46 ಕೋಟಿ ಚೆಕ್ ವಂಚನೆ ಆರೋಪ: ಹಿರಿಯ ನಟಿ ಅಂಬಿಕಾ ವಿರುದ್ಧ ಕಳ್ಳತನ ಪ್ರಕರಣ ದಾಖಲಿಸಿದ ಸಹೋದರಿ ರಾಧಾ! Actress Ambika

ಚೆನ್ನೈ: ದಕ್ಷಿಣ ಭಾರತದ ಹಿರಿಯ ನಟಿ ಅಂಬಿಕಾ (Actress Ambika) ಹಾಗೂ ಸಹೋದರ ಮಲ್ಲಿಕಾರ್ಜುನ್​ ವಿರುದ್ಧ ಕಿರಿಯ ಸಹೋದರಿ ಹಾಗೂ ನಟಿ ರಾಧಾ ಆರ್ಥಿಕ ವಂಚನೆ ಪ್ರಕರಣವೊಂದನ್ನು ದಾಖಲಿಸಿದ್ದಾರೆಂದು ವರದಿಯಾಗಿದೆ.

ಮಾಹಿತಿ ಪ್ರಕಾರ, ನಟಿ ರಾಧಾ ಸಹಿ ಮಾಡಿದ್ದ ಖಾಲಿ ಚೆಕ್​ (ಬ್ಲ್ಯಾಂಕ್​ ಚೆಕ್​) ಅನ್ನು ಸಹೋದರಿ ಅಂಬಿಕಾ ಹಾಗೂ ಸಹೋದರ ಮಲ್ಲಿಕಾರ್ಜುನ್​ ನಾಯರ್​​, ರಾಧಾಳ ಗಮನಕ್ಕೆ ಬರದಂತೆ ಆ ಚೆಕ್​ ಅನ್ನು ಕಳ್ಳತನ ಮಾಡಿ ಸುಮಾರು 46 ಕೋಟಿ ರೂಪಾಯಿಗಳನ್ನು ಪಡೆಯಲು ಯತ್ನಿಸಿದ್ದರೆಂದು ನಟಿ ಗ್ರೇಟರ್​ ಚೆನ್ನೈ ಪೊಲೀಸ್​ ಆಯುಕ್ತರಲ್ಲಿ ದೂರನ್ನು ಸಲ್ಲಿಸಿದ್ದಾರೆ.

ದೂರಿನಲ್ಲೇನಿದೆ?

ನಟಿ ರಾಧಾ ನೀಡಿರುವ ದೂರಿನಲ್ಲಿ, ನಾನು, ನನ್ನ ವ್ಯವಹಾರವನ್ನು ನಡೆಸಲು ಐಡಿಬಿಐ ಬ್ಯಾಂಕ್​ನಲ್ಲಿ ಖಾತೆ ಹೊಂದಿದ್ದೆನೆ. ಇದು ನನ್ನ ವ್ಯವಹಾರಿಕ ಬ್ಯಾಂಕ್​ ಖಾತೆಯಾಗಿದ್ದು, ಇದರಲ್ಲಿರು ಹಣವನ್ನು ನಾನು ನನ್ನ ಸಿಬ್ಬಂದಿಗಳಿಗೆ ಸಂಬಳ ನೀಡಲು, ತೆರಿಕೆ ಕಟ್ಟಲು ಹಾಗೂ ಗಾರ್ಡ್​ನ್​ ನಿರ್ವಹಣೆಗೆ ಹೆಚ್ಚಿನದಾಗಿ ಬಳಸುತ್ತೇನೆ.

ನಾನು ಎಲ್ಲಿಗಾದರೂ ಪ್ರವಾಸಕ್ಕೆ ಹೋದಾಗ ಖರ್ಚಿಗೆ ಹಾಗೂ ನಿರ್ವಹಣೆ ಮಾಡುವವರಿಗೆ ಸಂಬಳ ನೀಡುವ ಉದ್ದೇಶದಿಂದ ಕೆಲ ಚೆಕ್​ಗಳಿಗೆ ಮುಂಚಿತವಾಗಿ ಸಹಿ ಮಾಡಿ ಇಡುತ್ತೇನೆ. ಆದರೆ 2025 ರಲ್ಲಿ ನನ್ನ ಕಂಪನಿ ಹೆಸರು ಎಆರ್​ಎಸ್​ ಗಾರ್ಡನ್ಸ್ ನಿಂದ ಆರ್​ಆರ್​ ಗಾರ್ಡನ್ಸ್ ಎಂದು ಬದಲಾದ ನಂತರ ಹೊಸ ಬ್ಯಾಂಕ್ ಖಾತೆ ಹಾಗೂ ಹೊಸ ಚೆಕ್​ ಪುಸ್ತಕ ಪಡೆದ ಹಿನ್ನಲೆ, ಈ ಹಳೆಯ ಚೆಕ್​ಗಳ ಬಗ್ಗೆ ನಾನು ಮರೆತು ಹೋಗಿದ್ದೆ.

