ಪಾತ್ರಕ್ಕಾಗಿ ಪಲ್ಲಂಗಕ್ಕೆ ಕರೆದಾಗ ಅಂಥಾ ಹುಡುಗಿಯರು ಇಲ್ಲ ಅನ್ನಲ್ಲ... ಸೌತ್​ ನಟಿಯ ಶಾಕಿಂಗ್​ ಸ್ಟೇಟ್​ಮೆಂಟ್​! Casting Couch

Casting Couch : ಈಗಾಗಲೇ ಸಾಕಷ್ಟು ನಟಿಯರು ಸಿನಿಮಾ ಇಂಡಸ್ಟ್ರಿಯಲ್ಲಿ ನಡೆಯುವ ಕಾಸ್ಟಿಂಗ್​ ಕೌಚ್​ ಬಗ್ಗೆ ಮಾತನಾಡಿದ್ದಾರೆ. ನಿರ್ದೇಶಕರು, ನಟರು ಹಾಗೂ ನಿರ್ಮಾಪಕರು ಅವಕಾಶದ ಹೆಸರಿನಲ್ಲಿ ತಮ್ಮ ಬಯಕೆಗಳನ್ನು ಈಡೇರಿಸುವಂತೆ ನಟಿಯರನ್ನು ಕೇಳುವುದು ಸಿನಿ ಇಂಡಸ್ಟ್ರಿಗೆ ಅಂಟಿಕೊಂಡಿರುವ ಶಾಪವಾಗಿದೆ. ಬಾಲಿವುಡ್​, ಟಾಲಿವುಡ್​, ಕಾಲಿವುಡ್​, ಸ್ಯಾಂಡಲ್​ವುಡ್​ ಮತ್ತು ಮಾಲಿವುಡ್​ನಲ್ಲಿ ನಡೆಯುವ ಕಾಸ್ಟಿಂಗ್​ ಕೌಚ್​ಗೆ ಅನೇಕ ಕಲಾವಿದೆಯರು ಸಂತ್ರಸ್ತೆಯರಾಗಿದ್ದಾರೆ. ಇನ್ನು ಕೆಲವರು ಅದನ್ನು ಎದುರಿಸಿದ್ದಾರೆ. ಸಾಕಷ್ಟು ನಟಿಯರು ಕಾಸ್ಟಿಂಗ್​ ಕೌಚ್​ ವಿಚಾರವಾಗಿ ಧೈರ್ಯವಾಗಿ ಮಾತನಾಡಿದ್ದಾರೆ. ಇದೀಗ ಆ ಸಾಲಿಗೆ ಟಾಲಿವುಡ್​ನ ಖ್ಯಾತ ನಟಿ ಸತ್ಯ ಕೃಷ್ಣನ್ ಸೇರಿಕೊಂಡಿದ್ದಾರೆ.

ಸತ್ಯ ಕೃಷ್ಣನ್ ಅವರು​ ಟಾಲಿವುಡ್​ ಸಿನಿ ರಂಗದಲ್ಲಿ ಪಾತ್ರ ಕಲಾವಿದೆಯಾಗಿ ತಮ್ಮದೇ ಆದ ವಿಶೇಷ ಛಾಪು ಮೂಡಿಸಿದ್ದಾರೆ. 'ಬೊಮ್ಮರಿಲ್ಲು', 'ವಿನಾಯಕುಡು', 'ದೇವದಾಸ್' ಹಾಗೂ 'ಮೋಸ್ಟ್ ಎಲಿಜಿಬಲ್ ಬ್ಯಾಚುಲರ್' ಮುಂತಾದ ಹಲವು ಚಿತ್ರಗಳಲ್ಲಿ ಸ್ಮರಣೀಯ ಪಾತ್ರಗಳನ್ನು ನಿರ್ವಹಿಸಿದ್ದಾರೆ. ಹೋಟೆಲ್ ಮ್ಯಾನೇಜ್ಮೆಂಟ್ ಅಧ್ಯಯನ ಮಾಡಿ ತಾಜ್ ಗ್ರೂಪ್‌ನಲ್ಲಿ ಕೆಲಸ ಮಾಡುತ್ತಿದ್ದ ಸತ್ಯ ಕೃಷ್ಣನ್​, ಆಕಸ್ಮಿಕವಾಗಿ ನಟಿಯಾದರು. ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ಭಾಗವಹಿಸಿದ್ದ ಸತ್ಯ ಕೃಷ್ಣನ್, ಸಿನಿ ರಂಗದಲ್ಲಿ ಅಡಗಿರುವ ಕರಾಳ ಸತ್ಯಗಳನ್ನು ಬಿಚ್ಚಿಟ್ಟರು.

