ಭಾರತೀಯ ಚಿತ್ರ ಎಂದು ನೋಡಿ..; ಚಿತ್ರಗಳನ್ನು ಭಾಷೆಗೆ ಸೀಮಿತ ಮಾಡದಿರಲು ಯಶ್ ಮನವಿ

ಬೆಂಗಳೂರು: ಅಷ್ಟೊಂದು ದೊಡ್ಡ ಸಂಖ್ಯೆಯಲ್ಲಿ ಜನ ಬರಬಹುದು, ಅಷ್ಟೊಂದು ಸಂದರ್ಶನಗಳನ್ನು ಎದುರಿಸಬೇಕಾಗಬಹುದು, ಅಷ್ಟೊಂದು ಪ್ರಶ್ನೆಗಳಿಗೆ ಉತ್ತರಿಸಬೇಕಾಗಬಹುದು ಎಂದು ಯಶ್ ಮತ್ತು ಚಿತ್ರತಂಡದವರು ನಿರೀಕ್ಷಿಸಿದ್ದರೋ ಇಲ್ಲವೋ ಗೊತ್ತಿಲ್ಲ. ಆದರೆ, ‘ಕೆಜಿಎಫ್ 2’ ಚಿತ್ರದ ಪ್ರಚಾರ ಯಾತ್ರೆಯಲ್ಲಿ ಅವೆಲ್ಲವನ್ನೂ ನೋಡುವಂತಾಗಿದೆ. ಮೊದಲ ಭಾಗದ ಬಿಡುಗಡೆಯ ಸಂದರ್ಭದಲ್ಲಿ ಚಿತ್ರಕ್ಕೆ ಈ ಮಟ್ಟದ ಹೈಪ್ ಇರಲಿಲ್ಲ. ಯಾವಾಗ ಚಿತ್ರ ಯಶಸ್ವಿಯಾಯಿತೋ, ‘ಕೆಜಿಎಫ್’ ಎರಡನೆಯ ಭಾಗಕ್ಕೆ ಕುತೂಹಲ ಮತ್ತು ನಿರೀಕ್ಷೆ ಎರಡೂ ಹೆಚ್ಚಾಗಿದೆ. ‘ಕೆಜಿಎಫ್ 2’ ಯಾವುದೋ ಒಂದು ಭಾಷೆಗೆ ಸೀಮಿತವಾಗದೆ, ಭಾರತೀಯ ಚಿತ್ರ ಎಂದು ಬಿಂಬಿತವಾಗುತ್ತಿದೆ.

ಯಶ್ ಹೋದಲ್ಲಿ ಬಂದಲ್ಲಿ ಒಂದು ಪ್ರಶ್ನೆ ಎದುರಾಗುತ್ತಿದೆ. ಕನ್ನಡ ಚಿತ್ರವೊಂದು ಇಡೀ ದೇಶದಲ್ಲಿ ದೊಡ್ಡ ಮಟ್ಟಿಗೆ ಬಿಡುಗಡೆಯಾಗುತ್ತಿರುವ ಬಗ್ಗೆ, ಪ್ಯಾನ್ ಇಂಡಿಯಾ ಚಿತ್ರಗಳ ಬಗ್ಗೆ ಕೇಳಲಾಗುತ್ತಿದೆ. ಈ ಬಗ್ಗೆ ಬೆಂಗಳೂರಿನ ಪತ್ರಿಕಾಗೋಷ್ಠಿಯಲ್ಲೇ ಯಶ್ ಒಂದಿಷ್ಟು ವಿಚಾರಗಳನ್ನು ಹಂಚಿಕೊಂಡಿದ್ದರು. ಈಗ ಬೇರೆ ಊರುಗಳ ಪತ್ರಿಕಾಗೋಷ್ಠಿಯಲ್ಲೂ ಮಾತನಾಡಿದ್ದಾರೆ. ಒಂದು ಚಿತ್ರವನ್ನು ಒಂದು ಭಾಷೆಗೆ ಮಾತ್ರ ಸೀಮಿತ ಮಾಡದೆ, ಭಾರತೀಯ ಚಿತ್ರ ಎಂದು ನೋಡಬೇಕಿದೆ ಎಂದು ಹೇಳಿದ್ದಾರೆ.

