ಕರ್ನಾಟಕ, ಆಂಧ್ರ, ತೆಲಂಗಾಣ ಮುಂತಾದ ಕಡೆ ಶೇ. 50ರಷ್ಟು ಪ್ರೇಕ್ಷಕರ ಹಾಜರಾತಿಗೆ ಅನುಮತಿ ನೀಡಲಾಗಿದೆಯಾದರೂ, ಮಹಾರಾಷ್ಟ್ರ ಸೇರಿ ಹಲವು ರಾಜ್ಯಗಳಲ್ಲಿ ಶೇ. 50ರಷ್ಟು ಹಾಜರಾತಿಗೂ ಅನುಮತಿ ನೀಡಿಲ್ಲ. ಯಾವಾಗ ಅನುಮತಿ ಸಿಗಬಹುದು ಎಂಬುದು ಸಹ ಯಾರಿಗೂ ಗೊತ್ತಿಲ್ಲ. ಏಕೆಂದರೆ, ಕರೊನಾ ಕೇಸ್ಗಳ ಸಂಖ್ಯೆ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಇದು ಮೂರನೆಯ ಅಲೆಯಾ ಎಂದು ಯಾವ ರಾಜ್ಯದಲ್ಲೂ ಅಥವಾ ಯಾವ ಸರ್ಕಾರ ಸಹ ಅಧಿಕೃತ ಘೋಷಣೆಯನ್ನು ಮಾಡಿಲ್ಲ. ಆಗಸ್ಟ್ ಅಥವಾ ಸೆಪ್ಟೆಂಬರ್ನಲ್ಲಿ ಕರೊನಾ ಮೂರನೇ ಅಲೆ ಬರುವ ಸಾಧ್ಯತೆ ಇದೆ ಅಂತೆಲ್ಲ ಸುದ್ದಿಗಳು ಇರುವುದರಿಂದ, ಇಂತಹ ಸಂದರ್ಭದಲ್ಲಿ ಚಿತ್ರ ಬಿಡುಗಡೆ ಮಾಡಬೇಕಾ ಎಂಬ ಗೊಂದಲ ಎಲ್ಲ ಚಿತ್ರರಂಗಗಳನ್ನೂ ಕಾಡುತ್ತಿದೆ. ಜತೆಗೆ ಸರ್ಕಾರಗಳೂ ಸಹ ಚಿತ್ರರಂಗದ ಕುರಿತಾಗಿ ತೀರ್ಮಾನ ತೆಗೆದುಕೊಳ್ಳದೇ ಇರುವುದರಿಂದ ಆತಂಕ ಹೆಚ್ಚಾಗಿದೆ. ಅಂದುಕೊಂಡ ದಿನಾಂಕಕ್ಕೆ ಬಿಡುಗಡೆ ಸಾಧ್ಯವಾದರೆ, ಇನ್ನೊಂದು ದಿನ ಬರುವುದೇನೋ ಇದ್ದೇ ಇದೆ. ಆದರೆ, ಅದರಿಂದ ಬೇರೆ ಚಿತ್ರಗಳಿಗೆ ಸಮಸ್ಯೆ ಎದುರಾಗಿ, ಆ ಚಿತ್ರಗಳೂ ಮುಂದಕ್ಕೆ ಹೋಗುವ ಸಾಧ್ಯತೆ ಇದೆ. ಕೆಲವರು ಮುನ್ನೆಚ್ಚರಿಕೆಯಾಗಿ, ಅಕ್ಟೋಬರ್ನಿಂದ ತಮ್ಮ ಚಿತ್ರಗಳ ಬಿಡುಗಡೆ ದಿನಾಂಕ ಘೋಷಿಸಿದ್ದಾರೆ. ಮೂರನೆಯ ಅಲೆ ಬಂದರೂ ಅಷ್ಟರಲ್ಲಿ ಪರಿಸ್ಥಿತಿ ಸರಿ ಹೋಗಬಹುದು ಎಂಬ ಅಂದಾಜಿನಿಂದ ದೂರದ ದಿನಾಂಕಗಳನ್ನು ಈಗಲೇ ಫಿಕ್ಸ್ ಮಾಡಿದ್ದಾರೆ. ‘ಕೆಜಿಎಫ್ 2’, ‘ಕೋಟಿಗೊಬ್ಬ 3’ ಸೇರಿ ಕೆಲವು ಚಿತ್ರತಂಡಗಳು ಸದ್ಯಕ್ಕೆ ಯಾವುದೇ ದಿನಾಂಕ ಫಿಕ್ಸ್ ಮಾಡಿಲ್ಲ. ಸುಮ್ಮನೆ ಗೊಂದಲ ಬೇಡ, ಮುಂದೆ ನೋಡಿಕೊಂಡು ನಿರ್ಧಾರಕ್ಕೆ ಬಂದರಾಯ್ತು ಎಂದು ಸುಮ್ಮನಿದ್ದಾರೆ. ಒಟ್ಟಾರೆ, ಚಿತ್ರರಂಗದಲ್ಲಿ ಒಂದು ವಿಚಿತ್ರವಾದ ಗೊಂದಲ ಮತ್ತು ಅನಿಶ್ಚಿತತೆ ಇದೆ. ಇದರಿಂದ ಚಿತ್ರರಂಗ ಯಾವಾಗ ಹೊರಗೆ ಬರುತ್ತದೋ?
