ಬೆಂಗಳೂರು: ‘ಇದು ನನ್ನೊಬ್ಬನ ಸಮಸ್ಯೆ ಅಲ್ಲ, ಚಿತ್ರರಂಗದ ಸಮಸ್ಯೆ’.. ಅಷ್ಟು ಹೇಳಿ ಒಂದು ನಿಮಿಷ ಮೌನವಾದರು ನಿರ್ದೇಶಕ ಶಶಾಂಕ್. ಅವರ ನಿರ್ದೇಶನದ ‘ಲವ್ 360’ ಚಿತ್ರವು ಕಳೆದ ವಾರವಷ್ಟೇ ಬಿಡುಗಡೆಯಾಗಿದೆ. ಆದರೆ, ಚಿತ್ರಕ್ಕೆ ಜನ ಬರುತ್ತಿಲ್ಲ, ಕಲೆಕ್ಷನ್ ಇಲ್ಲ ಎಂದು ಶಶಾಂಕ್ ಬೇಸರಗೊಂಡಿದ್ದರು. ಈ ಸಂಬಂಧ ಭಾನುವಾರ ಬೆಳಿಗ್ಗೆ ಸೋಷಿಯಲ್ ಮೀಡಿಯಾದಲ್ಲಿ ವಿಡಿಯೋ ಹಾಕಿದ್ದರು. ಈ ವಿಡಿಯೋಗೆ ಯೋಗರಾಜ್ ಭಟ್, ಉಪೇಂದ್ರ ಸೇರಿದಂತೆ ಕೆಲವರು ಸ್ಪಂದಿಸಿದ್ದರು. ಆದರೆ, ಚಿತ್ರರಂಗದ ಬಹಳಷ್ಟು ಜನ ಈ ಬಗ್ಗೆ ಸ್ಪಂದಿಸದಿದ್ದದ್ದು, ಶಶಾಂಕ್ಗೆ ಸಹಜವಾಗಿಯೇ ಆಶ್ಚರ್ಯ ತಂದಿದೆ. ‘ಕಳೆದ 15 ವರ್ಷಗಳಲ್ಲಿ ಹಲವು ಚಿತ್ರಗಳನ್ನು ಮಾಡಿದ್ದೇನೆ. ನನ್ನ ಚಿತ್ರಕ್ಕೆ ಜನ ಬರುತ್ತಿಲ್ಲ ಎಂದು ಪ್ರಾಮಾಣಿಕವಾಗಿ ಹೇಳಿಕೊಂಡಿದ್ದೇನೆ. ಇದು ಬರೀ ನನ್ನ ಚಿತ್ರದ ಸಮಸ್ಯೆ ಅಲ್ಲ. ಇಡೀ ಚಿತ್ರರಂಗದ ಸಮಸ್ಯೆ. ಒಂದು ಚಿತ್ರಕ್ಕೆ ಒಳ್ಳೆಯ ಪ್ರತಿಕ್ರಿಯೆ ವ್ಯಕ್ತವಾದಾಗಲೂ ಪ್ರೇಕ್ಷಕರು ಬರದಿರುವುದು ಯಾಕೆ ಎಂದು ಯೋಚಿಸಬೇಕು. ಈ ಕುರಿತು ಕೆಲವು ಆತ್ಮೀಯರು ಪ್ರತಿಕ್ರಿಯಿಸಿದ್ದು ಬಿಟ್ಟರೆ, ಮಿಕ್ಕಂತೆ ಯಾರೂ ತಲೆ ಕೆಡಿಸಿಕೊಳ್ಳಲಿಲ್ಲ’ ಎನ್ನುತ್ತಾರೆ ಶಶಾಂಕ್.
