ಪ್ಯಾರಿಸ್‌ನ 'ಸಿನೆಮಾಟೆಕ್ ಫ್ರಾಂಚೈಸ್' ಸಂಸ್ಥೆಯ ಆಸನಕ್ಕೆ ಎಸ್‌ಎಸ್‌ ರಾಜಮೌಳಿ ಹೆಸರು; ಫಿಫಾ ವಿಶ್ವಕಪ್ ನಡುವೆಯೂ 'RRR' ಅಬ್ಬರ

ಈ ವಿಶೇಷ ಕಾರ್ಯಕ್ರಮದ ಭಾಗವಾಗಿ ರಾಜಮೌಳಿ ಅವರು ನಿರ್ದೇಶಿಸಿರುವ ಆರ್‌ಆರ್‌ಆರ್‌', 'ಬಾಹುಬಲಿ' ಮತ್ತು 'ಈಗ'ದಂತಹ ಹಿಟ್​​ ಸಿನಿಮಾಗಳ ಪ್ರದರ್ಶನವಿತ್ತು ಎನ್ನುವ ಬಗ್ಗೆ ಸೋಶಿಯಲ್​ ಮೀಡಿಯಾದಲ್ಲಿ ಮಾಹಿತಿ ಹರಿದಾಡುತ್ತಿದೆ. ಜೊತೆಗೆ ಸ್ವತಃ ರಾಜಮೌಳಿ ಅವರೇ ಎಕ್ಸ್​ನಲ್ಲಿ ಮಾಹಿತಿ ಹಂಚಿಕೊಂಡಿದ್ದಾರೆ.

ತಮಗೆ ಲಭಿಸಿರುವ ಗೌರವದ ಕುರಿತು ಎಕ್ಸ್​ನಲ್ಲಿ ಖ್ಯಾತ ನಿರ್ದೇಶಕ ರಾಜಮೌಳಿ ಅವರು ಮಾಹಿತಿ ಹಂಚಿಕೊಂಇಡದ್ದಾರೆ. 'ಪ್ಯಾರಿಸ್​ನಲ್ಲಿ ನನ್ನ ಸಿನಿಮಾ ಪ್ರದರ್ಶನವಾಗುವುದೇ ಒಂದು ದೊಡ್ಡ ಗೌರವ ಸಿಕ್ಕಂತೆ. ಇದೇ ಹೊತ್ತಲ್ಲಿ ನನಗೆ ಸಿಕ್ಕಿರುವ ಮಧುರ ಅಚ್ಚರಿಯನ್ನು ನಾನೆಂದಿಗೂ ನಿರೀಕ್ಷೆ ಮಾಡಿರಲಿಲ್ಲ. ವಿಶ್ವದ ಅತ್ಯಂದ ಪೌರಾಣಿಕ ಸಂಸ್ಥೆಯ ಹೆನ್ರಿ ಲ್ಯಾಂಗ್ಲೋಯಿಸ್​ ಸಭಾಂಗಣದಲ್ಲಿ ನನ್ನ ಹೆಸರಿನ ಖಾಯಂ ಸ್ಥಾನ ಸಿಕ್ಕಿರುವುದು ನಿಜಕ್ಕೂ ಸಂತಸದ ಸುದ್ದಿ. ಏನೆಂದು ವರ್ಣಿಸಲಿ ಪದಗಳೇ ಸಿಗುತ್ತಿಲ್ಲ. ನಾನು ನನ್ನ ಅಂತಿಮ ಜೀವನದವರೆಗೂ ಹೆಮ್ಮೆಯಿಂದ ನೆನಪು ಮಾಡಿಕೊಳ್ಳುತ್ತೇನೆ' ಎಂದು ಬರೆದುಕೊಂಡಿದ್ದಾರೆ.

ಪ್ಯಾರಿಸ್‌ನ ಅತ್ಯಂತ ಪ್ರಸಿದ್ಧ ಹಾಗೂ ಯುರೋಪ್‌ನಲ್ಲೇ ಅತಿ ದೊಡ್ಡದಾದ 'ಲೆ ಗ್ರ್ಯಾಂಡ್ ರೆಕ್ಸ್'ಚಿತ್ರಮಂದಿರದಲ್ಲಿ 'ಆರ್‌ಆರ್‌ಆರ್' ಚಿತ್ರದ ಪ್ರದರ್ಶನ ಏರ್ಪಡಿಸಲಾಗಿತ್ತು. ಸುಮಾರು 2,800 ಆಸನಗಳ ಸಾಮರ್ಥ್ಯವಿರುವ ಈ ಐತಿಹಾಸಿಕ ಚಿತ್ರಮಂದಿರದಲ್ಲಿ ಚಿತ್ರಕ್ಕೆ ಸಿಕ್ಕ ಭವ್ಯ ಪ್ರತಿಕ್ರಿಯೆಯ ವಿಡಿಯೋವನ್ನು ಹಂಚಿಕೊಂಡಿರುವ ಆರ್‌ಆರ್‌ಆರ್ ತಂಡ, "ಫ್ರಾನ್ಸ್ ಮತ್ತು ಸ್ವೀಡನ್ ನಡುವಿನ ಪ್ರಮುಖ ಫುಟ್‌ಬಾಲ್ ಪಂದ್ಯದ ನಡುವೆಯೂ ಪ್ಯಾರಿಸ್‌ನ ಲೆ ಗ್ರ್ಯಾಂಡ್ ರೆಕ್ಸ್‌ನಲ್ಲಿ ಚಿತ್ರಕ್ಕೆ ಭಾರಿ ಜನಸಾಗರ ಹರಿದುಬಂದಿದೆ. ಪ್ರೇಕ್ಷಕರ ಪ್ರತಿಕ್ರಿಯೆ ಎಂದಿನಂತೆ ಸ್ಫೋಟಕವಾಗಿದೆ. ಚಿತ್ರ ಬಿಡುಗಡೆಯಾಗಿ 4 ವರ್ಷ ಕಳೆದರೂ ಕ್ರೇಜ್ ಮಾತ್ರ ಕಮ್ಮಿಯಾಗಿಲ್ಲ" ಎಂದು ಬರೆದುಕೊಂಡಿದೆ.

