ಲಾಕ್​ಡೌನ್​ನಲ್ಲಿ ಚಾರ್ಮಿ ಮತ್ತು ಪುರಿ ಜಗನ್ನಾಥ್​ ಏನ್ಮಾಡ್ತಿದ್ದರು?

ಟಾಲಿವುಡ್​ ನಟಿ ಚಾರ್ಮಿ ನಿರ್ಮಾಣದಲ್ಲಿ ಗುರುತಿಸಿಕೊಂಡಿದ್ದರೂ, ಅವರು ನಿರ್ಮಾಣದ ಯಾವ ಚಿತ್ರ ಸಹ ಗೆದ್ದಿರಲಿಲ್ಲ. ಕಳೆದ ವರ್ಷ ಬಿಡುಗಡೆಯಾದ 'ಇಸ್ಮಾರ್ಟ್​ ಶಂಕರ್​' ಬರುವ ತನಕ. ಪುರಿ ಜಗನ್ನಾಥ್​ ನಿರ್ದೇಶನದಲ್ಲಿ ಈ ಚಿತ್ರ ನಿರ್ಮಿಸಿದ್ದ ಚಾರ್ಮಿ, ಮೊದಲ ಬಾರಿಗೆ ಯಶಸ್ಸು ಕಂಡರು ಎಂದರೆ ತಪ್ಪಿಲ್ಲ.

ಈ ಚಿತ್ರದಿಂದ ಕನ್ನಡದ ನಟಿ ನಭಾ ನಟೇಶ್​, ಟಾಲಿವುಡ್​ನಲ್ಲಿ ಬೇಡಿಕೆಯ ನಟಿಯಾದರು. ಇನ್ನು ಚಿತ್ರ ನಿರ್ಮಿಸಿದ್ದ ಚಾರ್ಮಿ ಕೌರ್​ಗೆ ಒಂದಿಷ್ಟು ಹಣ ನೋಡುವಂತಾಯಿತು. ಅಷ್ಟೇ ಅಲ್ಲ, ಈ ಯಶಸ್ಸಿನಿಂದ ಇನ್ನಷ್ಟು ದೊಡ್ಡ ಕನಸುಗಳನ್ನೂ ಕಾಣುವಂತಾಯಿತು.

ಇದನ್ನೂ ಓದಿ: ಖ್ಯಾತ ನಿರ್ದೇಶಕನ ವೆಬ್​ಸಿರೀಸ್​ನಲ್ಲಿ ಸೂರ್ಯ, ಫಹಾದ್​ ಫಾಸಿಲ್​ ನಾಯಕರು!?

ಆ ಚಿತ್ರ ಬಿಡುಗಡೆಯಾಗಿ ಇಂದಿಗೆ ಒಂದು ವರ್ಷವಾಗಿದ್ದು, ಈ ಹಿನ್ನೆಲೆಯಲ್ಲಿ ಮಾತನಾಡಿರುವ ಚಾರ್ಮಿ, 'ಅಂಥದ್ದೊಂದು ಯಶಸ್ಸಿಗೆ ಬಹಳ ದಿನಗಳಿಂದ ಕಾದಿದ್ದೆವು. ಆದರೆ, ಕಾರಣಾಂತರಗಳಿಂದ ಹಿಂದಿನ ಚಿತ್ರಗಳು ಅಷ್ಟು ಯಶಸ್ಸಾಗಲಿಲ್ಲ. ಈ ಚಿತ್ರ ಮಾತ್ರ ನಮಗೆ ಇನ್ನಷ್ಟು ಚಿತ್ರಗಳನ್ನು ಮಾಡುವುದಕ್ಕೆ ಹುಮ್ಮಸ್ಸು ನೀಡಿತು' ಎಂದು ಹೇಳಿಕೊಂಡಿದ್ದಾರೆ ಚಾರ್ಮಿ.

