ಭಾರತಕ್ಕೆ ಸ್ವಾತಂತ್ರ್ಯ ಕೊಡಿಸಿದ್ದೇ ಕಂಗನಾ: ಸ್ವರಾ ಭಾಸ್ಕರ್​

ಯಾಕೋ ಈ ನೆಪೋಟಿಸಂ ಕುರಿತ ಚರ್ಚೆ ಬಾಲಿವುಡ್​ನಲ್ಲಿ ಸದ್ಯಕ್ಕೆ ನಿಲ್ಲುವಂತೆ ಕಾಣುತ್ತಿಲ್ಲ. ಸುಶಾಂತ್​ ಸಿಂಗ್​ ಸಾವಿನ ನಂತರ ಶುರುವಾದ ಈ ಚರ್ಚೆ, ಈಗ ಎಲ್ಲಿಂದ ಎಲ್ಲಿಗೋ ಹೋಗಿ ಮುಟ್ಟುತ್ತಿದೆ ಎನ್ನುವುದು ವಿಚಿತ್ರ.

ಅದರಲ್ಲೂ, ನಟಿ ಕಂಗನಾ ಈ ವಿಷಯದಲ್ಲಿ ಸಾಕಷ್ಟು ಕೆಸರೆರಚಾಟ ಮಾಡುತ್ತಿದ್ದಾರೆ ಎಂಬ ಅಭಿಪ್ರಾಯ ಬಾಲಿವುಡ್​ನಲ್ಲಿ ಕೇಳಿ ಬರುತ್ತಿದೆ. ಇತ್ತೀಚೆಗೆ ಮಾತನಾಡುವ ಭರದಲ್ಲಿ, ತಮ್ಮ 'ಕ್ವೀನ್​' ಚಿತ್ರದಿಂದ ಭಾರತದಲ್ಲಿ ಮಹಿಳಾ ಪ್ರಧಾನ ಮತ್ತು ಹೊಸ ಅಲೆಯ ಚಿತ್ರಗಳು ಶುರುವಾದವು ಎಂದು ಹೇಳಿದ್ದು ಸಿಕ್ಕಾಪಟ್ಟೆ ಚರ್ಚೆಗೆ ಕಾರಣವಾಗಿದೆ.

ಇದನ್ನೂ ಓದಿ: ಗೇಮ್​ ಆಫ್ ಥ್ರೋನ್ಸ್ ರೀತಿಯಲ್ಲಿ ಮಹಾಭಾರತ; ನೆಟ್​ಫ್ಲಿಕ್ಸ್​ನಲ್ಲಿ ಆಮೀರ್ ಮಹಾಸರಣಿ!

ಚಲನಚಿತ್ರ ಇತಿಹಾಸ ಗೊತ್ತಿರುವವರು, ಕಂಗನಾ ಅವರ ಹೇಳಿಕೆ ಅದೆಷ್ಟು ಹಾಸ್ಯಾಸ್ಪದವಾಗಿದೆ ಎಂದು ಸೋಷಿಯಲ್​ ಮೀಡಿಯಾದಲ್ಲಿ ಅಭಿಪ್ರಾಯಪಟ್ಟಿದ್ದಾರೆ. ಇನ್ನು ಕಂಗನಾ ಅವರಿಂದ, 'ಬಿ-ಗ್ರೇಡ್​' ನಟಿ ಎಂದು ಕರೆಸಿಕೊಂಡಿರುವ ಸ್ವರಾ ಭಾಸ್ಕರ್​, ಈ ಕುರಿತು ಸಾಕಷ್ಟು ಲೇವಡಿ ಮಾಡಿದ್ದಾರೆ.

ಈ ಕುರಿತು ಟ್ವೀಟ್​ ಮಾಡಿರುವ ಅವರು, 'ಸ್ತ್ರೀವಾದಿ ಸಿನಿಮಾಗಳ ಟ್ರೆಂಡ್​ ಶುರುವಾಗಿದ್ದು ಕಂಗನಾ ಅವರ 'ಕ್ವೀನ್​' ಚಿತ್ರದಿಂದ. 'ಪಥೇರ್​ ಪಾಂಚಾಲಿ'ಯ ಜತೆಜತೆಗೇ ಕಂಗನಾ ಹಲವು ಹೊಸ ಅಲೆಯ ಸಿನಿಮಾಗಳನ್ನು ಮಾಡಿಕೊಂಡು ಬಂದರು. ಅಷ್ಟೇ ಅಲ್ಲ, ಭಾರತಕ್ಕೆ 1947ರಲ್ಲಿ ಸ್ವಾತಂತ್ರ್ಯ ಕೊಡಿಸಿದ್ದೇ ಕಂಗನಾ' ಎಂದು ಸ್ವರಾ ಕಾಲೆಳೆದು ಬಿಸಾಕಿದ್ದಾರೆ.