ಈ ಕುರಿತು ಮಾತನಾಡಿರುವ ಅವರು, ‘ಉತ್ತರ, ದಕ್ಷಿಣ ಎನ್ನುವುದೆಲ್ಲ ದಿಕ್ಕುಗಳಷ್ಟೇ. ಚಿತ್ರರಂಗಗಳನ್ನು ಭಾಷೆ ಮತ್ತು ಪ್ರಾಂತ್ಯಗಳ ಆಧಾರದ ಮೇಲೆ ವಿಂಗಡಿಸುವುದು ಹಳೆಯ ಕಾನ್ಸೆಪ್ಟ್. ಯಾವುದೋ ವುಡ್ ಅಥವಾ ಒಂದು ಭಾಷೆ ಎನ್ನುವುದಕ್ಕಿಂತ ನಾವು ಭಾರತೀಯರು ಎಂಬುದನ್ನು ಅರ್ಥ ಮಾಡಿಕೊಳ್ಳಬೇಕು. ಒಂದು ಚಿತ್ರವನ್ನು ಒಂದು ಭಾಷೆಗೆ ಸೀಮಿತ ಮಾಡದೆ, ಭಾರತೀಯ ಚಿತ್ರ ಎಂದು ನೋಡಬೇಕು’ ಎನ್ನುತ್ತಾರೆ ಯಶ್.

ಈ ಬಗ್ಗೆ ಇನ್ನಷ್ಟು ಮಾತನಾಡುವ ಅವರು, ‘ಜನರಿಗೆ ಮನರಂಜನೆ ಬೇಕು ಮತ್ತು ಆ ಮನರಂಜನೆ ದೇಶದ ಯಾವುದೇ ಭಾಗದಿಂದ ಸಿಕ್ಕರೂ ಅದನ್ನು ಒಪ್ಪಿಕೊಳ್ಳುತ್ತಾರೆ. ಇವತ್ತು ಭಾರತೀಯರು ಬೇರೆಬೇರೆ ದೇಶದ ಚಿತ್ರಗಳನ್ನು ನೋಡುತ್ತಿದ್ದಾರೆ. ಈ ವುಡ್​ಗಳು ಬರೀ ಚಿತ್ರರಂಗದ ಜನರ ಮನಸ್ಸಿನಲ್ಲಿದೆ. ಮಿಕ್ಕಂತೆ ಜನ ಬಹಳ ಮುಂದೆ ಹೋಗಿದ್ದಾರೆ. ಒಬ್ಬ ವೀಕ್ಷಕನಾಗಿ ನಾನು ಒಂದು ಚಿತ್ರವನ್ನು ಅದು ಹಿಂದಿಯದ್ದೋ, ತೆಲುಗಿನದ್ದೋ ಅಥವಾ ತಮಿಳಿನದ್ದೋ ಎಂದು ನೋಡುವುದಿಲ್ಲ. ನಾವೆಲ್ಲರೂ ಭಾರತೀಯ ಚಿತ್ರರಂಗದವರು ಮತ್ತು ಇನ್ನಾದರೂ ಈ ವುಡ್​ಗಳನ್ನು ಬಿಟ್ಟು, ಭಾರತೀಯ ಚಿತ್ರರಂಗ ಎಂದು ಕರೆಯಬೇಕು. ಚಿತ್ರಗಳನ್ನು ಸಂಭ್ರಮಿಸಬೇಕು’ ಎಂದು ಹೇಳಿದ್ದಾರೆ. ಅಂದಹಾಗೆ, ‘ಕೆಜಿಎಫ್ 2’ ಚಿತ್ರವು ಏ. 14ರಂದು ಜಗತ್ತಿನಾದ್ಯಂತ ಬಿಡುಗಡೆಯಾಗುತ್ತಿದೆ.

ನಿಮಗಿದು ಗೊತ್ತಾ?

