ಸಿನಿಮಾ ಕುಟುಂಬದಿಂದ ಬಂದವರೆಲ್ಲ ಗೆಲ್ಲುತ್ತಾರೆ, ಚಿತ್ರರಂಗದಲ್ಲಿ ನೆಲೆ ನಿಲ್ಲುತ್ತಾರೆ ಎಂದು ಹೇಳುವುದು ಕಷ್ಟ. ಆದರೆ, ಸ್ಟಾರ್ ಕುಟುಂಬದಿಂದ ಬಂದವರಿಗೆ ಪ್ರಚಾರ, ಪ್ರಾಮುಖ್ಯತೆ ತುಸು ಬೇಗ ಮತ್ತು ಸ್ವಲ್ಪ ಜಾಸ್ತಿಯೇ ಸಿಗುತ್ತದೆ. ಇನ್ನು, ಜನರಿಗೂ ಅವರ ಮೇಲೆ ನಿರೀಕ್ಷೆ, ಕುತೂಹಲ ಹೆಚ್ಚಿರುತ್ತದೆ. ಇದು ಒಂಥರಾ ಪ್ಲಸ್ ಹೌದು, ಕೆಲವೊಮ್ಮೆ ಮೈನಸ್ ಸಹ ಹೌದು. ಆ ಕುತೂಹಲ ಮತ್ತು ನಿರೀಕ್ಷೆಗಳಿಗೆ ತಕ್ಕ ಹಾಗೆ ಚಿತ್ರಗಳು ನಿಲುಕದಿದ್ದರೆ ಅದರಿಂದ ಸಾಕಷ್ಟು ಹಿನ್ನೆಡೆಯಾಗುತ್ತದೆ. ಈಗಾಗಲೇ ಮೊದಲ ಚಿತ್ರದಲ್ಲೇ ಈ ರೀತಿ ಹಿನ್ನಡೆ ಕಂಡ ಸ್ಟಾರ್ ಕುಟುಂಬದ ಹಲವು ನಟ-ನಟಿಯರಿದ್ದಾರೆ. ಕೆಲವರು ಆರಂಭಿಕ ಸೋಲುಗಳ ನಡುವೆಯೂ ಚಿತ್ರರಂಗದಲ್ಲಿ ತಮ್ಮ ಪ್ರತಿಭೆ ಮತ್ತು ನಂತರದ ಯಶಸ್ಸುಗಳಿಂದ ಗೆಲುವು ಕಂಡುಕೊಂಡರೆ, ಇನ್ನೂ ಕೆಲವರು ಚಿತ್ರರಂಗದಿಂದಲೇ ದೂರವಾಗಿದ್ದಾರೆ.
