‘ಮೇನ್ಸ್ಟ್ರೀಮ್ ಹೀರೋಗಳ ಜತೆಗೆ ಸಿನಿಮಾ ಮಾಡಿದರೆ, ಅವರೊಂದಿಗೆ ನಾಯಕಿಯಾಗಿ ನಟಿಸಿದರಷ್ಟೇ ನಾಯಕಿ ಎಂಬ ಹಣೆಪಟ್ಟಿ ಚಾಲ್ತಿಯಲ್ಲಿದೆ. ಅದಕ್ಕೆ ದುರದೃಷ್ಟ ಎನ್ನಬೇಕಾಗುತ್ತದೆ. ಹಾಗಂತ ಬರೀ ದೊಡ್ಡದೊಡ್ಡ ನಾಯಕರ ಸಿನಿಮಾ ಸಲುವಾಗಿ ಕಾಯುತ್ತ ಕುಳಿತರೆ, ನನ್ನ ಕರಿಯರ್ ಏನಾಗಬೇಕು? ಬಂದಿರುವ ಅವಕಾಶಗಳನ್ನೆಲ್ಲ ಬದಿಗಿಟ್ಟರೆ ಮೂರ್ಖತನ ಅನಿಸುತ್ತದೆ. ನಮ್ಮ ಚಿತ್ರಕ್ಕೆ ನೀವೇ ನಾಯಕಿ ಆಗಬೇಕೆಂದು ಸಾಕಷ್ಟು ನಿರ್ದೇಶಕರು ಬರ್ತಾರೆ. ಹಾಗೆ ಬಂದ ಹತ್ತೂ ಸಿನಿಮಾ ಒಪ್ಪಿಕೊಳ್ಳಲು ಆಗುವುದಿಲ್ಲ. ಕಣ್ಣು ಮುಚ್ಚಿ ಸಹಿ ಹಾಕುವುದಿಲ್ಲ. ಆ 10ರ ಪೈಕಿ ಮೂರು ಸಿನಿಮಾಗಳನ್ನು ಕಥೆ ಸಲುವಾಗಿ ಓಕೆ ಅಂದರೆ, ಇನ್ನೆರಡು ಸಿನಿಮಾಗಳು ಬೇರೆಬೇರೆ ಕಾರಣಕ್ಕೆ ಒಪ್ಪಿರುತ್ತೇನೆ. ಕೆಲ ಸಿನಿಮಾಗಳಲ್ಲಿ ನಮ್ಮ ಪಾತ್ರದ ಪ್ರಾಮುಖ್ಯತೆ ಇರುವುದಿಲ್ಲ. ಆದರೂ ಆ ಸಿನಿಮಾ ಮಾಡಬೇಕಾಗುತ್ತದೆ. ಆ ಚಿತ್ರದ ಹೀರೋ ಆಗಿರಬಹುದು, ನಿರ್ದೇಶಕರಿರಬಹುದು ... ಅದರಿಂದ ನಮ್ಮ ಮುಂದಿನ ಸಿನಿಮಾಕ್ಕೆ ಸಹಾಯ ಆಗುತ್ತದೆ ಎಂಬ ಕಾರಣವೂ ಇದೆ. ನಮಗೆ ನಾವೇ ಮಾಡಿಕೊಳ್ಳುವ ಮೋಸ ಎನ್ನುವುದಕ್ಕಿಂತ ಕಾಂಪ್ರಮೈಸ್ ಎನ್ನಬಹುದು’ ಎಂಬುದು ಅದಿತಿ ಮಾತು.
