ಚಿತ್ರರಂಗ ಮಾತ್ರವಲ್ಲ ಚೆನ್ನೈ ಮಹಾನಗರವನ್ನೇ ತೊರೆಯಲು ವಿಜಯ್​ ಆಂಟನಿ ನಿರ್ಧಾರ: ಕಾರಣ ಕೇಳಿದ್ರೆ ಹುಬ್ಬೇರೋದು ಖಚಿತ! Vijay Antony

Vijay Antony : ಸಂಗೀತ ನಿರ್ದೇಶಕ, ಗಾಯಕ, ನಟ ಹಾಗೂ ನಿರ್ಮಾಪಕರಾಗಿ ಚಲನಚಿತ್ರ ರಂಗದಲ್ಲಿ ತಮ್ಮದೇ ಆದ ಛಾಪು ಮೂಡಿಸಿರುವ ವಿಜಯ್ ಆಂಟನಿ ಅವರು ಇತ್ತೀಚೆಗೆ ಹಲವು ಆಸಕ್ತಿದಾಯಕ ವಿಷಯಗಳನ್ನು ಮಾಧ್ಯಮಗಳ ಮುಂದೆ ಹಂಚಿಕೊಂಡಿದ್ದಾರೆ. ಭಿಕ್ಷುಕ, ವಿಜಯ ರಾಘವನ್​ ಹಾಗೂ ತಿಮಿರು ಪುಡಿಚವನ್​ನಂತಹ ಸೂಪರ್​ ಹಿಟ್​ ಸಿನಿಮಾಗಳ ಮೂಲಕ ತಮಿಳು ಮಾತ್ರವಲ್ಲದೇ ಎಲ್ಲಾ ಭಾಷೆಯ ಸಿನಿ ಪ್ರೇಮಿಗಳಿಗೆ ಅತ್ಯಂತ ಹತ್ತಿರವಾಗಿರುವ ವಿಜಯ್​ ಆಂಟನಿ, ಶಶಿ ನಿರ್ದೇಶನದಲ್ಲಿ ಇದೇ ತಿಂಗಳ 19 ರಂದು ವಿಶ್ವಾದ್ಯಂತ ಬಿಡುಗಡೆಯಾಗಲಿರುವ ತಮ್ಮ ನೂತನ ಚಿತ್ರ 'ನೂರುಸಾಮಿ' ಪ್ರಚಾರದ ಅಂಗವಾಗಿ ನಡೆದ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದರು. ಈ ಸಂದರ್ಭದಲ್ಲಿ ವಿಜಯ್ ಅವರು ತಮ್ಮ ವೈಯಕ್ತಿಕ ಜೀವನ ಹಾಗೂ ಭವಿಷ್ಯದ ಯೋಜನೆಗಳ ಕುರಿತು ಹಲವು ಸ್ವಾರಸ್ಯಕರ ಸಂಗತಿಗಳನ್ನು ಬಿಚ್ಚಿಟ್ಟಿದ್ದಾರೆ.

ಮುಂದಿನ ಎರಡರಿಂದ ಮೂರು ವರ್ಷಗಳಲ್ಲಿ ತಾವು ಚಿತ್ರರಂಗ ಹಾಗೂ ಚೆನ್ನೈ ಮಹಾನಗರವನ್ನು ಸಂಪೂರ್ಣವಾಗಿ ತೊರೆದು, ಹಳ್ಳಿಯೊಂದರಲ್ಲಿ ನೆಲೆಸಲು ನಿರ್ಧರಿಸಿರುವುದಾಗಿ ವಿಜಯ್ ಆಂಟನಿ ಸ್ಪಷ್ಟಪಡಿಸಿದ್ದಾರೆ. ಬಣ್ಣದ ಪ್ರಪಂಚಕ್ಕಿಂತಲೂ ತಮಗೆ ಅತ್ಯಂತ ಶಾಂತಿಯುತ ಹಾಗೂ ಸರಳ ಜೀವನವನ್ನು ನಡೆಸುವುದು ಹೆಚ್ಚು ಇಷ್ಟವಾಗಿದ್ದು, ಪ್ರಸ್ತುತ ಕೇವಲ ವೃತ್ತಿಪರ ಕಾರಣಗಳಿಗಾಗಿ ಮಾತ್ರ ಚೆನ್ನೈನಲ್ಲಿ ಉಳಿದುಕೊಂಡಿರುವುದಾಗಿ ಅವರು ತಿಳಿಸಿದ್ದಾರೆ.

