ಸಿನಿಮಾ ಆಗಲಿದೆ ಶಾಹ್​ ಬಾನೊ ಕೇಸ್​; ನಾಲ್ಕು ದಶಕಗಳ ಹಿಂದಿನ ಪ್ರಕರಣಕ್ಕೆ ಯಾಮಿ ಗೌತಮ್​ ಮರುಜೀವ

ಇವತ್ತು ತ್ರಿವಳಿ ತಲಾಖ್​ ಕಾನೂನು ಬಾಹಿರವಾಗಿರಬಹುದು. ಆದರೆ, ಹಿಂದೆ ತ್ರಿವಳಿ ತಲಾಖ್​ ನೀಡಿದ ಬಳಿಕ ಮಾಜಿ ಪತ್ನಿಗೆ ಜೀವನಾಂಶವನ್ನೂ ನೀಡುತ್ತಿರಲಿಲ್ಲ. ಹೀಗೆ ತ್ರಿವಳಿ ತಲಾಖ್​ ನೀಡಿದ ಪತಿಯ ವಿರುದ್ಧ ಕೋರ್ಟ್​ ಮೆಟ್ಟಿಲೇರಿದ್ದ ಶಾಹ್​ ಬಾನೊ ಪ್ರಕರಣ 1985ರಲ್ಲಿ ದೇಶಾದ್ಯಂತ ಸಂಚಲನ ಸೃಷ್ಟಿಸಿತ್ತು.

1978ರಲ್ಲಿ ಮಧ್ಯಪ್ರದೇಶದ ಇಂದೋರ್​ನ ಮೊಹಮ್ಮದ್​ ಅಹ್ಮದ್​ ಖಾನ್​, ಪತ್ನಿ ಶಾಹ್​ ಬಾನೊಗೆ ತ್ರಿವಳಿ ತಲಾಖ್​ ನೀಡಿದ್ದರು. ಅದರ ವಿರುದ್ಧ 62 ವರ್ಷದ ಶಾಹ್​ ಬಾನೊ ಕೋರ್ಟ್​ ಮೆಟ್ಟಿಲೇರಿದ್ದರು. ದಿನಕಳೆದಂತೆ ಪ್ರಕರಣ ಸುಪ್ರೀಮ್​ ಕೋರ್ಟ್​ವರೆಗೂ ಹೋಯಿತು. 1985ರಲ್ಲಿ ಶಾಹ್​ ಬಾನೊ ಪರ ಸುಪ್ರೀಮ್​ ಕೋರ್ಟ್​ ತೀರ್ಪು ನೀಡಿತ್ತು. ತೀರ್ಪಿನ ವಿರುದ್ಧ ದೇಶಾದ್ಯಂತ ಮುಸ್ಲಿಂ ಪರ ಸಂಟನೆಗಳು ಹೋರಾಟ ನಡೆಸಿದವು. ಇದೀಗ ನಲವತ್ತು ವರ್ಷಗಳ ಬಳಿಕ ಇದೇ ಇಡೀ ಪ್ರಕರಣಕ್ಕೆ ಸಿನಿಮಾ ರೂಪ ನೀಡಲು "ದ ಫ್ಯಾಮಿಲಿ ಮ್ಯಾನ್​', "ದ ಟ್ರಯಲ್​' ಸೇರಿ ಕೆಲ ವೆಬ್​ಸರಣಿ ಮತ್ತು ಚಿತ್ರಗಳನ್ನು ನಿರ್ದೇಶಿಸಿರುವ ಸುಪರ್ಣ್​ ವರ್ಮಾ ಮುಂದಾಗಿದ್ದಾರೆ.

ವಿಶೇಷ ಅಂದರೆ ಶಾಹ್​ ಬಾನೊ ಪಾತ್ರದಲ್ಲಿ ಬಾಲಿವುಡ್​ ನಟಿ ಯಾಮಿ ಗೌತಮ್​ ನಟಿಸಲಿದ್ದಾರೆ. ಕಳೆದ ವರ್ಷ ರಿಲೀಸ್​ ಆದ "ಆರ್ಟಿಕಲ್​ 370' ಚಿತ್ರದ ಯಶಸ್ಸಿನಲೆಯಲ್ಲಿ ತೇಲುತ್ತಿರುವ ಅವರು, ಆ ಬಳಿಕ ಮುದ್ದಾದ ಗಂಡು ಮಗುವಿಗೆ ಜನ್ಮ ನೀಡಿದ್ದರು. ಹೀಗಾಗಿ ಖಾಸಗಿ ಜೀವನದತ್ತ ಹೆಚ್ಚು ಗಮನ ಹರಿಸಿದ್ದರು. ಇದೀಗ ಶಾಹ್​ ಬಾನೊ ಕೇಸ್​ ಕುರಿತ ಚಿತ್ರದ ಮೂಲಕ ಮತ್ತೆ ಕಮ್​ಬ್ಯಾಕ್​ ಮಾಡಲಿದ್ದು, ಈಗಾಗಲೇ ಪಾತ್ರಕ್ಕಾಗಿ ಸಿದ್ಧತೆ ಪ್ರಾರಂಭಿಸಿದ್ದಾರೆ.