ಸ್ವರಾ ಅವರ ಈ ಟ್ವೀಟ್​ಗೆ ಎಲ್ಲೆಡೆಯಿಂದ ಮೆಚ್ಚುಗೆ ವ್ಯಕ್ತವಾಗಿದ್ದು, ಹಲವರು ಇದನ್ನಿಟ್ಟುಕೊಂಡು ಕಂಗನಾಗೆ ಉತ್ತರ ಕೊಡುತ್ತಿದ್ದಾರೆ. ಯಾವಾಗ ಸ್ವರಾ ಇಂಥದ್ದೊಂದು ಟ್ವೀಟ್​ ಮಾಡಿದರೋ, ತಕ್ಷಣ ಎಚ್ಚೆತ್ತುಕೊಂಡ ಕಂಗನಾ ಅವರ ಮಾಧ್ಯಮದ ತಂಡವು, ಇನ್ನೊಂದು ಟ್ವೀಟ್​ ಮಾಡುವ ಮೂಲಕ ಉತ್ತರ ಕೊಟ್ಟಿದೆ.

ಇದನ್ನೂ ಓದಿ: ಸುಶಾಂತ್​ಗಿತ್ತು ವಿಚಿತ್ರ ಕಾಯಿಲೆ; ವಿಚಾರಣೆ ವೇಳೆ ಸತ್ಯ ಬಾಯ್ಬಿಟ್ಟ ಸೈಕಿಯಾಟ್ರಿಸ್ಟ್ !

'ಸ್ವರಾ, ಭಾರತೀಯ ಚಿತ್ರರಂಗದ ಸುವರ್ಣ ಯುಗದ ಸಂದರ್ಭದಲ್ಲಿ ನೀವ್ಯಾರೂ ಹುಟ್ಟಿರಲಿಲ್ಲ. ನೀವೆಲ್ಲಾ ಹುಟ್ಟಿದ್ದು ಮಾಫಿಯಾ ಮತ್ತು ಡಾನ್​ಗಳು ಈ ಅದ್ಭುತ ಚಿತ್ರರಂಗವನ್ನು ಹಾಳು ಮಾಡಿದ ಮೇಲೆ. ಇನ್ನು 'ಕ್ವೀನ್​' ನಂತರ ಸ್ತ್ರೀವಾದದ ಮತ್ತು ಹೊಸ ಅಲೆಯ ಚಿತ್ರಗಳು ಟ್ರೆಂಡ್​ ಇನ್ನೂ ಹೆಚ್ಚಾಯಿತು. ಇದು ತಪ್ಪಾಗಿದ್ದರೆ, ಸರಿಯಾದ ಮಾಹಿತಿ ಕೊಡಿ' ಎಂದು ಕಂಗನಾ ಅವರ ತಂಡ ಕೇಳಿದೆ.

ಅಷ್ಟೇ ಅಲ್ಲ, ಸ್ವರಾ ಒಂದು ಗುರುತರವಾದ ಆರೋಪವನ್ನು ಸಹ ಹೊರಿಸಿದೆ, 'ಸುಶಾಂತ್​ ಅವರ ಸಾವಿಗೆ ಕಾರಣವೇನು ಎಂಬ ವಿಷಯವನ್ನು ಮರೆಮಾಚುವುದಕ್ಕೆ ಈ ತರಹದ ವಿಷಯಗಳನ್ನು ನೀವೆಲ್ಲಾ ಕೆದಕುತ್ತಿರುವುದು ಸ್ಪಷ್ಟವಾಗುತ್ತಿದೆ. ಭಯೋತ್ಪಾದಕರನ್ನು ಮತ್ತು ರಾಷ್ಟ್ರ ವಿರೋಧಿಗಳನ್ನು ಪೋಷಿಸುವುದರ ಜತೆಗೆ, ಸಿನಿಮಾ ಮಾಫಿಯಾ ಡಾನ್​ಗಳ ಸಹಾಯಕ್ಕೂ ನೀವು ನಿಂತಿದ್ದೀರಾ. ನಿಮಗೆ ನಾಚಿಕೆಯಾಗಬೇಕು' ಎಂದು ಟ್ವೀಟ್​ ಮಾಡಲಾಗಿದೆ.

https://www.vijayavani.net/taapsee-pannu-hits-back-at-kangana-ranaut/