ದಾಂಪತ್ಯ ಜೀವನಕ್ಕೆ ಕಾಲಿಡಲು ಸಜ್ಜಾದ ರಾಕೇಶ್ ಅಡಿಗ: ಮಾಧುರಿ ಸಿಂಗ್​​ ಜತೆ ಉಂಗುರ ಬದಲಿಸಿಕೊಂಡ 'ಜೋಶ್​' ನಾಯಕ! Rakesh Adiga

ಬೆಂಗಳೂರು: ಜೋಶ್ ಸಿನಿಮಾ ಮೂಲಕ ಸ್ಯಾಂಡಲ್​ವುಡ್​ಗೆ ಪಾದಾರ್ಪಣೆ ಮಾಡಿ, ನಂತರ ಬಿಗ್​ಬಾಸ್​ ಓಟಿಟಿ ಹಾಗೂ ಕನ್ನಡ ಬಿಗ್​ಬಾಸ್ ಸೀಸನ್​ 9 ರ ರನ್ನರ್​ ಆಗಿ ಹೊರಹೊಮ್ಮಿದ್ದ ರಾಕೇಶ್ ಅಡಿಗ ಈಗ ದಾಂಪತ್ಯ ಜೀವನಕ್ಕೆ ಕಾಲಿಡಲು ಸಜ್ಜಾಗಿದ್ದು, ಇವರ ಎಂಗೇಜ್​ಮೆಂಟ್​ ಫೋಟೊಗಳು ಸೋಷಿಯಲ್​ ಮೀಡಿಯಾನಲ್ಲಿ ವೈರಲ್ ಆಗುತ್ತಿವೆ.

ಈ ಶುಭ ಸಮಾರಂಭವನ್ನು ಅತ್ಯಂತ ವಿಜೃಂಭಣೆಯಿಂದ ಆಚರಿಸಲಾಗಿದ್ದು, ಗುರು-ಹಿರಿಯರ, ಬಂಧು-ಮಿತ್ರರ ಸಮ್ಮುಖದಲ್ಲಿ ರಾಕೇಶ್ ತಮ್ಮ ಭಾವಿ ಪತ್ನಿ ಮಾಧುರಿ ಸಿಂಗ್​ ಜತೆ ಉಂಗುರ ಬದಲಾಯಿಸಿಕೊಳ್ಳುವ ಮೂಲಕ ನಿಶ್ಚಿತಾರ್ಥ ಮಾಡಿಕೊಂಡಿದ್ದು, ಇನ್ನೇನು ಕೆಲವೇ ದಿನಗಳಲ್ಲಿ ಸಪ್ತಪದಿ ತುಳಿದು, ದಾಪಂತ್ಯ ಜೀವನ ಆರಂಭಿಸಲಿದ್ದಾರೆ.

ಕನಸಿನ ಹುಡುಗಿ ಸಿಕ್ಕಿದ್ದಾಳೆ!

ಕೆಲ ದಿನಗಳ ಹಿಂದೆ ಖಾಸಗಿ ಮಾಧ್ಯಮವೊಂದಕ್ಕೆ ನೀಡಿದ್ದ ಸಂದರ್ಶನದಲ್ಲಿ ಮಾತನಾಡಿದ್ದ ನಟ ರಾಕೇಶ್​ ಅಡಿಗ, ತಮ್ಮ ನಿರೀಕ್ಷೆಗೆ ತಕ್ಕ ಹುಡುಗಿ ಸಿಕ್ಕಿದ್ದಾರೆ ಎನ್ನುವುದಕ್ಕಿಂತ, ತಮ್ಮ ಜೀವನಕ್ಕೆ ಅಗತ್ಯವಿರುವಂತಹ ವ್ಯಕ್ತಿ ಸಿಕ್ಕಿದ್ದಾರೆ ಎನ್ನಬಹುದು. ನಾನು ಒಬ್ಬ ಬೆಟರ್ ಪರ್ಸನ್ ಆಗೋದಕ್ಕೆ ಯಾವ ತರಹ ಬೇಕೋ, ಆ ತರಹ ಹುಡುಗಿ ಸಿಕ್ಕಿದ್ದಾರೆ ಎಂದು ಅವರು ಹೇಳಿದ್ದರು. ಈ ಹೇಳಿಕೆ ಕೇಳಿ ಬಂದ ನಂತರ ಅವರ ಮದುವೆ ವಿಚಾರ ಮುನ್ನಲೆಗೆ ಬಂದಿತ್ತು.

ಜೋಶ್​ ಟು ಬಿಗ್​ಬಾಸ್​​!

2009 ರಲ್ಲಿ ಕಾಲೇಜ್​ ಡ್ರಾಮಾ ಜೋಶ್ ಸಿನಿಮಾ ಮೂಲಕ ರಾಕೇಶ್ ಅಡಿಗ ಸಿನಿಮಾ ರಂಗಕ್ಕೆ ಪಾದಾರ್ಪಣೆ ಮಾಡಿದ್ದರು. ನಂತರ ಲೂಸ್​ ಮಾದ ಯೋಗಿ ನಟನೆಯ ಅಲೆಮಾರಿ ಸಿನಿಮಾದಲ್ಲಿ ರಾಕೇಶ್​ ಅಭಿನಯಕ್ಕೆ ಅಪಾರ ಪ್ರಶಂಸೆ ವ್ಯಕ್ತವಾಗಿತ್ತು.

ಮನಸಾಲಜಿ, ಮಂದಹಾಸ, ಪ್ರೀತಿಯಿಂದ, ಮಂಡ್ಯ ಟು ಮುಂಬೈ, ನಟೋರಿಯಸ್​ ಮೊದಲಾದ ಸಿನಿಮಾಗಳಲ್ಲಿ ರಾಕೇಶ್ ಕಾಣಿಸಿಕೊಂಡಿದ್ದಾರೆ. ನಂತರ ಕನ್ನಡ ಬಿಗ್​ಬಾಸ್​ನಲ್ಲಿ ಮೊದಲ ಬಾರಿಗೆ ನಡೆದ ಓಟಿಟಿ ಸೀಸನ್​ನಲ್ಲಿ ಭಾಗವಹಿಸಿದ ರಾಕೇಶ್​, ಬಿಗ್​ಬಾಸ್​ ಸೀಸನ್​ 9 ರ ರನ್ನರ್​ ಅಪ್​ ಆಗಿ ಹೊರಹೊಮ್ಮಿದ್ದರು.