ಹೀಗೆ ಚಿತ್ರರಂಗದವರು ತಮ್ಮ ಮುಂದಿರುವ ಹಲವು ಸವಾಲುಗಳ ಬಗ್ಗೆ ತಮ್ಮದೇ ರೀತಿಯಲ್ಲಿ ಹೇಳಿಕೊಳ್ಳುತ್ತಾರೆ. ಹೌದು, ಜನ ಚಿತ್ರಮಂದಿರಗಳತ್ತ ಬಂದರೆ, ಪರಿಸ್ಥಿತಿ ಸ್ವಲ್ಪ ಸುಧಾರಿಸಬಹುದು ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ, ಜನ ಮುಂಚಿನಷ್ಟು ಸಲೀಸಾಗಿ ಚಿತ್ರಮಂದಿರಗಳತ್ತ ಬರುವುದು, ಚಿತ್ರಗಳನ್ನು ನೋಡುವುದು ಸ್ವಲ್ಪ ಕಷ್ಟವೇ ಎಂದು ಅಂದಾಜಿಸಲಾಗುತ್ತಿದೆ. ಅದಕ್ಕೆ ಖಂಡಿತವಾಗಿಯೂ ಕರೊನಾ ಕಾರಣವಲ್ಲ ಎಂಬುದು ಗೊತ್ತಿರಲಿ. ಕರೊನಾ ನಂತರದ ಕಾಲಘಟ್ಟದಲ್ಲಿ ಸಾಕಷ್ಟು ಬದಲಾವಣೆಯಾಗಿವೆ. ಲಾಕ್ಡೌನ್ನಿಂದಾಗಿ ಜನ ಮನೆಯಲ್ಲಿ ಕುಳಿತು ಒಟಿಟಿಗಳಲ್ಲಿ ದೇಶ-ವಿದೇಶಗಳ ಚಿತ್ರಗಳನ್ನು ವೀಕ್ಷಿಸಿದ್ದಾರೆ. ವಿಭಿನ್ನ ಕಲ್ಪನೆಯ, ವಿಭಿನ್ನ ನೆಲೆಗಟ್ಟಿನ, ವಿಭಿನ್ನ ಶೈಲಿಗಳ ಚಿತ್ರಗಳನ್ನು ಅವರು ನೋಡಿದ್ದಾರೆ. ಒಂದೇ ತರಹದ ಚಿತ್ರಗಳನ್ನು ನೋಡಿ ಸುಸ್ತಾಗಿದ್ದವರು, ಬೇರೆ ಭಾಷೆಯ ಚಿತ್ರಗಳನ್ನು ನೋಡಿ, ಹೀಗೂ ಸಿನಿಮಾ ಮಾಡಬಹುದಾ ಎಂದು ಬೆರಗಾಗಿದ್ದಾರೆ. ಇದೆಲ್ಲದರಿಂದ ಅವರ ಅಭಿರುಚಿ, ಆಸಕ್ತಿ ಬದಲಾಗಿದೆ. ಹೀಗಿರುವಾಗ, ಅದೇ ಹಳೆಯ ಫಾಮುಲಾ ಚಿತ್ರಗಳು, ಯಾರಿಗೂ ರುಚಿ ಎನಿಸುವುದಿಲ್ಲ.