• ಕೆಜಿಎಫ್ 2’ ಚಿತ್ರದ ಹಿಂದಿ ಅವತರಣಿಕೆಯ ಸೆನ್ಸಾರ್ ಆಗಿದ್ದು ‘ಯು/ಎ’ ಪ್ರಮಾಣಪತ್ರ ಸಿಕ್ಕಿದೆ. ಚಿತ್ರಕ್ಕೆ ಸೆನ್ಸಾರ್ ಮಂಡಳಿ ಯಾವುದೇ ಕಟ್, ಮ್ಯೂಟ್​ಗಳನ್ನು ನೀಡಿಲ್ಲ.
• ಸೆನ್ಸಾರ್ ಪ್ರಮಾಣ ಪತ್ರದ ಪ್ರಕಾರ ಚಿತ್ರದ ಅವಧಿ 168.06 ನಿಮಿಷವಿದೆ (2 ಗಂಟೆ 48 ನಿಮಿಷ ಮತ್ತು 06 ಸೆಕೆಂಡ್).
• ಉತ್ತರ ಭಾರತ, ತಮಿಳುನಾಡು ಮತ್ತು ಕೇರಳದಲ್ಲಿ ಅಡ್ವಾನ್ಸ್ ಬುಕಿಂಗ್ ಗುರುವಾರದಿಂದ ಶುರುವಾಗಿದೆ. ಕರ್ನಾಟಕ, ಆಂಧ್ರ ಮತ್ತು ತೆಲಂಗಾಣದಲ್ಲಿ ಏ. 10ರಿಂದ ಅಡ್ವಾನ್ಸ್ ಬುಕಿಂಗ್ ಪ್ರಾರಂಭವಾಗಲಿದೆ.
• ಐಮ್ಯಾಕ್ಸ್ ಚಿತ್ರಮಂದಿರಗಳಲ್ಲಿ ಬಿಡುಗಡೆ ಆಗುತ್ತಿರುವ ಮೊದಲ ಕನ್ನಡ ಚಿತ್ರ ಎಂಬ ಹೆಗ್ಗಳಿಕೆಗೆ ‘ಕೆಜಿಎಫ್ 2’ ಪಾತ್ರವಾಗಿದೆ.
• ಕೆಜಿಎಫ್ 2’ ಚಿತ್ರ ನೋಡುವ ಪ್ರೇಕ್ಷಕರಿಗೆ ಅನುಕೂಲವಾಗಲಿ ಎಂಬ ನಿಟ್ಟಿನಲ್ಲಿ ಮೊದಲ ಭಾಗವನ್ನು ಇಂದು (ಏ. 8) ಬೆಂಗಳೂರು, ಮಂಗಳೂರು, ಮೈಸೂರು, ಹೈದರಾಬಾದ್, ಚೆನ್ನೈ, ಕೊಯಮತ್ತೂರು, ಕೊಚ್ಚಿನ್ ಮುಂತಾದ ಕಡೆ ಬಿಡುಗಡೆ ಮಾಡಲಾಗುತ್ತಿದೆ.
• ಅಮೆರಿಕಾದಲ್ಲಿ ಚಿತ್ರವು ಏ.13ಕ್ಕೆ ಬಿಡುಗಡೆಯಾಗುತ್ತಿದ್ದು, ಈಗಾಗಲೇ ಅಡ್ವಾನ್ಸ್ ಬುಕಿಂಗ್ ಶುರುವಾಗಿದೆ. ಇಂಗ್ಲೆಂಡ್​ನಲ್ಲಿ ಬುಕಿಂಗ್ ಶುರುವಾದ 12 ತಾಸುಗಳಲ್ಲಿ ದಾಖಲೆಯ ಐದು ಸಾವಿರ ಟಿಕೆಟ್​ಗಳು ಮಾರಾಟವಾಗಿವೆ.
• ಗ್ರೀಸ್​ನಲ್ಲಿ ಬಿಡುಗಡೆ ಅಗುತ್ತಿರುವ ಮೊದಲ ದಕ್ಷಿಣ ಭಾರತದ ಚಿತ್ರ ಎಂಬ ಹೆಗ್ಗಳಿಕೆಗೆ ಚಿತ್ರ ಪಾತ್ರವಾಗಿದ್ದು, ರಷ್ಯಾದಲ್ಲಿ ಎಲ್ಲಾ ಐದು ಭಾಷೆಗಳಲ್ಲಿ ರಷ್ಯನ್ ಸಬ್​ಟೈಟಲ್​ಗಳೊಂದಿಗೆ ಬಿಡುಗಡೆಯಾಗುತ್ತಿದೆ.
• ಕೆಜಿಎಫ್ 2’ ಜತೆಗೆ ಪ್ರಭಾಸ್ ನಟನೆಯ ‘ಸಲಾರ್’ ಟೀಸರ್ ಬಿಡುಗಡೆಯಾಗಲಿದೆ.

https://www.vijayavani.net/covid-19-precaution-dose-for-all-adults/

https://www.vijayavani.net/26-11-mastermind-hafiz-saeed-was-today-sentenced-to-jail-for-31-years/