ಹೆಣ್ಣು ಗಂಡಿಗಿಂತ ಯಾವತ್ತಿದ್ದರೂ ಒಂದು ಕೈ ಮೇಲೆಯೇ ಇರುತ್ತಾಳೆ. ಮಗುವಿಗೆ ಜನ್ಮ ನೀಡುವವಳೂ ಹೆಣ್ಣೇ. ತಿಂಗಳಲ್ಲಿ ಮೂರು ದಿನದ ನೋವನ್ನು ಅನುಭವಿಸುವವಳೂ ಹೆಣ್ಣೇ. ಹಾಗಂತ ಗಂಡು ಕೀಳು, ಹೆಣ್ಣು ಮೇಲು ಎಂದು ಹೇಳುತ್ತಿಲ್ಲ. ಎರಡೂ ಒಂದೇ ನಾಣ್ಯದ ಮುಖಗಳಿದ್ದಂತೆ. ಒಂದೇ ವಾಹನದ ಚಕ್ರಗಳಿದ್ದಂತೆ. ಯಾವ ಒಂದು ಚಕ್ರ ಪಂಕ್ಚರ್ ಆದರೂ ಗಾಡಿ ಮುಂದೆ ಹೋಗದು. ಆದರೆ, ಅಲ್ಲಿ ಪರಸ್ಪರ ಗೌರವ ಮುಖ್ಯ. ನಮ್ಮನ್ನು ಅವರು, ಅವರನ್ನು ನಾವು ಗೌರವಿಸಬೇಕು. ಅಂದಾಗ ಮಾತ್ರ ಸಮಾನತೆಯ ವಾಹನ ಸರಿದಾರಿಯಲ್ಲಿಯೇ ಸಾಗಲು ಸಾಧ್ಯ. ಇಂದಿಗೂ ಬಹುತೇಕ ಎಲ್ಲರ ಮನೆಯಲ್ಲಿ ತಾಯಿಯಾದವಳು ಕೊನೆಯಲ್ಲಿಯೇ ಊಟ ಮಾಡುತ್ತಾಳೆ. ಅದು ಆಕೆಯ ಜವಾಬ್ದಾರಿ, ಮನೆ ಮಂದಿಗೆ ನೀಡುವ ಗೌರವ. ಇದನ್ನು ಬಿಟ್ಟರೆ, ಜಾಲತಾಣಗಳಲ್ಲಿ ಹೆಣ್ಣನ್ನು ದೂಷಿಸುವ ಕೆಲಸ ಹೆಚ್ಚಾಗಿ ನಡೆಯುತ್ತಿದೆ. ಬರೀ ಪುರುಷರಷ್ಟೇ ಈ ಕೆಲಸ ಮಾಡುತ್ತಿಲ್ಲ. ಹೆಣ್ಣನ್ನು ಹೆಣ್ಣೇ ದೂಷಿಸುವ ಕೆಲಸವಾಗುತ್ತಿದೆ. ಎದುರುಗಡೆ ಏನು ಕಾಣುತ್ತದೆಯೋ ಅದನ್ನು ನೋಡಿ ಜಡ್ಜ್ ಮಾಡಬೇಡಿ.