ಆದರೆ ಸೆಪ್ಟೆಂಬರ್​ 17 ರಂದು ಬ್ಯಾಂಕ್​ನಿಂದ ನನಗೆ ಕರೆ ಬಂದಿದ್ದು, ಅವರು ಹೇಳಿದಂತೆ ನನ್ನ ಹಳೆಯ 5 ಚೆಕ್​ಗಳಲ್ಲಿ ಒಟ್ಟು 46 ಕೋಟಿ ಹಣವನ್ನು ನಮೂದಿಸಿ, ಅದನ್ನು ಅಂಬಿಕಾಳ ಬ್ಯಾಂಕ್​ ಖಾತೆಗೆ ವಾರ್ಗಾಯಿಸುವಂತೆ ಹೇಳಲಾಗುತ್ತಿದೆ ಎಂದಿದ್ದಾರೆ. ಆದರೆ, ನಾನು ಅಂಬಿಕಾಳ ಜೊತೆ ಯಾವುದೇ ಆರ್ಥಿಕ ವ್ಯವಹಾರ ಹೊಂದಿರಲಿಲ್ಲ ಹಾಗೂ ನಾನು ಆ ಚೆಕ್​ ಅನ್ನು ಅವಳಿಗೆ ನೀಡಿರಲಿಲ್ಲ, ಹೀಗಾಗಿ ಯಾವುದೇ ಹಣವನ್ನು ವರ್ಗಾಯಿಸಬೇಡಿ ಎಂದು ಬ್ಯಾಂಕ್​ ಸಿಬ್ಬಂದಿಗಳಿಗೆ ಹೇಳಿದೆ ಎಂದು ರಾಧಾ ತಿಳಿಸಿದ್ದಾರೆ.

ಅಂಬಿಕಾ-ಮಲ್ಲಿಕಾರ್ಜುನ್ ವಿರುದ್ಧ ದೂರು

ಪಿತ್ರಾರ್ಜಿತ ಆಸ್ತಿ ವಿಚಾರದ ಸಂಬಂಧ ಅಕ್ಕ-ತಂಗಿಯ ನಡುವೆ ಮನಃಸ್ಥಾಪವಿದ್ದು, ಈಗ ಈ ಚೆಕ್​ ಕಳ್ಳತನ ಪ್ರಕರಣ ಸಂಬಂಧವನ್ನು ಮತ್ತಷ್ಟು ಬಿಗಡಾಯಿಸಿದೆ. ನಟಿ ರಾಧಾ ಹೇಳುವಂತೆ ಇಬ್ಬರೂ ಒಂದೇ ಮನೆಯಲ್ಲಿ ವಾಸಿಸುತ್ತಿದ್ದು, ತಾವು ಚೆನ್ನೈನಿಂದ ದೂರ ಹೋಗಿದ್ದ ಸಂದರ್ಭದಲ್ಲಿ ಸಹೋದರಿ ಅಂಬಿಕಾ ಹಾಗೂ ಸಹೋದರ ಮಲ್ಲಿಕಾರ್ಜುನ್ ಸೇರಿಕೊಂಡು, ತನ್ನ ಕೋಣೆಯನ್ನು ಅಕ್ರಮವಾಗಿ ಪ್ರವೇಶಿಸಿ, ಖಾಲಿ ಚೆಕ್​ಗಳನ್ನು ಕಳ್ಳತನ ಮಾಡಿ, ತಮಗೆ ಆರ್ಥಿಕ ವಂಚನೆ ಮಾಡಲು ಮುಂದಾಗಿದ್ದಾರೆಂದು ಹೇಳಿದ್ದಾರೆ.

ಈ ಘಟನೆ ನನ್ನ ಗಮನಕ್ಕೆ ಬರುತ್ತಲೇ, ಪೊಲೀಸರಲ್ಲಿ ದೂರನ್ನು ದಾಖಲಿಸಿದ್ದು, ಆರೋಪಿಗಳ ವಿರುದ್ಧ ಕಠಿಣ ಕ್ರಮವನ್ನು ಕೈಗೊಳ್ಳಬೇಕೆಂದು ನಟಿ ರಾಧಾ ತಾವು ಸಲ್ಲಿಸಿರುವ ದೂರಿನಲ್ಲಿ ಕೋರಿದ್ದಾರೆಂದು ತಿಳಿದು ಬಂದಿದೆ, (ಏಜೆನ್ಸೀಸ್​).