ಚಲನಚಿತ್ರ ಇತಿಹಾಸವನ್ನು ಸಂರಕ್ಷಿಸುವಲ್ಲಿ ವಿಶ್ವದಾದ್ಯಂತ ಹೆಸರುವಾಸಿಯಾಗಿರುವ ಹೆನ್ರಿ ಲ್ಯಾಂಗ್ಲೋಯಿಸ್ ಸ್ಥಾಪಿತ 'ಸಿನೆಮಾಟೆಕ್ ಫ್ರಾಂಚೈಸ್' ಸಂಸ್ಥೆ ನೀಡಿದ ಈ ಗೌರವ ಭಾರತೀಯ ಚಿತ್ರರಂಗಕ್ಕೇ ಹೆಮ್ಮೆಯ ಕ್ಷಣವಾಗಿದೆ. ಈ ಸಮಾರಂಭದಲ್ಲಿ ರಾಜಮೌಳಿ ಅವರು ಖ್ಯಾತ ಆಸ್ಕರ್ ಪ್ರಶಸ್ತಿ ವಿಜೇತ ಚಿತ್ರನಿರ್ದೇಶಕ ಕೋಸ್ಟಾ-ಗವ್ರಾಸ್ಅವರನ್ನು ಭೇಟಿಯಾದರು. ವಿಶೇಷವೆಂದರೆ, ರಾಜಮೌಳಿ ಅವರ ಮೇಲಿನ ಗೌರವದಿಂದಾಗಿ ಕೋಸ್ಟಾ-ಗವ್ರಾಸ್ ಅವರು ಸಮಾರಂಭಕ್ಕೆ ಬರುವ ಮುನ್ನ ಸತತ 8 ಗಂಟೆಗಳ ಕಾಲ ರಾಜಮೌಳಿ ಅವರ ಸಿನಿಮಾಗಳನ್ನು ವೀಕ್ಷಿಸಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.

ಬಾಹುಬಲಿ ಮತ್ತು ಆರ್‌ಆರ್‌ಆರ್ ನಂತರ ರಾಜಮೌಳಿ ಅವರ ಮುಂದಿನ ಮ್ಯಾಜಿಕ್ ನೋಡಲು ಪ್ರೇಕ್ಷಕರು ಕಾಯುತ್ತಿದ್ದಾರೆ. ಮಹೇಶ್ ಬಾಬು, ಪೃಥ್ವಿರಾಜ್ ಸುಕುಮಾರನ್ ಮತ್ತು ಪ್ರಿಯಾಂಕಾ ಚೋಪ್ರಾ ಮುಖ್ಯ ಭೂಮಿಕೆಯಲ್ಲಿ ನಟಿಸುತ್ತಿರುವ ರಾಜಮೌಳಿ ನಿರ್ದೇಶನದ ಬಹುನಿರೀಕ್ಷಿತ ಪ್ಯಾನ್-ಇಂಡಿಯಾ ಚಿತ್ರಕ್ಕೆ 'ವಾರಣಾಸಿ' ಎಂದು ಹೆಸರಿಡಲಾಗಿದ್ದು, ಇದು ಏಪ್ರಿಲ್ 2027 ರಲ್ಲಿ ತೆರೆಕಾಣಲಿದೆ. ಭೂಮಿಗೆ ಅಪ್ಪಳಿಸಲಿರುವ ವಿನಾಶಕಾರಿ ಕ್ಷುದ್ರಗ್ರಹವನ್ನು ತಡೆಯಲು ವಿವಿಧ ಶತಮಾನಗಳು ಮತ್ತು ಖಂಡಗಳ ನಡುವೆ ಪ್ರಯಾಣಿಸುವ 'ಟೈಮ್ ಟ್ರಾವೆಲಿಂಗ್ ಹೀರೋ' ಕಥೆಯನ್ನು ಈ ಸಿನಿಮಾ ಹೊಂದಿದ್ದು, ಅತ್ಯಂತ ಬೃಹತ್ ವೆಚ್ಚದಲ್ಲಿ ನಿರ್ಮಾಣವಾಗುತ್ತಿದೆ,(ಏಜೆನ್ಸೀಸ್).