ನಟ ವಿಶಾಲ್​ಗೆ ಬಿಗ್​ ಶಾಕ್​: ಬಾಕ್ಸ್​ಆಫೀಸ್​ನಲ್ಲಿ ನೆಲಕಚ್ಚಿದ ತಮ್ಮ ಚೊಚ್ಚಲ ನಿರ್ದೇಶನದ ಸಿನಿಮಾ! ಗಳಿಸಿದ್ದು ಇಷ್ಟೇನಾ? Vishal ​

ಚೆನ್ನೈ: ತಮಿಳು ನಟ ವಿಶಾಲ್ ( Vishal ​) ತಮ್ಮ ಪ್ರತಿ ಸಿನಿಮಾವನ್ನು ತೆಲುಗಿನಲ್ಲೂ ಡಬ್ ಮಾಡಿ ಬಿಡುಗಡೆ ಮಾಡುವುದು ವಾಡಿಕೆ. ಅದರಂತೆ ಅವರು ನಟಿಸುವುದರ ಜೊತೆಗೆ ಮೊದಲ ಬಾರಿಗೆ ಆ್ಯಕ್ಷನ್ ಕಟ್ ಹೇಳಿರುವ 'ಮಕುಟಂ' (ತಮಿಳಿನಲ್ಲಿ 'ಮಗುದಂ') ಸಿನಿಮಾ ಆಗಸ್ಟ್ 14ರಂದು ಭರ್ಜರಿಯಾಗಿಯೇ ತೆರೆಕಂಡಿತು. ಆದರೆ, ವಿಶಾಲ್ ಅವರ ಈ ಚೊಚ್ಚಲ ನಿರ್ದೇಶನದ ಸಿನಿಮಾ ಬಾಕ್ಸ್‌ ಆಫೀಸ್‌ನಲ್ಲಿ ನಿರೀಕ್ಷಿತ ಮಟ್ಟದಲ್ಲಿ ಸದ್ದು ಮಾಡುವಲ್ಲಿ ವಿಫಲವಾಗಿದ್ದು, ಸಂಪೂರ್ಣವಾಗಿ ಧೂಳೀಪಟವಾಗಿದೆ.

ಮೊದಲ ದಿನದ ಬಾಕ್ಸ್‌ ಆಫೀಸ್ ಗಳಿಕೆಯ ಪ್ರಕಾರ, ಈ ಸಿನಿಮಾ ತಮಿಳುನಾಡಿನಲ್ಲಿ ಕೇವಲ 38 ಲಕ್ಷ ರೂಪಾಯಿ, ತೆಲುಗು ರಾಜ್ಯಗಳಲ್ಲಿ 20 ಲಕ್ಷ ರೂಪಾಯಿ, ಕರ್ನಾಟಕದಲ್ಲಿ 7 ಲಕ್ಷ ರೂಪಾಯಿ, ಕೇರಳದಲ್ಲಿ 2 ಲಕ್ಷ ರೂಪಾಯಿ ಹಾಗೂ ದೇಶದ ಉಳಿದ ಭಾಗಗಳಲ್ಲಿ 1 ಲಕ್ಷ ರೂಪಾಯಿ ಸೇರಿದಂತೆ ಒಟ್ಟು 68 ಲಕ್ಷ ರೂಪಾಯಿಗಳ ರಾಷ್ಟ್ರವ್ಯಾಪಿ ಗ್ರಾಸ್ ಕಲೆಕ್ಷನ್ ಮಾತ್ರ ಗಳಿಸಿದೆ. ಇದರೊಂದಿಗೆ ಸಾಗರೋತ್ತರ ಗಳಿಕೆ ಸುಮಾರು 20 ಲಕ್ಷ ರೂಪಾಯಿಗಳಷ್ಟೇ ಆಗಿದ್ದು, ಒಟ್ಟಾರೆ ಮೊದಲ ದಿನದ ಕಲೆಕ್ಷನ್ 90 ಲಕ್ಷ ರೂಪಾಯಿಗಳನ್ನು ದಾಟಿಲ್ಲ.

