ಸ್ಪಿರಿಟ್​ ಫಸ್ಟ್​ ಲುಕ್​ನಲ್ಲಿ ಅನಿಮಲ್​ ಛಾಯೆ: ಭರ್ಜರಿ ಆ್ಯಕ್ಷನ್​, ಲಿಪ್​ಲಾಕ್​ ಕನ್ಫರ್ಮ್​ ಎಂದ ಪ್ರಭಾಸ್​ ಫ್ಯಾನ್ಸ್​! Actor Prabhas

ಹೈದರಾಬಾದ್​: ಬ್ಲಾಕ್​ಬಸ್ಟರ್​ ಬಾಹುಬಲಿ ಸಿನಿಮಾ ಬಳಿಕ ಪ್ಯಾನ್​ ಇಂಡಿಯಾ ಸ್ಟಾರ್​ ಆಗಿ ಹೊರಹೊಮ್ಮಿರುವ ಪ್ರಭಾಸ್ ( Actor Prabhas )​, ಒಂದೊಳ್ಳೆ ಯಶಸ್ಸಿಗಾಗಿ ಎದುರು ನೋಡುತ್ತಿದ್ದಾರೆ. ಬಾಹುಬಲಿ ನಂತರ ಬಂದ ಯಾವ ಸಿನಿಮಾಗಳು ಕೂಡ ಅಷ್ಟರಮಟ್ಟಿಗೆ ಯಶಸ್ಸು ತಂದುಕೊಡಲಿಲ್ಲ. ಸಾಹೋ, ರಾಧೆಶ್ಯಾಮ್​, ಆದಿಪುರುಷ ಸಿನಿಮಾಗಳು ಫ್ಲಾಪ್​ ಆದವು. ಸಲಾರ್​ ಸಿನಿಮಾ ಬಾಕ್ಸ್​ ಆಫೀಸ್​ನಲ್ಲಿ ಸದ್ದು ಮಾಡಿದರು ಕೂಡ ನಿರೀಕ್ಷೆಯ ಮಟ್ಟ ತಲುಪಲಿಲ್ಲ. ಕಲ್ಕಿ ಸಿನಿಮಾ ಭರ್ಜರಿ ಯಶಸ್ಸು ಕಂಡಿತು. ಆದರೆ, ಅದು ಬಹುತಾರಾಗಣ ಸಿನಿಮಾ ಆದ್ದರಿಂದ ಪ್ರಭಾಸ್​ ಒಬ್ಬರಿಗೆ ಯಶಸ್ಸಿನ ಕ್ರೆಡಿಟ್​ ಹೋಗಲಿಲ್ಲ. ಹೀಗಾಗಿ ಪ್ರಭಾಸ್​ ಅವರು ಒಂದು ಬಹುದೊಡ್ಡ ಯಶಸ್ಸಿಗಾಗಿ ಎದುರು ನೋಡುತ್ತಿದ್ದಾರೆ. ಆ ಯಶಸ್ಸನ್ನು ಸ್ಪಿರಿಟ್​ ಸಿನಿಮಾ ತಂದುಕೊಡಬಹುದು ಎಂಬ ಲೆಕ್ಕಾಚಾರವನ್ನು ಅಭಿಮಾನಿಗಳು ಹಾಕಿಕೊಂಡಿದ್ದಾರೆ.

ಪ್ರಭಾಸ್​ ಅಭಿಮಾನಿಗಳಿಗೆ ಹೊಸ ವರ್ಷದಂದೇ ಭರ್ಜರಿ ಗುಡ್​ ನ್ಯೂಸ್​ ಸಿಕ್ಕಿದೆ. ಅದೇನೆಂದರೆ, ಪ್ರಭಾಸ್​ ನಟನೆಯ ಬಹುನಿರೀಕ್ಷಿತ ಸ್ಪಿರಿಟ್​ ಸಿನಿಮಾದ ಫಸ್ಟ್​ ಲುಕ್​ ಪೋಸ್ಟರ್​ ಬಿಡುಗಡೆಯಾಗಿದೆ. ಪ್ರಭಾಸ್​ ಅವರ ನಯಾ ಅವತಾರವನ್ನು ಕಂಡು ಅಭಿಮಾನಿಗಳು ಹುಬ್ಬೇರಿಸಿದ್ದಾರೆ.

