‘ಮಗುವಿನೆ ಏನೇ ತರಕಾರಿ ಅಥವಾ ಹಣ್ಣು ಕೊಡಬೇಕು ಎಂದರೂ ಮೊದಲು ಬಿಸಿನೀರಿಗೆ ಉಪು್ಪ ಹಾಕಿ ಸೋಕ್ ಮಾಡಿ ಕೊಡುತ್ತೇನೆ. ಮಗ ಜಿಯಾನ್ ಐಯ್ಯಪ್ಪ ಬಂದ ಮೇಲೆ ನನ್ನ ಜೀವನ ಬಹಳ ಬದಲಾಗಿದೆ’ ಎನ್ನುತ್ತಾರೆ ‘ಮಜಾ ಟಾಕೀಸ್’ನ ಶ್ವೇತಾ ಚೆಂಗಪ್ಪ. ‘ಮಗನ ಆಟ-ಪಾಠ ನೋಡುವುದರಲ್ಲೇ ಸಮಯ ಕಳೆದು ಹೋಗುತ್ತಿದೆ. ಮಗನನ್ನು ಮಲಗಿಸಿ, ಮನೆ ಕೆಲಸ ಎಲ್ಲ ಮುಗಿಸಿ ಒಂದು ಸಿನಿಮಾ ನೋಡೋಣ ಎನ್ನುವಾಗ ಎದ್ದೇ ಬಿಡುತ್ತಾನೆ. ಕಳೆದ ಆರು ತಿಂಗಳಿಂದ ನನಗೆ ಸಿನಿಮಾ ನೋಡಲು ಸಾಧ್ಯವಾಗುತ್ತಿಲ್ಲ’ ಎನ್ನುತ್ತಾರೆ ಶ್ವೇತಾ. ‘ಕರೊನಾ ಇರೋದ್ರಿಂದ ಮನೆ ಕೆಲಸದವರನ್ನು ಕರೆಸಿಕೊಳ್ಳುತ್ತಿಲ್ಲ. ಹಾಗಾಗಿ ಮನೆ ಕೆಲಸ ಮಾಡಿ ಕೊಳ್ಳುವುದರಲ್ಲೆ ಸಾಕಷ್ಟು ವರ್ಕ್ಔಟ್ ಆಗುತ್ತದೆ. ಜಿಯಾನ್ನನ್ನ ನೋಡಿಕೊಳ್ಳಲು ಅಮ್ಮ ಇರಲಿಲ್ಲ ಅಂದಿದ್ದರೆ ಇಷ್ಟೊತ್ತಿಗೆ ನಾನು ಹುಚ್ಚಿಯಾಗಿರುತ್ತಿದ್ದೆ. ಜಿಯಾನ್ ಕೂಡ ಅಮ್ಮನನ್ನು ತುಂಬ ಹಚ್ಚಿಕೊಂಡಿದ್ದಾನೆ. ಮಗು ಆದ ಮೇಲೆ ಲೈಫ್ ತುಂಬಾ ಬದಲಾಗುತ್ತೆ ಅಂತ ಕಸಿನ್ ಹೇಳುವಾಗ, ‘ಹೇ... ಕಮಾನ್ ನಾವೆಲ್ಲ ಬೆಳೆದಿಲ್ವಾ?’ ಅಂತ ಹೇಳುತ್ತಿದ್ದೆ. ಆದರೆ, ಈಗ ಹಾಗಿಲ್ಲ. ದಿನದ 24 ಗಂಟೆ ಅವನ ಕಡೆ ಗಮನ ಕೊಡಲೇಬೇಕು. ಮಕ್ಕಳ ಆಟ, ತರ್ಲೆ, ಕೀಟಲೆ, ಹಠ ಎಲ್ಲವನ್ನು ನಾವು ಕಿರಿಕಿರಿ ಎಂದುಕೊಳ್ಳದೆ ಎಂಜಾಯ್ ಮಾಡಬೇಕು. ತಾಯಿಯಂದಿರ ಸಹನೆ, ಕಾಳಜಿ ಎಲ್ಲ ನಾನು ತಾಯಿಯಾದ ಮೇಲೆ ಗೊತ್ತಾಗ್ತಾ ಇದೆ’ ಎಂದು ವಿಶ್ವದ ಎಲ್ಲ ತಾಯಂದಿರಿಗು ಶ್ವೇತಾ ನಮನ ಸಲ್ಲಿಸುತ್ತಾರೆ.