ಜೋಹೋ ಕಾರ್ಪೊರೇಷನ್ (Zoho Corporation) ಸಂಸ್ಥಾಪಕ ಶ್ರೀಧರ್ ವೆಂಬು ಅವರು ತೆಂಕಾಸಿಗೆ ವಲಸೆ ಹೋಗಿ ನೆಲೆಸಿದ ಮಾದರಿಯಲ್ಲೇ, ತಾವು ಕೂಡ ಪೊಲ್ಲಾಚಿಯಂತಹ ಪ್ರಶಾಂತವಾದ ಸ್ಥಳದಲ್ಲಿ ನೆಲೆಸಲು ಬಯಸುತ್ತಿರುವುದಾಗಿ ವಿಜಯ್ ಆಂಟನಿ ಹೇಳಿದ್ದಾರೆ. ಈ ಉದ್ದೇಶಕ್ಕಾಗಿಯೇ ಅವರು ಈಗಾಗಲೇ ದೂರದ ಹಳ್ಳಿಗಳಲ್ಲಿ ಕೃಷಿ ಭೂಮಿಯನ್ನು ಖರೀದಿಸಲು ಹುಡುಕಾಟ ನಡೆಸುತ್ತಿದ್ದು, ತಮ್ಮ 'ನೂರುಸಾಮಿ' ಚಿತ್ರದ ಚಿತ್ರೀಕರಣ ನಡೆದ ಕಲ್ಲಕುರಿಚ್ಚಿಯ ವಾತಾವರಣ ತಮಗೆ ತುಂಬಾ ಇಷ್ಟವಾಗಿದೆ ಎಂದೂ ಸಹ ಅವರು ಹಂಚಿಕೊಂಡಿದ್ದಾರೆ.

ನಗರಗಳ ಮಾಲ್‌ಗಳು ಮತ್ತು ಆಡಂಬರದ ಜೀವನಕ್ಕಿಂತ ಹಳ್ಳಿಗಾಡಿನ ಶುದ್ಧ ಗಾಳಿ, ಮನುಷ್ಯರ ನಡುವಿನ ಬಾಂಧವ್ಯ ಹಾಗೂ ನೆಮ್ಮದಿಯೇ ಸಾಟಿಯಿಲ್ಲದ್ದು ಎಂದು ವಿಜಯ್ ಆಂಟನಿ ಬಲವಾಗಿ ನಂಬುತ್ತಾರೆ. ಮೂರು ವರ್ಷಗಳ ಹಿಂದೆ ನಡೆದ ಅವರ ಮಗಳ ಹಠಾತ್ ಸಾವು ವಿಜಯ್ ಆಂಟನಿ ಅವರನ್ನು ಮಾನಸಿಕವಾಗಿ ತೀವ್ರ ಖಿನ್ನತೆಗೆ ದೂಡಿತ್ತು. ಈ ವೈಯಕ್ತಿಕ ದುರಂತದ ನಂತರವೇ ಅವರು ತಮ್ಮ ಸಿನಿಮಾಗಳ ವೇಗವನ್ನು ಕಡಿಮೆ ಮಾಡಿಕೊಂಡರು. ಬೆಳ್ಳಿಪರದೆಯ ಮೇಲೆ ಎಷ್ಟೇ ಸ್ಟಾರ್‌ಡಮ್ ಇದ್ದರೂ, ಜೀವನದಲ್ಲಿ ಮಾನಸಿಕ ನೆಮ್ಮದಿ ಮತ್ತು ಸಂತೋಷವೇ ಎಲ್ಲಕ್ಕಿಂತ ಮುಖ್ಯ ಎಂಬುದನ್ನು ಅರಿತುಕೊಂಡ ಬಳಿಕವೇ ಅವರು ಈ ನಿರ್ಧಾರಕ್ಕೆ ಬಂದಿದ್ದಾರೆ ಎನ್ನಲಾಗಿದೆ.

ಪ್ರಸ್ತುತ ಅವರು ಈಗಾಗಲೇ ಒಪ್ಪಿಕೊಂಡಿರುವ ಚಿತ್ರಗಳ ಕೆಲಸಗಳನ್ನು ಪೂರ್ಣಗೊಳಿಸಿದ ನಂತರ ಚಿತ್ರರಂಗವನ್ನು ಶಾಶ್ವತವಾಗಿ ತೊರೆಯುವ ಸಾಧ್ಯತೆಗಳಿವೆ. ಅವರ ಈ ನಿರ್ಧಾರ ಒಂದು ಕಡೆ ಅಭಿಮಾನಿಗಳಿಗೆ ತೀವ್ರ ಆಘಾತವನ್ನು ಉಂಟುಮಾಡಿದ್ದರೆ, ಮತ್ತೊಂದು ಕಡೆ ಅವರು 'ಅಪ್ಪ ಕುಟ್ಟಿ' ಎಂಬ ಹೊಸ ಎಮೋಷನಲ್ ಡ್ರಾಮಾ ಸಿನಿಮಾವನ್ನು ಘೋಷಿಸಿದ್ದಾರೆ. ಈ ನಡುವೆ, ಶೀಘ್ರದಲ್ಲೇ ತೆರೆಗೆ ಬರಲಿರುವ 'ನೂರುಸಾಮಿ' ಚಿತ್ರವು ರಕ್ತ, ಬೆವರು ಮತ್ತು ಬಾಂಧವ್ಯದ ಹಿನ್ನೆಲೆಯುಳ್ಳ ಸತ್ಯ ಘಟನೆಯನ್ನು ಆಧರಿಸಿದ ಜರ್ನಿಯಾಗಿದ್ದು, ಸ್ವಾಸಿಕಾ ನಾಯಕಿಯಾಗಿ ನಟಿಸಿದ್ದಾರೆ. ಲಿಜೋಮೋಲ್ ಜೋಸ್ ಮತ್ತು ಅಜಯ್ ಧೀಶನ್ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ, (ಏಜೆನ್ಸೀಸ್​).