ಉದ್ದನೆಯ ಕೂದಲು ಹಾಗೂ ಕಟ್ಟುಮಸ್ತಾದ ದೇಹದೊಂದಿಗೆ ರಗಡ್​ ಲುಕ್​ನಲ್ಲಿ ಪ್ರಭಾಸ್​ ಕಾಣಿಸಿಕೊಂಡಿದ್ದಾರೆ. ಕೈಯಲ್ಲಿ ಮದ್ಯ ತುಂಬಿದ ಗ್ಲಾಸ್​ ಹಿಡಿದು, ಬಾಯಿಯಲ್ಲಿ ಸಿಗರಟೇಟ್​ ಕಚ್ಚಿಕೊಂಡಿದ್ದು, ಶರ್ಟ್​ಲೆಸ್ ಆಗಿ ಪೋಸ್​ ನೀಡಿದ್ದಾರೆ. ದೇಹದಲ್ಲಿ ಅಲ್ಲಲ್ಲಿ ಗಾಯಕ್ಕೆ ಬ್ಯಾಂಡೇಜ್​ ಸುತ್ತಿಕೊಂಡಿದ್ದಾರೆ. ಪ್ರಭಾಸ್​ ಬಾಯಲ್ಲಿರುವ ಸಿಗರೇಟ್​ಗೆ ಲೈಟರ್​ ಮೂಲಕ ಬೆಂಕಿ ಹಚ್ಚುವ ಮೂಲಕ ನಟಿ ತೃಪ್ತಿ ದಿಮ್ರಿ ಪೋಸ್ಟರ್​ಗೆ​ ಕಿಚ್ಚು ಹಚ್ಚಿದ್ದಾರೆ.

ಸ್ಪಿರಿಟ್​ ಪೋಸ್ಟರ್​ ನೋಡಿದವರಿಗೆ ಬಾಲಿವುಡ್​ನ ಅನಿಮಲ್​ ಸಿನಿಮಾ ನೆನಪಾಗುತ್ತದೆ. ಏಕೆಂದರೆ, ಅನಿಮಲ್​ ಚಿತ್ರದಲ್ಲಿ ರಣಬೀರ್​ ಕಪೂರ್​ ಅವರ ಲುಕ್​ ಕೂಡ ಇದೇ ರೀತಿ ಇತ್ತು. ಅಲ್ಲದೆ, ಆ ಚಿತ್ರದಲ್ಲಿ ತೃಪ್ತಿ ನಾಯಕಿಯಾಗಿದ್ದರು. ಎಲ್ಲಕ್ಕಿಂತ ಮುಖ್ಯವಾದ ಸಂಗತಿ ಏನೆಂದರೆ, ಅನಿಮಲ್​ ಸಿನಿಮಾವನ್ನು ನಿರ್ದೇಶನ ಮಾಡಿದ್ದ ಸಂದೀಪ್​ ರೆಡ್ಡಿ ವಂಗಾ ಅವರೇ ಸ್ಪಿರಿಟ್​ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ಹೀಗಾಗಿ ಅನಿಮಲ್​ ಚಿತ್ರದ ಛಾಯೆ ಸ್ಪಿರಿಟ್​ ಚಿತ್ರದ ಪೋಸ್ಟರ್​ನಲ್ಲೂ ಕಾಣುತ್ತಿದೆ.

