವಲ ಸುಪ್ತ ಉಳಿತಾಯ ಖಾತೆಗಳನ್ನು ಮಾತ್ರವಲ್ಲದೆ, ಚಾಲ್ತಿ ಖಾತೆಗಳು, ಸ್ಥಿರ ಠೇವಣಿಗಳು, ರಿಕರಿಂಗ್ ಮತ್ತು ಕ್ಯುಮುಲೇಟಿವ್ ಠೇವಣಿಗಳು, ಮಾರ್ಜಿನ್ ಮನಿ, ಭದ್ರತಾ ಠೇವಣಿಗಳು, ಬಾಕಿ ಉಳಿದಿರುವ ಡಿಮ್ಯಾಂಡ್ ಡ್ರಾಫ್ಟ್‌ಗಳು, ಬ್ಯಾಂಕರ್ಸ್ ಚೆಕ್‌ಗಳು, ಕ್ಲೈಮ್ ಮಾಡದ NEFT ಬ್ಯಾಲೆನ್ಸ್‌ಗಳು, ಹೊಂದಾಣಿಕೆಯಾಗದ ATM ಕ್ರೆಡಿಟ್‌ಗಳು, ಬಳಸದ ಪ್ರಿಪೇಯ್ಡ್ ಕಾರ್ಡ್ ಬ್ಯಾಲೆನ್ಸ್‌ಗಳು ಹಾಗೂ ರೂಪಾಯಿಗೆ ಪರಿವರ್ತಿಸಲಾದ ವಿದೇಶಿ ಕರೆನ್ಸಿ ಠೇವಣಿ ಆದಾಯ ಸೇರಿದಂತೆ ಆರ್‌ಬಿಐ ನಿರ್ದಿಷ್ಟಪಡಿಸಿದ ಇನ್ನೂ ಹಲವು ವರ್ಗಗಳ ಕ್ಲೈಮ್ ಮಾಡದ ಮೊತ್ತವನ್ನು ತನ್ನೊಳಗೆ ಒಳಗೊಂಡಿದೆ.

ಕ್ಲೈಮ್ ಮಾಡದ ಠೇವಣಿಗಳನ್ನು ಮರಳಿ ಪಡೆಯಲು ಜನರನ್ನು ಪ್ರೋತ್ಸಾಹಿಸುವ ಸಲುವಾಗಿ, ಆರ್‌ಬಿಐ (RBI) ದೇಶದ ಎಲ್ಲಾ ಜಿಲ್ಲೆಗಳಲ್ಲಿ ಕ್ಲೈಮ್ ಮಾಡದ ಆಸ್ತಿಗಳ ಕುರಿತು ವಿಶೇಷ ಶಿಬಿರಗಳನ್ನು ಆಯೋಜಿಸಿದೆ. ಈ ಜಾಗೃತಿ ಮತ್ತು ಕ್ಲೈಮ್ ಸೌಲಭ್ಯ ಶಿಬಿರಗಳು 2025ರ ಅಕ್ಟೋಬರ್‌ನಿಂದ ಡಿಸೆಂಬರ್ ಅವಧಿಯಲ್ಲಿ ಯಶಸ್ವಿಯಾಗಿ ನಡೆದಿದ್ದು, ಗ್ರಾಹಕರು ಮತ್ತು ಅವರ ವಾರಸುದಾರರು ಅಗತ್ಯ ದಾಖಲಾತಿಗಳನ್ನು ಪೂರ್ಣಗೊಳಿಸಿ ಸುಲಭವಾಗಿ ಕ್ಲೈಮ್ ಪ್ರಕ್ರಿಯೆಯನ್ನು ಆರಂಭಿಸಲು ನೆರವಾಗಿವೆ. ಇದರೊಂದಿಗೆ, ಭವಿಷ್ಯದಲ್ಲಿ ಠೇವಣಿಗಳು ಹೀಗೆ ಅನಾಥವಾಗುವುದನ್ನು ತಡೆಯಲು ಹಳೆಯ ಬ್ಯಾಂಕ್ ಖಾತೆಗಳನ್ನು ನಿಯಮಿತವಾಗಿ ಪರಿಶೀಲಿಸುವಂತೆ, ನಾಮಿನಿ (Nominee) ವಿವರಗಳನ್ನು ಅಪ್‌ಡೇಟ್ ಮಾಡುವಂತೆ ಮತ್ತು ಕೆವೈಸಿ (KYC) ದಾಖಲೆಗಳನ್ನು ನವೀಕರಿಸುವಂತೆ ಕೇಂದ್ರ ಬ್ಯಾಂಕ್ ಗ್ರಾಹಕರಿಗೆ ಸಲಹೆ ನೀಡಿದೆ. ಪ್ರಸ್ತುತ 'ಉದ್ಗಮ್' ಪೋರ್ಟಲ್‌ನಂತಹ ಡಿಜಿಟಲ್ ಪರಿಕರಗಳು ಮತ್ತು ಸರಳೀಕೃತ ಪ್ರಕ್ರಿಯೆಗಳಿಂದಾಗಿ ಮರೆತುಹೋಗಿರುವ ಹಣವನ್ನು ಮರಳಿ ಪಡೆಯುವುದು ಹಿಂದೆಂದಿಗಿಂತಲೂ ಈಗ ಗಮನಾರ್ಹವಾಗಿ ಸುಲಭವಾಗಿದೆ, (ಏಜೆನ್ಸೀಸ್​).