ಅಭಿಮಾನಿಯನ್ನೇ ಏರ್​ಲಿಫ್ಟ್​ ಮಾಡಿಸುತ್ತಿದ್ದಾರೆ ಸೋನು!

ಮುಂಬೈ: ಲಾಕ್​ಡೌನ್​ ಸಮಯದಲ್ಲಿ ಹಲವು ವಲಸೆ ಕಾರ್ಮಿಕರನ್ನು ತಮ್ಮ ಸ್ವಂತ ರಾಜ್ಯಗಳಿಗೆ ಏರೋಪ್ಲೇನ್​ ಮೂಲಕ ಸೋನು ಸೂದ್​ ಕಳುಹಿಸಿಕೊಟ್ಟಿದ್ದು ಎಲ್ಲರಿಗೂ ನೆನಪಿರಬಹುದು. ಈಗ ಅವರು ಅಭಿಮಾನಿಯೊಬ್ಬನನ್ನು ಏರ್​ಲಿಫ್ಟ್​ ಮಾಡಿಸಿಕೊಂಡು ಮುಂಬೈಗೆ ಕರೆಸಿಕೊಳ್ಳುತ್ತಿದ್ದಾರೆ.

ಇದನ್ನೂ ಓದಿ: ಆಸ್ಕರ್​ ಸ್ಪರ್ಧೆಗೆ ಮಲಯಾಳಂ ಚಿತ್ರ ‘ಜಲ್ಲಿಕಟ್ಟು’ ಆಯ್ಕೆ

ಸೋನು ಸೂದ್​ ಅವರ ಅಭಿಮಾನಿಯೊಬ್ಬ ಅವರನ್ನು ಭೇಟಿ ಮಾಡುವುದಕ್ಕೆ ಬಿಹಾರದಿಂದ ಮುಂಬೈಗೆ ಸೈಕಲ್​ನಲ್ಲಿ ಬರುವುದಾಗಿ ಹೇಳಿಕೊಂಡಿದ್ದ. ಅಷ್ಟೇ ಅಲ್ಲ, ವಾರಣಾಸಿಯವರೆಗೂ ಬಂದಿದ್ದನಂತೆ. ಈ ವಿಷಯ ತಿಳಿದ ಸೋನು, ಆತನನ್ನು ಏರೋಪ್ಲೇನ್​ ಮೂಲಕ ಕರೆಸಿಕೊಳ್ಳುತ್ತಿರುವುದು ವಿಶೇಷ.

ಈ ಕುರಿತು ಸಂದರ್ಶನವೊಂದರಲ್ಲಿ ಮಾತನಾಡಿರುವ ಸೋನು, 'ನಾನು ಅರ್ಮಾನ್​ ಅವರನ್ನು ಸಂಪರ್ಕಿಸಿದ್ದೇನೆ. ನನ್ನನ್ನು ಭೇಟಿ ಮಾಡುವುದಕ್ಕೆ ಯಾವುದೇ ಸಮಸ್ಯೆ ಇಲ್ಲ. ಆದರೆ, ಈ ರೀತಿ ಜೀವವನ್ನು ಪಣಕ್ಕಿಟ್ಟು ಬರುವುದು ಸರಿಯಲ್ಲ ಎಂದು ಅರ್ಥ ಮಾಡಿಸಿದೆ. ಅಷ್ಟೇ ಅಲ್ಲ, ಫ್ಲೈಟ್​ನಲ್ಲಿ ಬರುವುದಕ್ಕೆ ವ್ಯವಸ್ಥೆ ಮಾಡಿದ್ದೇನೆ. ಮುಂಬೈಗೆ ಬಂದ ನಂತರ ಆತ ಒಂದು ಹೋಟೆಲ್​ನಲ್ಲಿ ಉಳಿದುಕೊಂಡು, ಆ ನಂತರ ನನ್ನನ್ನು ಭೇಟಿ ಮಾಡಲಿದ್ದಾನೆ. ಆ ನಂತರ ಆತನನ್ನು ಬಿಹಾರಕ್ಕೆ ವಾಪಸ್ಸು ಕಳಿಸುವ ವ್ಯವಸ್ಥೆಯನ್ನು ಮಾಡಿದ್ದೇನೆ' ಎಂದು ಅವರು ಹೇಳಿಕೊಂಡಿದ್ದಾರೆ.

ಬರೀ ಅರ್ಮಾನ್​ ಅಷ್ಟೇ ಅಲ್ಲ, ಆತನ ಸೈಕಲ್​ ಸಹ ಮುಂಬೈಗೆ ಏರೋಪ್ಲೇನ್​ನಲ್ಲಿ ಬರಲಿದ್ದು, ಆತನ ಜತೆಗೇ ಬಿಹಾರಕ್ಕೆ ವಾಪಸ್ಸಾಗಲಿದೆಯಂತೆ. ಇನ್ನು ಬಿಹಾರದಲ್ಲಿ ಸೋನುಗೆ ಸಾಕಷ್ಟು ಅಭಿಮಾನಿಗಳಿದ್ದು, ಅವರನ್ನು ನೋಡುವುದಕ್ಕೆ ಸೋನು ಯಾವಾಗ ಬರುತ್ತಾರೆ ಎಂದು ಎಲ್ಲರೂ ಕಾಯುತ್ತಿದ್ದಾರೆ.

ಇದನ್ನೂ ಓದಿ: ಜಗ್ಗೇಶ್​ ಹೀರೋ ಆಗುವುದಕ್ಕೆ ಪ್ರೇರೇಪಿಸಿದ್ದು ಯಾರು ಗೊತ್ತಾ?

ಈ ಕುರಿತು ಮಾತನಾಡಿರುವ ಸೋನು, 'ಅಭಿಮಾನಿಗಳನ್ನು ಭೇಟಿ ಮಾಡುವುದಕ್ಕೆ ನಾನು ಸಹ ತುದಿಗಾಲಲ್ಲಿ ನಿಂತಿರುವೆ. ಆದರೆ, ಅದಕ್ಕೆ ಸ್ವಲ್ಪ ಸಮಯ ಬೇಕು. ಸದ್ಯಕ್ಕೆ ಈ ಸಮಸ್ಯೆಗಳೆಲ್ಲಾ ಮುಗಿಯುತ್ತಾ ಬಂದಿದ್ದರೂ, ಇನ್ನಷ್ಟು ಜನರಿಗೆ ನನ್ನ ಅವಶ್ಯಕತೆ ಇದೆ. ಅವರಿಗೆ ಸಹಾಯ ಮಾಡಿ, ಆ ನಂತರ ಭೇಟಿಯಾಗುವುದಕ್ಕೆ ಹೊರಡುತ್ತೇನೆ' ಎಂದು ಅವರು ಹೇಳಿದ್ದಾರೆ.

https://www.vijayavani.net/amitabh-bachchan-shoots-with-wife-jaya-and-daughter-shweta/