ಕಾಸ್ಟಿಂಗ್ ಕೌಚ್ ಬಗ್ಗೆ ಮಾತನಾಡಿದ ಸತ್ಯಕೃಷ್ಣನ್​, ಎಲ್ಲರೂ ಹೇಳ್ತಾರೆ ಈ ಕಾಸ್ಟಿಂಗ್​ ಕೌಚ್​ ಅನ್ನೋದು ಕೇವಲ ಸಿನಿಮಾ ಇಂಡಸ್ಟ್ರಿಯಲ್ಲಿ ಮಾತ್ರ ಇದೆ ಅಂತ. ಆದರೆ, ವಾಸ್ತವದಲ್ಲಿ ಈ ಸಮಸ್ಯೆ ಎಲ್ಲಾ ಕ್ಷೇತ್ರದಲ್ಲೂ ಇದೆ. ಸಿನಿಮಾ ಒಂದು ಮುಕ್ತ ವೇದಿಕೆಯಾಗಿರುವುದರಿಂದ ಯಾವುದೇ ವಿಷಯಗಳು ಇಲ್ಲಿ ಬೇಗನೆ ಹೊರಬರುತ್ತವೆ ಎಂದು ಹೇಳಿದರು.

ಯಾವುದೇ ಪುರುಷರಾಗಲಿ ಸುಂದರ ಮಹಿಳೆಯರನ್ನು ನೋಡಿದಾಗ ಅವರತ್ತ ಆಕರ್ಷಿತರಾಗುವುದು ಸಹಜ. ಆದರೆ, ಇನ್ನೊಬ್ಬರು ತಮ್ಮ ಮಿತಿಯನ್ನು ಮೀರಿದಾಗ ತಕ್ಷಣ 'ಇಲ್ಲ' ಎಂದು ಹೇಳುವ ಧೈರ್ಯ ನಮ್ಮಲ್ಲಿ ಇರಬೇಕು. ನಾನು ವೈಯಕ್ತಿಕವಾಗಿ ಅಂತಹ ಅನುಭವಗಳನ್ನು ಅನುಭವಿಸಿಲ್ಲದಿದ್ದರೂ, ಸಹ ಮಹಿಳೆಯರು ಎದುರಿಸುವ ಕಷ್ಟಗಳನ್ನು ನಾನು ಕಣ್ಣಾರೆ ನೋಡಿದ್ದೇನೆ ಎಂದು ಸತ್ಯ ಕೃಷ್ಣನ್​ ಹೇಳಿದರು.

ಸಿನಿಮಾಗಳು ಇಲ್ಲದಿದ್ದರೆ ನನಗೆ ಜೀವನವೇ ಇಲ್ಲ ಅಂತ ಭಾವಿಸುವವರು ಕಾಸ್ಟಿಂಗ್​ ಕೌಚ್​ ಎದುರಾದಾಗ ಇಲ್ಲ ಎಂದು ಹೇಳಲು ಸಾಧ್ಯವಾಗುವುದಿಲ್ಲ. ಅವರು ಅವಕಾಶಗಳಿಗಾಗಿ ಶರಣಾಗಿಬಿಡುತ್ತಾರೆ. ಆದರೆ, ಅದು ಸರಿಯಾದ ವಿಧಾನವಲ್ಲ. ನಮ್ಮಲ್ಲಿ ಪ್ರತಿಭೆ ಇದ್ದರೆ, ಖಂಡಿತ ಅವಕಾಶಗಳು ಬಂದೇ ಬರುತ್ತವೆ ಎಂದು ನಾವು ನಂಬಬೇಕು. ಕೆಲವರು ಅವಕಾಶಗಳಿಗಾಗಿ ಮೊದಲು ಓಕೆ ಎನ್ನುತ್ತಾರೆ ಮತ್ತು ಆ ಬಳಿಕ ಗಲಾಟೆ ಮಾಡುತ್ತಾರೆ. ಅದು ಏನೇ ಇರಲಿ, ಇತರರು ನಮ್ಮ ನಡವಳಿಕೆಯನ್ನು ನೋಡಿ ಅದಕ್ಕೆ ಅನುಗುಣವಾಗಿ ನಮ್ಮನ್ನು ನಡೆಸಿಕೊಳ್ಳುತ್ತಾರೆ. ಯಾರೂ ನಮ್ಮನ್ನು ಒತ್ತಾಯಿಸಲು ಧೈರ್ಯ ಮಾಡುವುದಿಲ್ಲ, ಅಂತಹ ಪ್ರಸ್ತಾಪಗಳು ಬಂದಾಗ ನಾವು ವಿರೋಧಿಸುವ ಶಕ್ತಿಯನ್ನು ಹೊಂದಿರಬೇಕು ಎಂದು ಸತ್ಯ ಕೃಷ್ಣನ್​ ಅವರು ಹೇಳಿದರು.

ಅಂದಹಾಗೆ, ಸತ್ಯ ಕೃಷ್ಣನ್​ ಮಾಡಿದ ಈ ಕಾಮೆಂಟ್‌ಗಳು ಈಗ ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿವೆ. ಸತ್ಯ ಅವರು ಹೇಳಿದ ಮಾತುಗಳು ತುಂಬಾ ಸ್ಪೂರ್ತಿದಾಯಕವಾಗಿದೆ ಮತ್ತು ವಿಶೇಷವಾಗಿ ಉದ್ಯಮಕ್ಕೆ ಪ್ರವೇಶಿಸುವ ಹೊಸ ಹುಡುಗಿಯರಿಗೆ ಇದು ದಾರಿದೀಪವಾಗಲಿದೆ ಎಂಬ ಅಭಿಪ್ರಾಯ ವ್ಯಕ್ತವಾಗುತ್ತಿದೆ, (ಏಜೆನ್ಸೀಸ್​).