‘ಗಾಳಿಪಟ 2’ ಚಿತ್ರವು ಯೋಗರಾಜ್ ಭಟ್ ಹಾಗೂ ತಮ್ಮ ಬೆಸ್ಟ್ ಚಿತ್ರ ಆಗಲಿದೆ ಎಂದು ಭವಿಷ್ಯ ನುಡಿಯುವ ಗಣೇಶ್, ‘ನಮ್ಮಿಬ್ಬರ ಕಾಂಬಿನೇಷನ್ನ ಚಿತ್ರಗಳು ಸಾಕಷ್ಟು ಯಶಸ್ವಿಯಾಗಿವೆ. ಆದರೆ, ‘ಗಾಳಿಪಟ 2’ ಬೆಸ್ಟ್ ಚಿತ್ರವಾಗಲಿದೆ. ಸಂಭಾಷಣೆ ಇರಬಹುದು, ಚಿತ್ರಕಥೆ ಆಗಿರಬಹುದು ... ಬಹಳ ಚೆನ್ನಾಗಿ ಮೂಡಿಬಂದಿದೆ. ರೀಡಿಂಗ್ ಕೇಳುತ್ತಿದ್ದಂತೆಯೇ, ಬಹಳ ಬದಲಾಗಿಬಿಟ್ಟಿದ್ದೀರಿ ಎಂದು ಹೇಳಿದೆ. ಇದು ಇವತ್ತಿನ ಸ್ನೇಹ, ಸೆಂಟಿಮೆಂಟ್ನ ಕುರಿತಾದ ಚಿತ್ರ’ ಎಂದು ಅವರು ಖುಷಿಯಾಗುತ್ತಾರೆ. ಇನ್ನು, ‘ಸ್ಟೋರಿ ಆಫ್ ರಾಯಗಡ’ ಕುರಿತು ಮಾತನಾಡುವ ಅವರು, ‘ಚಿತ್ರ ಬಹಳ ರಾ ಆಗಿರುತ್ತದೆ, ವಿಭಿನ್ನವಾಗಿರುತ್ತದೆ ಎಂದು ಸುನಿ ಹೇಳಿದಾಗ, ಒಂದು ಮಾತು ಹೇಳಿದೆ. ಏನೇ ಮಾಡು, ಕಾಮಿಡಿ ಮತ್ತು ಎಮೋಷನ್ ಮಾತ್ರ ಬಿಡಬೇಡ ಎಂದೆ. ಏಕೆಂದರೆ, ಅದು ನಮ್ಮಿಬ್ಬರ ಟ್ರಂಪ್ ಕಾರ್ಡ್. ನಮ್ಮಿಬ್ಬರ ಶೈಲಿಯನ್ನು ತಲೆಯಲ್ಲಿಟ್ಟುಕೊಂಡು ಕಥೆ ಮಾಡು ಎಂದು ಹೇಳಿದಾಗ ರೂಪುಗೊಂಡ ಕಥೆ ಅದು. ಇದುವರೆಗೂ ನಾನು ಮಾಡದಿರುವ ಒಂದು ಪಾತ್ರ ಅದು. ಈಗ ಸಿಕ್ಕಿದೆ’ ಎನ್ನುತ್ತಾರೆ.
