ಕರ್ನಾಟಕದಲ್ಲಿದ್ದಂತೆ ಆಂಧ್ರ ಪ್ರದೇಶ ಮತ್ತು ತೆಲಂಗಾಣದಲ್ಲಿ ನೈಟ್ ಕರ್ಫ್ಯೂ, ವೀಕೆಂಡ್ ಕರ್ಫ್ಯೂ ಯಾವುದೂ ಇಲ್ಲ. ಅಲ್ಲಿ ಪರಿಸ್ಥಿತಿ ಸಹಜವಾಗಿದ್ದು, ಶೇ. 100ರಷ್ಟು ಹಾಜರಾತಿಗೆ ಚಿತ್ರಗಳು ಬಿಡುಗಡೆಯಾಗುತ್ತಿವೆ. ಆದರೆ, ಜ.7ಕ್ಕೆ ಬಿಡುಗಡೆಯಾಗಬೇಕಿದ್ದ ‘ಆರ್ಆರ್ಆರ್’ ಮತ್ತು ಜ.14ಕ್ಕೆ ಬಿಡುಗಡೆಯಾಗಬೇಕಿದ್ದ ‘ರಾಧೆ ಶ್ಯಾಮ್ ಎಂಬ ಎರಡು ದೈತ್ಯ ಚಿತ್ರಗಳಿಂದ ಸಣ್ಣ ಚಿತ್ರಗಳೆಲ್ಲ ಹೆದರಿ ಪಕ್ಕಕ್ಕಿದ್ದವು. ಎರಡೂ ಚಿತ್ರಗಳ ಬಿಡುಗಡೆ ಇದೀಗ ಮುಂದಕ್ಕೆ ಹೋಗಿವೆ. ಯಾವಾಗ ಈ ಚಿತ್ರಗಳು ಮುಂದಕ್ಕೆ ಹೋಗುತ್ತವೆ ಎಂದು ಗೊತ್ತಾಯಿತೋ, ಏಳು ಚಿತ್ರಗಳು ಬಿಡುಗಡೆಯಾಗುವುದಕ್ಕೆ ಪೈಪೋಟಿ ನಡೆಸಿವೆ. ಏಳು ಚಿತ್ರಗಳ ಪೈಕಿ ಚಿರಂಜೀವಿ ಅಳಿಯ ಕಲ್ಯಾಣ್ ದೇವ್ ಮತ್ತು ರಚಿತಾ ರಾಮ್ ಅಭಿನಯದ ‘ಸೂಪರ್ ಮಚ್ಚಿ’, ರಾಣಾ ದಗ್ಗುಬಾಟಿ ಅಭಿನಯದ ‘1945’, ಸಾಯಿಕುಮಾರ್ ಮಗ ಆದಿ ಸಾಯಿಕುಮಾರ್ ಅಭಿನಯದ ‘ಅತಿಥಿ ದೇವೋಭವ’, ನೇಹಾ ಶೆಟ್ಟಿ ನಟನೆಯ ‘ಡಿಜೆ ಟಿಲ್ಲು’, ‘ರೌಡಿ ಬಾಯ್್ಸ, ‘7 ಡೇಸ್ 6 ನೈಟ್ಸ್’ ಮತ್ತು ‘ಹೀರೋ’ ಚಿತ್ರಗಳು ಬಿಡುಗಡೆಯಾಗುತ್ತಿವೆ.