ಈ ಮಧ್ಯೆ ಅವರು ಲಾಕ್​ಡೌನ್​ ಸಮಯವನ್ನು ಹೇಗೆ ಕಳೆದರು ಎಂಬ ಪ್ರಶ್ನೆಗೆ, ಪುರಿ ಜಗನ್ನಾಥ್​ ಹೇಳುತ್ತಿದ್ದ ಕಥೆಗಳನ್ನು ಕೇಳುತ್ತಿದ್ದರಂತೆ. ಈ ಕುರಿತು ಮಾತನಾಡಿರುವ ಅವರು, 'ಪುರಿ ಕಳೆದ ನಾಲ್ಕು ತಿಂಗಳುಗಳಿಂದ ಬರೆಯುತ್ತಲೇ ಇದ್ದಾರೆ. ಈ ಅವಧಿಯಲ್ಲಿ ಅದೆಷ್ಟು ಕಥೆ-ಚಿತ್ರಕಥೆಗಳನ್ನು ಅವರು ಬರೆದಿಟ್ಟುಕೊಂಡಿದ್ದಾರೋ ಗೊತ್ತಿಲ್ಲ' ಎನ್ನುತ್ತಾರೆ ಚಾರ್ಮಿ.

ಇದನ್ನೂ ಓದಿ: ನಿಮ್ಮನ್ನ ಸ್ಕ್ರೀನ್​ ಮೇಲೆ ನೋಡೋದು ಯಾವಾಗ? ಈ ಪ್ರಶ್ನೆಗೆ ಏನಂದ್ರು ರಾಧಿಕಾ?

ಈ ಕಥೆಗಳನ್ನೆಲ್ಲಾ ಕೇಳಿ ಖುಷಿಪಟ್ಟಿರುವ ಚಾರ್ಮಿ, 'ಮುಂದಿನ ದಿನಗಳಲ್ಲಿ ಅವೆಲ್ಲಾ ಚಿತ್ರಗಳಾಗಿ ಬರಲಿವೆ. ಈ ಸಮಯದಲ್ಲಿ ನಾವು ಅದೆಷ್ಟು ಪ್ರಿಪೇರ್​ ಆಗಿದ್ದೇವೆ ಎಂದರೆ, ಮುಂದಿನ 10 ವರ್ಷಗಳಿಗಾಗುವಷ್ಟು ಕಂಟೆಂಟ್​ ನಮ್ಮ ಬಳಿ ಇದೆ. ಮುಂದಿನ ದಿನಗಳಲ್ಲಿ ಒಂದರ ಹಿಂದೊಂದು ಚಿತ್ರವನ್ನು ಘೋಷಿಸುತ್ತೇವೆ' ಎಂದು ಹೇಳಿಕೊಂಡಿದ್ದಾರೆ ಚಾರ್ಮಿ.

ಬರೀ ಚಿತ್ರಗಳಷ್ಟೇ ಅಲ್ಲ, ಓಟಿಟಿಗೆ ಸಹ ಒಂದಿಷ್ಟು ಕಂಟಂಟ್​ ರೆಡಿ ಮಾಡಿಟ್ಟುಕೊಂಡಿದ್ದಾರಂತೆ ಪುರಿ ಜಗನ್ನಾಥ್​. 'ಓಟಿಟಿಯಿಂದ ಬಹಳಷ್ಟು ನಿರ್ಮಾಪಕರಿಗೆ ಸಹಾಯವಾಗುತ್ತಿದೆ. ನಮಗೂ ಈ ವೇದಿಕೆಯಲ್ಲಿ ಏನಾದರೂ ಮಾಡಬೇಕು ಎಂಬ ಆಸೆ ಇದೆ. ಅದಕ್ಕೆ ಸರಿಯಾಗಿ ಪುರಿ ಜಗನ್ನಾಥ್​ ಒಂದಿಷ್ಟು ಕಥೆ ಸಿದ್ಧ ಮಾಡಿಟ್ಟುಕೊಂಡಿದ್ದಾರೆ. ಒಂದಿಷ್ಟು ಹೊಸ ನಿರ್ದೇಶಕರಿಂದ ಕೆಲಸ ಮಾಡಿಸುವ ಯೋಚನೆಯೂ ಇದೆ' ಎನ್ನುತ್ತಾರೆ ಅವರು.

https://www.vijayavani.net/kangana-claims-aditya-chopra-threatened-her/