ಕೆಲವರಿಗೆ ಇದೊಂದು ಪ್ರಚಾರಯಂತ್ರ ಸಿನಿಮಾ ಎಂದೆನಿಸಬಹುದು. ಆದರೆ, ಇಲ್ಲಿ ದೇಶದ ವಿಜ್ಞಾನಿಗಳ ಸಂಘರ್ಷ ಹಾಗೂ ಪರಿಶ್ರಮ ಮಾತ್ರ ಮುಖ್ಯವಾಗುವಂತೆ ನಿರೂಪಿಸಲಾಗಿದೆ. ರಾಜಕೀಯ, ಚುನಾವಣೆ ಗಿಮಿಕ್ ಹೀಗೆ ಕಾರಣಗಳಿದ್ದರೂ ದೇಶ ಅಂತ ಬಂದಾಗ ಎಲ್ಲರೂ ಒಂದಾಗಬೇಕು ಎನ್ನುವ ಸಂದೇಶವೂ ಚಿತ್ರದಲ್ಲಿದೆ. ಕಥೆಯ ಕೇಂದ್ರ ಕೂಡ ಲಸಿಕೆ ತಯಾರಿಸುವ ಕಾರ್ಯಕ್ಕೆ ಮಾತ್ರ ಸೀಮಿತಿವಾಗಿದೆ. ಹೊರಗೆ ಪ್ರತಿಯೊಬ್ಬರು ಜೀವ ಉಳಿಸಿಕೊಳ್ಳಲು ಪರದಾಡುತ್ತಿರುವಾಗ, ಊರುಗಳು ಸ್ಮಶಾನ ಆಗುತ್ತಿರುವಾಗ ಎಷ್ಟು ಸಂಕಟ ಆಗಿತ್ತೋ, ಅಲ್ಲಿ ವಿಜ್ಞಾನಿಗಳು ಜೀವ ಉಳಿಸಲು ಒದ್ದಾಡುತ್ತಿರುವುದನ್ನು ನೋಡುವಾಗ, ಲಸಿಕೆ ತಯಾರಿಸಿದಾಗ ಹೆಮ್ಮೆ ಆಗುವಂತೆ ಮಾಡುತ್ತದೆ ಸಿನಿಮಾ. ಇವೆಲ್ಲವನ್ನೂ ಸುಮಾರು 12 ಅಧ್ಯಾಯಗಳಲ್ಲಿ ಹೇಳಲಾಗಿದೆ. ವಿಶೇಷ ಎಂದರೆ ಈ ವಿಜ್ಞಾನಿಗಳ ಪಟ್ಟಿಯಲ್ಲಿ ಅನೇಕರು ಮಹಿಳೆಯರೇ ಆಗಿದ್ದರು.
