ಬಂಟ್ವಾಳ ಕಸ್ಬ ಗ್ರಾಮದ ಚೆಂಡ್ತಿಮಾರ್ ನಿವಾಸಿ ಸಿ.ಮುತ್ತಪ್ಪ ಪೂಜಾರಿ ವೃತ್ತಿಯಲ್ಲಿ ಕೃಷಿಕ. ಕೆಲವು ವರ್ಷಗಳ ಕಾಲ ಬೀಡಿ ಗುತ್ತಿಗೆ ವಹಿಸಿಕೊಂಡಿದ್ದರು. ಸ್ವಾತಂತ್ರ್ಯ ಹೋರಾಟಗಾರ ಡಾ.ಅಮ್ಮೆಂಬಳ ಬಾಳಪ್ಪ ಅವರ ಒಡನಾಡಿ. ದಿನಪತ್ರಿಕೆಯನ್ನು ಓದುವುದೆಂದರೆ ಅವರಿಗೆ ಎಲ್ಲಿಲ್ಲದ ಪ್ರೀತಿ. ತಾನು ಯುವಕನಾಗಿದ್ದಾಗ ತಮ್ಮ ಮನೆಯ ಸಮೀಪದ ಒಂದು ಮನೆಗೆ ಪತ್ರಿಕೆ ಬರುತ್ತಿತ್ತು. ಸ್ಥಳೀಯರು ಓದಲು ಅದೇ ಪತ್ರಿಕೆಯನ್ನು ಅವಲಂಬಿಸಿದ್ದುದರಿಂದ ಮುತ್ತಪ್ಪ ಪೂಜಾರಿಗೆ ಎಲ್ಲ ಸುದ್ದಿಗಳನ್ನು ಓದಲು ಆಗುತ್ತಿರಲಿಲ್ಲ. ಅದಕ್ಕಾಗಿ ತಮ್ಮ ಮನೆಗೆ ಪತ್ರಿಕೆಯನ್ನು ಹಾಕಿಸಲು ಆರಂಭಿಸಿದ್ದರು. ಪತ್ರಿಕೆಯ ಮೇಲೆ ಅಪಾರವಾದ ಪ್ರೀತಿ, ಅಭಿಮಾನ ಇದ್ದುದರಿಂದ ಓದಿದ ಬಳಿಕ ಎಲ್ಲೆಂದರಲ್ಲಿ ಎಸೆಯದೆ ಜತನದಿಂದ ಕಾಪಾಡಿಕೊಂಡು ಬಂದಿದ್ದಾರೆ.