ಸ್ವಾತಂತ್ರ್ಯ ದಿನಾಚರಣೆಯ ವೀಕೆಂಡ್‌ನಲ್ಲಿ ಸಿನಿಮಾಕ್ಕೆ ಬೂಸ್ಟ್ ಸಿಗಲಿದೆ ಎಂಬ ನಿರೀಕ್ಷೆಯಿದ್ದರೂ, ಎರಡನೇ ದಿನದ ಟಿಕೆಟ್ ಬುಕಿಂಗ್ ಕೂಡ ತೀರಾ ಕಳಪೆಯಾಗಿದೆ. ಮೂರು ವರ್ಷಗಳ ಹಿಂದೆ 'ಮಾರ್ಕ್ ಆಂಟನಿ' ಚಿತ್ರದ ಮೂಲಕ ನೂರು ಕೋಟಿ ಕ್ಲಬ್ ಸೇರಿದ್ದ ವಿಶಾಲ್, ಈಗ ತಮ್ಮದೇ ನಿರ್ದೇಶನದ ಮೊದಲ ಚಿತ್ರದಿಂದ ಹೀಗೆ ತೀವ್ರ ನಿರಾಶೆಯನ್ನು ಅನುಭವಿಸುತ್ತಿರುವುದು ಟ್ರೇಡ್ ಸರ್ಕಲ್‌ನಲ್ಲಿ ಅಚ್ಚರಿಗೆ ಕಾರಣವಾಗಿದೆ.

ಇನ್ನು ಈ ಸಿನಿಮಾದ ಕಥೆಯು ಕೃಪಾಕರಮ್ (ವಿಶಾಲ್) ಎಂಬ ಚೆನ್ನೈ ಮೂಲದ ಮೆಡಿಕಲ್ ರೆಪ್ರೆಸೆಂಟೇಟಿವ್ ಸುತ್ತ ಸುತ್ತುತ್ತದೆ. ತನ್ನ ಹೆಂಡತಿ ಜಮುನಾ (ದುಷರಾ ವಿಜಯನ್) ಮತ್ತು ಇಬ್ಬರು ಮಕ್ಕಳೊಂದಿಗೆ ಸುಖವಾಗಿರುವ ಕೃಪಾಕರಮ್, ಹಣಕಾಸಿನ ಮುಗ್ಗಟ್ಟಿನಿಂದ ಸೆಕೆಂಡ್ ಹ್ಯಾಂಡ್ ಕಾರು ಖರೀದಿಸಿ ಕುಟುಂಬದೊಂದಿಗೆ ಹೊರಟಾಗ ದುಷ್ಕರ್ಮಿಗಳು ಗುಂಡಿಕ್ಕುತ್ತಾರೆ. ಈ ಭೀಕರ ದಾಳಿಯಲ್ಲಿ ಅವರ ಪತ್ನಿ ಮತ್ತು ಒಂದು ಮಗು ಸಾವಿಗೀಡಾದರೆ, ಮತ್ತೊಂದು ಮಗುವಿನೊಂದಿಗೆ ಕೃಪಾಕರಮ್ ಪ್ರಾಣಾಪಾಯದಿಂದ ಪಾರಾಗುತ್ತಾರೆ.

ಈ ದುರ್ಘಟನೆಯ ಸುದ್ದಿ ವಿಶಾಖಪಟ್ಟಣಂ ಬಂದರನ್ನು ನಿಯಂತ್ರಿಸುವ ಪ್ರಭಾವಿ ವ್ಯಕ್ತಿ ಹಾಗೂ ಕೃಪಾಕರಮ್ ಅವರ ತಂದೆ ಲಿಂಗಾ (ವಿಶಾಲ್) ಅವರಿಗೆ ತಲುಪುತ್ತದೆ. ಮಗನನ್ನು ಕಾಣಲು ಬರುವ ತಂದೆಯ ಮೇಲೆ ಕೃಪಾಕರಮ್ ರೇಗಾಡಿ, ತನ್ನ ಹೆಂಡತಿ ಮತ್ತು ಮಗುವಿನ ಸಾವಿಗೆ ನೀನೇ ಕಾರಣ ಎಂದು ಆರೋಪಿಸುತ್ತಾನೆ. ತಂದೆ-ಮಗ ಏಕೆ ದೂರವಿದ್ದಾರೆ? ಕೃಪಾಕರಮ್ ಕುಟುಂಬದ ಮೇಲೆ ದಾಳಿ ಮಾಡಿದವರು ಯಾರು? ದಾಳಿಕೋರರಿಗೂ ಲಿಂಗಾಳಿಗೂ ಇರುವ ಸಂಬಂಧವೇನು? ಎಂಬ ರೋಚಕ ಪ್ರಶ್ನೆಗಳೊಂದಿಗೆ ಕಥೆ ಮುಂದುವರಿಯುತ್ತದೆ, (ಏಜೆನ್ಸೀಸ್​).