ಸಂದೀಪ್ ರೆಡ್ಡಿ ವಂಗಾ ಅಂದಮೇಲೆ ವಿಶೇಷವಾಗಿ ಹೇಳಬೇಕಿಲ್ಲ. ಏಕೆಂದರೆ, ಸಂದೀಪ್​ ನಿರ್ದೇಶನ ಚಿತ್ರಗಳಲ್ಲಿ ನಾಯಕ ಮತ್ತು ನಾಯಕಿಯ ನಡುವೆ ಗಾಢವಾದ ಪ್ರಣಯ ಮತ್ತು ಲಿಪ್​ಲಾಕ್​ ದೃಶ್ಯಗಳಿರುತ್ತವೆ. ಅಷ್ಟೇ ಅಲ್ಲ, ಕೊಳಕು ಮಾತುಗಳು ಹಾಗೂ ಡಬ್ಬಲ್​ ಮೀನಿಂಗ್​ ಡೈಲಾಗ್​ಗಳಿಗೇನು ಕಡಿಮೆ ಇಲ್ಲ. ಇದಕ್ಕೆ ಉದಾಹರಣೆ, ಅರ್ಜುನ್ ರೆಡ್ಡಿ, ಕಬೀರ್ ಸಿಂಗ್ ಹಾಗೂ ಅನಿಮಲ್ ಚಿತ್ರಗಳು. ಈ ಸಿನಿಮಾಗಳೂ ವಿವಾದವನ್ನು ಹುಟ್ಟುಹಾಕಿದ್ದವು. ಏಕೆಂದರೆ, ಇವೆಲ್ಲವೂ ಎ ಪ್ರಮಾಣಪತ್ರದ ಚಿತ್ರಗಳು. ಈ ಸಿನಿಮಾಗಳಲ್ಲಿ ಸಾಕಷ್ಟು ಸರಸ ದೃಶ್ಯಗಳು ಹಾಗೂ ಆ್ಯಕ್ಷನ್ ಸೀನ್​ಗಳು ಇದ್ದವು. ಅಲ್ಲದೆ, ಬಾಕ್ಸ್​ ಆಫೀಸ್​ನಲ್ಲಿ ಧೂಳೆಬ್ಬಿಸಿದವು.

ಹೀಗಾಗಿ ಪ್ರಭಾಸ್ ನಟನೆನ ಸ್ಪಿರಿಟ್​ ಸಿನಿಮಾದಲ್ಲಿಯೂ ಅಭಿಮಾನಿಗಳನ್ನು ಅದನ್ನೇ ನಿರೀಕ್ಷೆ ಮಾಡುತ್ತಿದ್ದಾರೆ. ಸ್ಪಿರಿಟ್​ ಚಿತ್ರದಲ್ಲಿ ಪ್ರಭಾಸ್​ ಅವರು ಪೊಲೀಸ್ ಪಾತ್ರದಲ್ಲಿ ನಟಿಸುತ್ತಿರುವುದರಿಂದ, ಅಭಿಮಾನಿಗಳು ಭಾರಿ ಆಕ್ಷನ್ ಸನ್ನಿವೇಶಗಳನ್ನು ಎದುರು ನೋಡುತ್ತಿದ್ದಾರೆ. ಅಲ್ಲದೆ, ಪ್ರಣಯ ದೃಶ್ಯಗಳನ್ನು ನಿರೀಕ್ಷಿಸಿದ್ದಾರೆ. ಹೊಸ ವರ್ಷದಂದು ಬಿಡುಗಡೆಯಾಗಿರುವ ಸ್ಪಿರಿಟ್​ ಚಿತ್ರದ ಫಸ್ಟ್ ಲುಕ್ ಪೋಸ್ಟರ್ ಅದರ ಸುಳಿವು ನೀಡಿದೆ.

ಸಂದೀಪ್ ರೆಡ್ಡಿ ಚಿತ್ರವಾಗಿರುವುದರಿಂದ ಪ್ರಭಾಸ್ ಮತ್ತು ತ್ರಿಪ್ತಿ ದಿಮ್ರಿ ನಡುವೆ ಲಿಪ್​ಲಾಕ್​ ದೃಶ್ಯಗಳು ಮತ್ತು ಇಬ್ಬರ ನಡುವೆ ತೀವ್ರವಾದ ಪ್ರಣಯ ದೃಶ್ಯಗಳು ಇರುವುದು ಖಚಿತ ಎಂದು ಅಭಿಮಾನಿಗಳು ಮಾತನಾಡಿಕೊಳ್ಳುತ್ತಿದ್ದಾರೆ. ಇನ್ನೊಂದೆಡೆ ಪ್ರಭಾಸ್​ ನಟನೆಯ ದಿ ರಾಜಾ ಸಾಬ್​ ಸಿನಿಮಾ ಜನವರಿಯಲ್ಲಿ ಬಿಡುಗಡೆಯಾಗಲಿದೆ, (ಏಜೆನ್ಸೀಸ್​).